චීනයේ හොංකොං රාජ්‍යයේ විරෝධතාකරුවන් හා ආරක්ෂක අංශ අතර ඇතිවූ ගැටුම් වලින් 72දෙනකු තුවාල ලබා ඇතැයි වාර්තා වේ. 

තුවාල ලැබූවන්ගෙන් දෙදෙනකු බරපතල තත්ත්වයේ පසුවන අතර පොලිස් නිලධාරීන් නව දෙනකු රෝහල් ගතකර ඇත.

හොංකොං රජය විසින් ගෙන එන ලද පිටුවහල් කිරීමේ නව පනත හකුලා ගන්නා ලෙස ඉල්ලමින් දහස් ගණන් ජනතාව වීදී බැස විරෝධතාවයේ යෙදුණ අතර පොලිසිය කඳුළු ගෑස් සහ රබර් උණ්ඩ යොදා ගනිමින් විරෝධතාකරුවන් මැඩපැවැත්වීමට උත්සාහ කළහ.

දෙපාර්ශවය අතර පැය ගණනාවක් තිස්සේ පැවති ගැටුම් වලින් පසුව මේ වනවිට විරෝධතාකරුවන් පසුබැසගොස් සිටින බව මාධ්‍ය සඳහන් කර ඇත.

කෙසේ වුවද  මානව හිමිකම් සංවිධාන පොලිසිය වෙත චෝදනා එල්ල කරමින් සඳහන් කර ඇත්තේ පොලිසිය විරෝධතාකරුවන් මර්දනය කිරීම සඳහා අසාධාරණ ලෙස බලය පාවිච්චි කළ බවයි.

දැඩි විරෝධතාවයන් හමුවේ වුවද හොංකොං බලධාරීහු පනත හකුලා ගැනීම සම්බන්ධව කිසිවක් ප්‍රකාශ කර නොමැති නමුත් ඊයේ(12) පැවැත්වීමට නියමිතව තිබූ ව්‍යවස්ථාදායක සභාව යෝජනාවේ දෙවන වර කියවීම දින නියමයක් නොමැතිව කල් දමා ඇත.

(බීබීසී ඇසුරිණි - 085)