වොෂින්ටන්හිදීය (ඒ.එෆ්.පී)
 
රුසියාව ඇමෙරිකා එක්සත් ජනපදයේ මැතිවරණයට මැදිහත් වීම සම්බන්ධයෙන් කෙරෙන පරීක්ෂණ ‘දේශපාලන ක්‍රීඩාවක්’ බවත් ඊට ඇමෙරිකාව සහ රුසියාව අතර පවතින සබඳතාවලට මැදිහත්වීමට ඉඩ නොදිය යුතු බවත් රුසියානු ජනාධිපති ව්ලැදිමීර් පුටින් පවසයි. 
 
වසර 2016 පැවැති ඇමෙරිකා එක්සත් ජනපද ජනාධිපතිවරණයේ දී රුසියාව ඊට මැදිහත් වූ බවට චෝදනා කරමින් විශේෂ නීතිඥ රොබට් මුලර්ගේ ප්‍රමුඛත්වයෙන් පරීක්ෂණයක් සිදු කෙරේ. 
 
ජනාධිපතිවරණ ප්‍රචාරණ ව්‍යාපාරය සමයේ දී රුසියානු බුද්ධි නියෝජිතයන් 12 දෙනකු ඩිමොකටික් පක්ෂයේ පරිගණකවලට අනවසරයෙන් ඇතුළු වී දත්ත වෙනස් කර ඇතැයි සඳහන් කරමින් රොබට් මුලර් පසුගිය සතියේදී චෝදනා ද ගොනු කළේය.
  
ඇමෙරිකා එක්සත් ජනපද ජනාධිපති ඩොනල්ඩ් ට්‍රම්ප් හමුවීම දින තුනකට පෙර, ‘ෆොක්ස්’ පුවත් සේවය සමඟ සම්මුඛ සාකච්ඡාවකට එක්වෙමින් රුසියානු ජනාධිපතිවරයා එම කරුණු පවසා තිබේ. 
 
රොබට් මුලර් රුසියානු බුද්ධි නිලධාරීන්ට චෝදනා කිරීම සම්බන්ධයෙන් රුසියානු ජනාධිතිවරයාගෙන් විමසා ඇති අතර එහිදි හෙතෙම ඉහත කරුණු පවසා තිබේ. ඔහු එහිදි මෙසේ ද පවසා තිබේ. 
 
“ඒ ගැන මම අවධානය යොමු කරන්නේ නැහැ. එය ඇමෙරිකාවේ අභ්‍යන්තර දේශපාලන අරගලයේ කොටසක්. මං ගැන පොඩ්ඩක්වත් වේලාව නාස්ති කරන්නේ නැහැ. අවධානය යොමු කරන්නේත් නැහැ. එය ඇමෙරිකා එක්සත් ජනපදයේ අභ්‍යන්තර දේශපාල ක්‍රීඩාවක්. එසේ වුවත් ඇමෙරිකාවේ අභ්‍යන්තර අර්බුදවලට ඇමෙරිකාව සහ රුසියාව අතර පවතින සබඳතාවලට මැදිහත්වීමට ඉඩ නොතැබිය යුතු” යැයි පරිවර්තකයකුගේ සහාය ඇතිව ජනාධිපති පුටීන් පවසා ඇත. 
 
එම පරීක්ෂණවලදී ඇමෙරිකාව සහ රුසියාව අතර සබඳතා ඇපයට නොගත යුතු යැයි ද පුටින් සඳහන් කර තිබේ. 
 
 
055