ඉස්ලාමාබාද්හිදීය (රොයිටර්)

‘අශ්ලීල’ චිත්‍රපට දැන්වීම් පුවරු ප්‍රදර්ශනය කිරීම තහනම් කරන බව පාකිස්තානයේ පන්ජාබ් ප්‍රාන්තයේ නව ජනමාධ්‍ය අමාත්‍ය ෆයාස් උල් හසන් චෝහාන් නිවේදනය කර ඇත. 

මේත් සමඟ පාකිස්තානයේ නව අගමැති ඉම්රාන් ඛාන් යටතේ දැඩි ඉස්ලාමීයවාදී දේශපාලනඥයන් වර්ධනය වීමේ අවදානමක් ඇති වී තිබේ.

ඉස්ලාමීය දේශපාලනඥයකු වන ෆයාස් උල් හසන් චෝහාන් පන්ජාබ් ප්‍රාන්තයේ නව ජනමාධ්‍ය අමාත්‍යවරයා වශයෙන් පත්වූයේ පසුගිය සතියේදීය.

ප්‍රාන්ත ජනමාධ්‍ය අමාත්‍යධුරයට පත්වීමෙන් පසු චෝහාන් 2011 වසරේ දී පන්ජාබ් ප්‍රාන්ත ආණ්ඩුකාරවරයා ඝාතනය කළ බවට චෝදනා ලැබ සිර දඬුවම් නියම වී සිට මියගිය පුද්ගලයාගේ සොහොනට ගියේය. ඊට පසු පාකිස්තානයේ ජනප්‍රිය ගායිකාව හා නිළියක වන නාර්ගිස් සම්බන්ධයෙන් දැඩි විවේචනයක් කළේය. ඔහුගේ මේ ක්‍රියාකලාපය විපක්ෂ කණ්ඩායම්වල විවේචනයට ලක්ව තිබිණි. 

“පන්ජාබ් ප්‍රාන්තයේ සිනමා ශාලාවක හෝ වෙනත් තැනක අසභ්‍ය හෝ අශ්ලීල හෝ විශාල දැන්වීම් පුවරු තිබුණොත් ඒවා ඉවර කරන්න දවස් තුනක් දෙනවා ඒ දවස් තුන ඇතුළත ඉවත් කළේ නැතිනම් දඩයක් ගෙවන්න වෙනවා. එසේ දඩය ගෙව්වේ නැතිනම් සිනමා ශාලාව වසා දමනවා” නැගෙනහිර ලාහෝරයේ නගරයකදී මහජනතාව අමතමින් චොහාන් ඒ බව පැවැසීය. 

“අඩ නිරුවත් ගැහැණුන්ගේ ඡායාරූප මුද්‍රණය කර විශාල දැන්වීම් පුවරුවල දාන්නේ මොන මනුෂ්‍යත්වය ද ?” හෙතෙම ප්‍රශ්න කළේය. 

ඉම්රාන් ඛාන්ගේ මැතිවරණ ජයග්‍රහණයට ඉස්ලාමීය පක්ෂවලින් විශාල සහයෝගයක් හිමිවිය. ‘ජමාත් ඊ ඉස්ලාමි පාකිස්තානි’ පක්ෂය නියෝජනය කරමින් චොහාන්, ඉම්රාන් ඛාන්ගේ තරීක් ඊ ඉන්සාෆ්, යුක්තිය සඳහා වූ ව්‍යාපාරයට එක්විය.

“මෙය පැහැදිලිව සංස්කෘතික පොලිසියක ලක්ෂණයක්” යැයි වාමාංශික දේශපාලනඥයකු හා අයිතිවාසිකම් වෙනුවෙන් පෙනි සිටින ක්‍රියාකාරිකයකු වන අමාර් රෂීඞ් ට්විටර් පණිවුඩයක් නිකුත් කරමින් සඳහන් කළේය. 

වත්මන් සිදුවීමම් සැලකිල්ලට ගැනීමේදී දැඩි ඉස්ලාම්වාදී ස්වරූපයක් වර්ධනය වෙමින් තිබෙන බියක් ඇතැයි ද ඇතැම් පිරිස් පෙන්වාදෙති.

055