ඇමෙරිකා එක්සත් ජනපදය මෙක්සිකෝ දේශසීමාවේ ඉදිකෙරෙන තාප්පයට ප්‍රමාණවත් මූල්‍ය ප්‍රතිපාදන ලබා නොදුනහොත් රාජ්‍ය සේවා සියල්ල නවතා දමන බවට එරට ජනාධිපති ඩොනල්ඞ් ට්‍රම්ප් එරට කොංග්‍රසයට අනතුරු ඇඟවීය. 
 
ඇමෙරිකා එක්සත් ජනපදයේ රජය වසා දැමීම එසේත් නැතහොත් රාජ්‍ය සේවා නවතා දැමීම යනු ඒවාට මූල්‍ය ප්‍රතිපාදන වෙන් නොකිරීමය. මූල්‍ය ප්‍රතිපාදන වෙන් කෙරෙන පනත් කෙටුම්පත් කොංග්‍රසයේදී සම්මත වේ. එහෙත් ඒවා ක්‍රියාත්මක කිරීම සඳහා ජනාධිපතිවරයා අත්සන් තැබිය යුතුය.  
 
ඇමෙරිකා එක්සත් ජනපදය හා මෙක්සිකෝව අතර දේශසීමාවේ තාප්පයක් ඉදි කරනවා යන්න ට්‍රම්ප් ජනාධිපතිවරයා දුන් මැතිවරණ පොරොන්දුවකි. 
 
“තාප්පය ඉදි කිරීම ආරම්භ කරලා තියෙන්නේ. අපට ඩොලර් බිලියන 1.6ක මුදලක් තිබෙනවා” වොෂින්ටනයේ මිචිගන් හී පැවැති රැලියක් අමතමින් ට්‍රම්ප් ජනාධිපතිවරයා කීය.  
 
“සැප්තැම්බර් 28 වැනිදා වෙද්දි අවශ්‍ය ප්‍රතිපාදන නොලැබුණහොත් අපට දේශසීමාවේ ආරක්ෂාව නැහැ. අපට  වෙනත් තෝරාගැනීමක් නැහැ. රටේ සියලු කටයුතු නවතා දමන්න වෙනවා.” යැයි ට්‍රම්ප් ජනාධිපතිවරයා කීය. 
 
ඇමෙරිකා එක්සත් ජනපද ජනාධිපති ඩොනල්ඞ් ට්‍රම්ප් පසුගිය මාර්තු මාසයේදී ද මේ ආකාරයේම තර්ජනයක් කළේය. අපරාධකරුවන් රට තුළට ඇතුළුවීම නැවැත්වීම සඳහා සංක්‍රමණික නීතිරීති වෙනස් කළ යුතු යැයි හෙතෙම කීය.
 
සංක්‍රමණිකයන් පිළිබඳ අර්බුදයක් නිසාම ජනවාරි මාසයේදී අත්‍යවශ්‍ය සේවා හැර අනෙකුත් රාජ්‍ය සේවා සියල්ල සඳහා මූල්‍ය ප්‍රතිපාදන වෙන් කිරීමට නොහැකි වීමෙන් ඇමෙරිකාවේ සියලු කටයුතු ඇණ හිටියේය. 
 
ඇමෙරිකා ජනාධිපති ඩොනල්ඞ් ට්‍රම්ප් පසුගිය මාසයේදී සැප්තැම්බර් මාසයේ අවසානය දක්වා රජයේ කටයුතු සඳහා මුදල් වෙන් කරන පනත් කෙටුම්පතට අත්සන් තැබීය. එයින් සැප්තැම්බර් මාසය අවසානය දක්වා ඩොලර් ට්‍රිලියන 1.3ක මුදලක් වෙන් කරනු ලැබිණි. 
මේ වසරේ නොවැම්බර් මාසයේදී ඇමෙරිකා එක්සත් ජනපදයේ මධ්‍යවාර මැතිවරණය පැවැත්වීමට නියමිත අතර ඒ නිසාම රජයේ කටයුතු අඩපණ කිරීමට ට්‍රම්ප්ගේ රිපබ්ලිකන් පක්ෂයේ අනෙකුත් සාමාජිකයන්ගේ සහාය හිමිවනු ඇතැයි ද පැවසේ. රිපබ්ලිකන් පක්ෂයට කොංග්‍රසයේ බලහ තහවුරු කරගැනීමට අවශ්‍ය වීම ඊට ප්‍රධාන හේතුවයි.
  
ඬේලිමේල් ඇසුරිනි
055