ඇමෙරිකා එක්සත් ජනපදය මාලදිවයිනේ ජනතාව සමඟ සිටින බව එරට ජාතික ආරක්ෂක කවුන්සිලයේ ට්විටර් පණිවිඩයක් උපුටා දක්වමින් ශ්‍රී ලංකාවේ සහ මාලදිවයිනේ ඇමෙරිකා තානාපති අතුල් කෙශාප් මහතා සඳහන් කරයි. 

ඇමෙරිකා එක්සත් ජනපදයේ ජාතික ආරක්ෂක කවුන්සිලය නිකුත් කළ ට්විටර් පණිවිඩයේ මෙසේ සඳහන් වේ. “ඇමෙරිකාව සෑම විටම මාලදිවයිනේ ජනතාව සමඟ සිටිනවා. මාලදිවයිනේ ආණ්ඩුව සහ හමුදාව නීතියේ ආධිපත්‍යයට, භාෂණයේ නිදහසට සහ ප්‍රජාතන්ත්‍රවාදී ආයතනවලට ගරු කළ යුතුයි. ලෝකය බලා සිටිනවා”. අධිකරණයේ ස්වාධීනත්වයට සහ නිදහසට ගරු කිරීමත් ඊට සහාය දැක්වීමත් මාලදිවයිනේ සෑම පුරවැසියකුගේම වගකීම යැයි ශ්‍රී ලංකාවේ සහ මාලදිවයිනේ බ්‍රිතාන්‍ය තානාපති ජේම්ස් ඩෝරිස් මහතා ට්විටර් පණිවිඩයක් නිකුත් කරමින් සඳහන් කර තිබේ. 

මේ අතර ඇමෙරිකා එක්සත් ජනපදය, චීනය ඇතුළු රටවල් කිහිපයක්ම එම රටවල වැසියන්ගෙන් මාලදිවයිනේ සංචාරය නොකරන්නැයි සඳහන් කරමින් ‘සංචාරක අනතුරු ඇඟවීමේ’ නිවේදන නිකුත් කර තිබේ.

මේ අතර මාලදිවයිනේ ජනාධිපති අබ්දුල්ලා යමීන් හදිසි තත්ත්වයක් ප්‍රකාශයට පත් කිරීම මර්දනය අවසර ලබා දීමක් නොවිය යුතු යැයි ජාත්‍යන්තර ක්ෂමා සංවිධානය අවධාරණය කරයි. 

“මාලදිවයිනේ හදිසි තත්ත්වයක් ප්‍රකාශයට පත් කිරීමට දැඩි කනස්සල්ලට හේතු වන කරුණක්. එය ඉතාමත් කනගාටුදායක තත්ත්වයක්. රටේ අර්බුදකාරී දේශපාලන තත්ත්වයත් තවත් උග්‍ර කරන්නක්. කෙසේ නමුත් හදිසි තත්ත්වයක් ප්‍රකාශයට පත් කිරීමේ රටේ අර්බුදකාරී තත්ත්වය තවත් උත්සන්න කිරීමට හේතුවක් නොවිය යුතුයි. 

ඒ වගේම සියලු පාර්ශව මානව හිමිකම්වලට ගරු කළ යුතු” යැයි ජාත්‍යන්තර ක්ෂමා සංවිධානයේ දකුණු ආසියානු කලාපයේ නියෝජ්‍ය අධ්‍යක්ෂිකා දිනුෂිකා දිසානායක මහත්මිය සඳහන් කරයි.  
 
055