හරාරේහිදීය (රොයිටර්ස්)
 
තම ජනාධිපතිධුරය වටා එක්රැස් වන්නැයි සිම්බාබ්වේ ජනාධිපති එමර්සන් ම්නන්ගග්වා අද (26) අවධාරණය කළේය.
 
පසුගිය සිකුරාදා ව්‍යවස්ථා අධිකරණය එමර්සන් ම්නන්ගග්වා ජනාධිපති බව තීරණයෙන් කිරීමෙන් පසු ජනාධිපති ධුරයේ දිවුරුම් දෙමින් එමර්සන් ම්නන්ගග්වා ඒ බව පැවැසීය. 
 
ජනාධිපතිධුරය සඳහා එමර්සන් ම්නන්ගග්වා සහ නෙල්සන් චමීසා අතර තියුණු තරගයක් පැවැති නමුත් ජනාධිපතිවරණයෙන් පහසු ජයක් ලැබීමට එමර්සන් ම්නන්ගග්වා සමත් විය. ජනාධිපතිවරණයේ අවසන් ප්‍රතිඵල නිකුත් වීම දින කිහිපයක් ප්‍රමාද වූ අතර මැතිවරණය ප්‍රතිඵලය අභියෝගයට ලක් කළ නෙල්සන් චමීසා මැතිවරණ අක්‍රමිකතා සිදුව ඇතැයි ද චෝදනා කළේය. 
 
ජූලි 30 වැනිදා පැවැති ජනාධිපතිවරණය, මහ මැතිවරණය සහ පළාත් මැතිවරණය යන මැතිවරණ ත්‍රිත්වය සහ ප්‍රතිඵල නිකුත් කිරීම ඇතුළු පශ්චාත් මැතිවරණ සමය සැලකිල්ලට ගැනීමේදී සිම්බාබ්වේහි ප්‍රජාතන්ත්‍රවාදයේ විශ්වාසය සම්බන්ධයෙන් ප්‍රශ්න නැගෙන බව ඇමෙරිකා එක්සත් ජනපද නිරීක්ෂකයෝ පවසති. 
 
කෙසේ නමුත් එමර්සන් ම්නන්ගග්වාගේ දිවුරුම් දීමේ උත්සවය සිම්බාබ්වේ වැසියන් දහස් ගණනකගේ සහභාගීත්වයෙන් පැවැත්විණි. ඊට දකුණු අප්‍රිකාවේ ජනාධිපති සිරිල් රැමපෝසා, රුවන්ඩා ජනාධිපති පෝල් කගාමේ ඇතුළු විදෙස් නායකයන් ද පිරිසක් ද මෙම උත්සවයට සහභාගී වූහ. 
 
“අපි කවරදාකටත් වඩා එකමුතු විය යුතු දවස එළැඹී තිබෙනවා. අපි සියලු දෙනා එකතු වී අපි අපේ මාතෘභූමිය සංවර්ධනය කරමු. ජාතියක් ලෙස එකමුතු වීමටත් අපේ ආර්ථිකය ගොඩනැගීමටත් කාලය ඇවිත්” ජනාධිපති ධුරයට පත්වීමෙන් පසු තම පළමු කතාව කරමින් එමර්සන් ම්නන්ගග්වා පැවැසීය. 
 
055