හිම කුණාටුවක බලපෑම හේතුවෙන් ඇමරිකාවේ ප්‍රාන්ත ගණනාවක ජනජීවිතය අඩාලවී ඇතැයි විදෙස් මාධ්‍ය වාර්තාකරයි.

නිව්යෝර්ක්, නිව්ජර්සි, පිලඩෙල්ෆියා  වැනි නගර සඳහා මේ හේතුවෙන් දැඩි බලපෑම් එල්ලවී ඇති අතර මිඩ්ල්ටවුන්, මිල්ෆොර්ඩ්, කාමෙල්, ටොරින්ටන් ප්‍රදේශ වලට අඟල් 12 -24 දක්වා ඝනකමකට හිම පතිතවී ඇතැයිද එම  වාර්තා සදහන් කරයි.

මෙම තත්වය නිසා ප්‍රදේශයේ පාසල් වසා දමා ඇති අතර, ගුවන් ගමන් 2400 පමණ මේවන විටත් අවලංගුකර ගුවන් තොටුපළවල් කිහිපයක්ද වසාදමා ඇතැයි විදෙස් වාර්තා සඳහන් කරයි.

එසේ වසා දමා ඇති ගුවන් තොටුපළක් වන  නිවාර්ක් ගුවන්තොටුපොළේ දිනකට ගුවන් ගමන් වාර 650 පමණ සාමාන්‍යයෙන් ක්‍රියාත්මකවන අතර එම සියලුම ගුවන් ගමන් නවතා දමා ගුවන් තොටුපළද වසා දමා තිබේ.

මේ අතර ජෝන් එෆ්.කෙනඩි ජාත්‍යන්තර  ගුවන්තොටුපළේ ගුවන්ගමන් වාර 467 සහ ල ගුඅර්ඩ්යා ගුවන්තොටුපලේ ගුවන්ගමන් වාර 587 ද අවලංගු කර තිබේ.

එරට කාලගුණ වාර්තා සදහන් කරන්නේ ඉදිරි දින කිහිපයේද හිම පතනයේ අඩුවක් අපේක්ෂා කළ නොහැකි බවයි.

දැනට වඩාත් හිම පතනයන් සහිත ප්‍රදේශ ජනාකීර්ණ ප්‍රදේශ වීමත් විදුලිබලයද එම ප්‍රදේශවල විසන්ධි වී තිබීමත් ජනතාවට අහිතකර ලෙස බලපෑ ඇති බව එම වාර්තා සදහන් කරයි.

මෙම තත්වය නිසා ෆිලඩෙල්ෆියාවේ සහ නිව්ජේර්සි ප්‍රාන්තවල දුම්රිය ගමන්වාර 50 කට අධික ප්‍රමාණයක් අවලංගු කිරීමට කටයුතුකර ඇති අතර කාලසටහනකට අනුව  දුම්රිය ධාවනය නොකරන බවද සදහන් කරයි.

මෙම තත්වයන් නිසා ෆිලඩෙල්ෆියාවේ ප්‍රාන්ත ආණ්ඩුකාරවරයා හදිසි තත්වයක්ද ප්‍රකාශයට පත්කර ඇතැයි විදෙස් මාධ්‍ය සදහන් කරයි.
 
(255)