අවිගත් පිරිසක් ලිබියාවේ ට්‍රිපොලි නුවර ජාතික තෙල් සංස්ථා ගොඩනැගිල්ලට ඇතුළු වී වෙඩි තබා ඇති අතර සිද්ධියෙන් අවම වශයෙන් හතර දෙනකුවත් මියයන්නට ඇති බව පැවසේ.
 
ආරක්ෂක අංශ සහ අවිගත් පිරිස අතර ගැටුම් ඇති වූ බවද පිපිරුම් සහ වෙඩි ශබ්ද ඇසුණු බවද වාර්තා වේ. 
 
ආරක්ෂක අංශ පවසන්නේ ප්‍රහාරකයන් දෙදෙනකු සහ කාර්යමණ්ඩලයේ දෙදෙනකු මියගොස් ඇති බවයි. සංස්ථාවේ සභාපතිවරයා ආරක්ෂිතව ඉවත්කරගත් බව පොලිසිය පවසා ඇත. ප්‍රහාරය සිදුකළේ කවුරුන්ද යන්න පිළිබඳව පැහැදිලි නොමැති බව ආරක්ෂක අංශ පවසයි.
 
ගොඩනැගිල්ලේ ජනේලයකින් පිටතට පැන දිවිබේරාගත් සේවකයෙකු පවසා ඇත්තේ තුවක්කුකරුවන් පස්දෙනකු පමණ වෙඩි තබමින් සිටින බවයි. වෙඩි ප්‍රහාර වලින් කිහිපදෙනකු මියගොස් සිටි බවත් ඔහු පවසා ඇත.
 
(රොයිටර් ඇසුරිණි - 085)