ඇමෙරිකා එක්සත් ජනපදයේ ඩිමොක්‍රටික් පක්ෂයේ සෙනට් සභික එළිසබෙත් වොරන් මහත්මිය 2020 දී පැවැත්වෙන ජනාධිපතිවරණයට ඉදිරිපත් වනු ඇතැයි වාර්තා වේ. 

69 හැවිරිදි වියේ පසුවන ඇය 2013 වසරේ සිට මැසචුසෙට්ස් ප්‍රාන්තය නියෝජනය කරමින් සෙනට් සභාව නියෝජනය කරන්නීය. 
ඇමෙරිකා ජනාධිපති ඩොනල්ඩ් ට්‍රම්ප් මහතාව දැඩි ලෙස විවේචනය කරන්නියක ලෙස ද ඇය ප්‍රකටය. 

ජනාධිපතිවරණය වෙනුවෙන් විශේෂ කමිටුවක් පත් කරන බව ඇය විසින් නිවේදනය කරනු ලැබ තිබෙන අතර එය ජනාධිපතිවරණයට මූල්‍ය ආධාර එකතු කිරීමට උපකාරී වනු ඇතැයි පැවසේ. 

“ඇමෙරිකාවේ මධ්‍යම පන්තිය තර්ජනයට ලක්වෙලා” යැයි ට්විටර් සමාජ ජාල වෙබ් අඩවිය ඔස්සේ පණිවුඩයක් නිකුත් කරමින් ඇය සඳහන් කළාය. 

‘අපි කොහොමද මෙහි ආවේ. බිලියනපතියන් සහ විශාල සමාගම් ඔවුන්ට අවශ්‍ය දේ තීරණය කර තිබෙනවා. ලොකුම කුට්ටිය ඔවුන්ට. දේශපාලනඥයන්ට තවත් ලොකු කුට්ටියක් දිය යුතු බව ඔවුන්ම නියම කරලා. ඇමෙරිකාවේ සිටින සෑම පුද්ගලයකුටම වෙහෙස වී වැඩ කරන්න පුළුවන් වෙන්න ඕනෑ.’ 
මහන්සි වෙන්න පුළුවන් වෙන්න ඕනෑ. හැමෝම එකම නීතියට යටත්. හැමෝටම තමන් ගැන වගේම තමන් ආදරය කරන මිනිස්සු ගැන බලාගන්න ඕනෑ. එම හැකියාව තිබෙනවා. මම සටන් වදින්නේ ඒ සඳහා. මේ විශේෂ කමිටුව ආරම්භ කරන්නේ ඒ වෙනුවෙන්. මට ඔබ අවශ්‍යයි” ඇය සඳහන් කළාය. 

ඒ.එෆ්.පී ඇසුරිනි

(055)

.