ඉන්දියාවේ ප්‍රසිද්ධ  සංචාරක නගරයක් වන ශිම්ලා නගරය උග්‍ර ජල හිඟයකින් පීඩා විඳින බවත් ඒ හේතුවෙන් සංචාරකයන්ට එහි පැමිණීමෙන් වළකින ලෙස නගරවැසියන් විසින් ඉල්ලා ඇති බවත් ඉන්දීය මාධ්‍ය වාර්තා කර ඇත.
 
සතියකට වැඩි කාලයක් තිස්සේ මෙම ජල හිඟය පවතින අතර මේ වනවිට කුඩා පරිමාණයේ හෝටල් වසා දමා ඇති බව බලධාරීහු පවසති. 
 
ලක්ෂ දෙකක පමණ ජනගහනයක් සිටින මෙම නගරයේ ජනයා ජලය ලබාගැනීම සඳහා පැය ගණන් දිගු පෝලිම්වල සිටගෙන සිටින බව පැවසේ.
 
සමාජ මාධ්‍ය ජාලා ඔස්සේද සංචාරකයන්ට පැමිණීමෙන් වළකින ලෙස විශාල වශයෙන් ඉල්ලීම් කර ඇති බවත් වාර්තා වේ.
 
පසුගිය අඟහරුවාදා (29) ප්‍රධාන අමාත්‍යවරයාගේ නිවස ඉදිරිපිට නගරවැසියන් විසින් විරෝධතාවයක් සිදු කරන ලද අතර එහිදී පොලිසිය සමඟ ගැටුමක් ද ඇතිවී තිබේ.
 
සංචාරකයින් වැඩිපුර පැමිණෙන්නේ එළඹෙන ජුනි මාසයේදී බවත් එවිට වැසියන්ගේ ජීවිත මීටත් වඩා දුෂ්කර තත්ත්වයකට පත්වනු ඇති බවත් ඔවුහු චෝදනා කරති. 
 
ශිම්ලා බලධාරීන් විසින් ජාත්‍යන්තර ශිම්ලා ග්‍රීෂ්ම උත්සවයද කල් දමා ඇතැයි පැවසේ.
 
(බීබීසි ඇසුරිණි - 085)