වොෂින්ටන්හිදීය (රොයිටර්)

පාකිස්තානයට ප්‍රදානය කිරීමට නියමිතව තිබූ එක්සත් ජනපද ඩොලර් මිලියන 300 යුද අරමුදල් අවලංගු කිරීමට එක්සත් ජනපද හමුදාව තීරණය කර ඇත.

සටන්කාමීන්ට එරෙහිව ස්ථීර පියවරක් ගැනීමට පාකිස්තානය අසමත් වී ඇති බව චෝදනා කරමින් ඇමෙරිකා එක්සත් ජනපදය මෙලෙස පාකිස්තානයට අරමුදල් ලබාදීම අවලංගු කර ඇත.

මේ පියවරත් සමඟ දෙරට අතර තිබෙන සබඳතා තවදුරටත් නරක අතට හැරෙනු ඇතැයි පැවසේ. මේ වසර ආරම්භයේදී ද පාකිස්තානයට මූල්‍යාධාර ලබාදීම අත්හිටු වීමට පියවර ගන්නා බව ඇමෙරිකා ජනාධිපති ඩොනල්ඞ් ට්‍රම්ප් ප්‍රකාශ කළේය. පාකිස්තානයට ලබාදුන් මූල්‍යාධාරවලින් කිසිදු ප්‍රගතියක් සිදු වී නැති බවත් එය හුදු බොරුවක් හා රැවටිල්ලක් යැයි ද ඇමෙරිකා ජනාධිපතිවරයා චෝදනා කළේය. 

අසල්වැසි ඇෆ්ගනිස්තානයේ වසර 17ක් මුළුල්ලේ දිග්ගැස්සෙන යුද්ධයට හේතුව පාකිස්තානය සටන්කාමීන්ට ආරක්ෂිත වාසස්ථානයක් වීම යැයි ට්‍රම්ප් පරිපාලනය චෝදනා කරයි. කෙසේ නමුත් පාකිස්තානය එම චෝදනාව ප්‍රතික්ෂේප කරයි. 

කෙසේ වෙතත් පාකිස්තානය ඔවුන්ගේ හැසිරීම වෙනස් කළහොත් නැවතත් ඇමෙරිකා එක්සත් ජනපදයේ සහාය දිනාගත හැකි යැයි ඇමෙරිකා එක්සත් ජනපද බලධාරීහු ප්‍රකාශ කළහ. 

(055)