සෝල්හිදීය (රොයිටර්)
 
සියලු න්‍යෂ්ටික අවි, උපකරණ සහ වැඩබිම් ඉවත් කරමින් කොරියානු අර්ධද්වීපය සම්පූර්ණ න්‍යෂ්ටික අවිහරණයකට ලක් කිරීමට උතුරු කොරියානු නායකයා අදහස් කරමින් සිටින්නේ යැයි දකුණු කොරියානු ජනාධිපති මූන් ජේ ඉන් අද (12) පැවැසීය.
 
උතුරු කොරියානු නායක කිම් ජොන් උන් පසුගිය ජූනි මාසයේදී සිංගප්පූරුවේදී ඇමෙරිකා ජනාධිපති ඩොනල්ඩ් ට්‍රම්ප් හමුවෙමින් කොරියානු අර්ධද්වීපය සම්පූර්ණ න්‍යෂ්ටික අවිහරණයකට ලක් කරන බව ප්‍රකාශ කර අතර එහිදි නායකයන් දෙදෙනා අතර එකඟතාවක් ද ඇති කරගන්නා ලදි. 
 
එහෙත් සම්පූර්ණ න්‍යෂ්ටික අවිහරණයක් ළඟා කරගන්නේ කෙසේ ද යන්න සම්බන්ධයෙන් එහිදි නිශ්චිතව ප්‍රකාශ නොකෙරුණි. 
 
එම සාකච්ඡා වලින් පසු සාධනීය වෙනසක් නොවුණු අතර උතුරු කොරියාව සම්පූර්ණයෙන් න්‍යෂ්ටික අවි අත්හැරීමට එකඟ නැති බව ද කීවේය. එමෙන්ම න්‍යෂ්ටික අවිහරණ ක්‍රියාවලිය සම්බන්ධයෙන් නිශ්චිත කාලසීමාවක් ප්‍රකාශ කිරීම ද ප්‍රතික්ෂේප කළේය.
 
දකුණු කොරියානු ජනාධිපතිවරයා මේ වසරේ මේ දක්වා කාලයේදී උතුරු කොරියානු නායකයා තෙවරක් මුණ ගැසුණු අතර හෙතෙම අවසන් වරට පසුගිය මාසයේදී උතුරු කොරියා නායකයා මුණ ගැසුණි.
 
උතුරු කොරියාව ඔවුන්ගේ න්‍යෂ්ටික සහ මිසයිල වැඩසටහන් ඇත්හැරීමට සූදානමින් සිටින බවත් නායක කිම් ජොන්ග් උන් ඒ වෙනුවෙන් පූර්ණ අවධානය යොමු කර ඇති බවත් දකුණු කොරියානු ජනාධිපතිවරයා පැවැසීය. 
 
උතුරු කොරියාව සහ නායක කිම් ජොන් උන් ආර්ථික සංවර්ධනය කෙරෙහි අවධානය යොමු කර ඇති බව කී ජනාධිපති මූන් ජේ ඉන් ඔවුන්ට එක්සත් ජාතීන්ගේ ආරක්ෂක කවුන්සිලයේ සම්බාධකවලින් ගැලවීමට වුවමනා වී ඇතැයි ද කීය. 
 
“සම්පූර්ණ න්‍යෂ්ටික අවිහරණයක් ළඟා කරගැනීමට උතුරු කොරියානු නායකයාට අවශ්‍ය වී තිබෙනවා. ඒ අනුව දැනට තිබෙන සියල්ල අත්හැර දැමීමටත් ඉදිරියේදී කිසිදු න්‍යෂ්ටික හෝ මිසයිල හෝ අත්හදා බැලීමක් නොකිරීමටත් ඔහු තීරණය කර තිබෙනවා.  දැනට තිබෙන න්‍යෂ්ටික අවි, මිසයිල, උපකරණ හා වැඩබිම් සියල්ල ඉවත් කිරීමටත් ඔහුට අවශ්‍ය වී තිබෙනවා” යැයි ජනාධිපති මූන් ජේ ඉන් පැවැසීය.  
 
උතුරු කොරියානු නායකයා සහ දකුණු කොරියානු ජනාධිපතිවරයා අතර අවසන් සාකච්ඡාව පැවැතියේ පියොන්යැන්ග්හිදීය. න්‍යෂ්ටික වැඩබිම් අක්‍රීය කිරීම නිරීක්ෂණය කිරීම සඳහා ජාත්‍යන්තර විශේෂඥයන්ට ආරාධනා කිරීමට උතුරු කොරියාව සූදානම් යැයි එම හමුවෙන් පසුව දකුණු ජනාධිපතිවරයා කීවේය. 
 
 
055