නවදිල්ලිහිදීය (ඒ.එෆ්.පී)

වසර 2022 දී මිනිසුන් සහිත අභ්‍යාවකාශය මෙහෙයුමක් දියත් කරන බව ඉන්දීය අග‍්‍රාමාත්‍ය නරේන්ද්‍ර මෝදි අද (15) ප‍්‍රකාශ කළේය.

ඉන්දියාවේ 72 වැනි නිදහස් සැමරුම වෙනුවෙන් නවදිල්ලි නුවර රතු බලකොටුවේ පැවැති උත්සවයේදී දීර්ඝ කතාවක් කරමින් අග‍්‍රාමාත්‍ය නරේන්ද්‍ර මෝදි ඒ බව කීවේය.  

වසර 2022 දී හෝ හැකියාවක් ලැබුණහොත් ඊට පෙර හෝ ඉන්දීය ධජය රැගත් ඉන්දීය පුරවැසියකු අභ්‍යාවකාශයට යැවීමට කි‍්‍රයා කරන බවත් ඉන්දීය ධජය රැගෙන යන පුරවැසියා පිරිමියකු හෝ කාන්තාවක හෝ විය හැකි යැයි බවත් මෝදි අග‍්‍රාමාත්‍යවරයා පැවැසීය. 

එසේ මිනිසුන් සහිත අභ්‍යාවකාශ මෙහෙයුමක් දියත් කළ සිව්වැනි රට බවට ඉන්දියාව පත්වන බව ද අගමැති මෝදි මෙහිදි කීය. මීට පෙර ඇමෙරිකා එක්සත් ජනපදය, රුසියාව හා චීනය එවැනි මිනිසුන් සහිත අභ්‍යාවකාශ මෙහෙයුම් දියත් කර තිබේ. 

මේ අතර ලබන වසරේදී මිනිසුන් රහිත අභ්‍යාවකාශ මෙහෙයුමක් දියත් කරන බව ඉන්දීය අභ්‍යාවකාශ පර්යේෂණ සංවිධානය පසුගිය සතියේ නිවේදනය කළේය. 

055