ඉන්දියානු පාලන කාෂ්මීර ප්‍රදේශයේ ස්වයං පාලන බලතල ඉවත් කිරීම සඳහා ඉන්දියානු රජය පසුගියදා ගත් තීන්දුවත් සමඟ කාෂ්මීර වැසියන්ගේ මානව හිමිකම් වලට බරපතල බලපෑම් එල්ල විය හැකිබව එක්සත් ජාතීන්ගේ සංවිධානය පවසයි.

පසුගිය ඉරිදා සිට ඉන්දියාව විසින් පාලනය කරන කාෂ්මීර ප්‍රදේශයේ සන්නිවේදන සම්බන්ධතා අවහිර කර ඇති අතර දේශපාලන රැස්වීම් තහනම් කිරීම, දේශපාලන නායකයින් රඳවා තබා ගැනීම හා ප්‍රදේශයේ විශාල වශයෙන් හමුදා බලඇණි යෙදවීම වැනි පියවර රාශියක් ගනු ලැබීය.

එක්සත් ජාතීන්ගේ සංවිධානය පවසන්නේ කාෂ්මීර ප්‍රදේශය තුල ඉන්දීය රජයේ මෙම ක්‍රියාකාරකම් සම්බන්ධව දැඩි අවධානය යොමු කර ඇති බවයි.

මෙලෙස සීමා පැනවීම් සම්බන්ධව කාෂ්මීර වැසියන් විරෝධතා ආරම්භ කර ඇති අතර ඉන්දියානු හමුදා භටයන් වෙත ගල් මුල්  ප්‍රහාර ද එල්ල කර ඇතැයි මාධ්‍ය වාර්තා කර ඇත.

ජම්මු කාෂ්මීර ප්‍රාන්තයේ මුස්ලිම් බහුතරයක් වෙසෙන අතර ඉන්දිය ආණ්ඩුක්‍රම ව්‍යවස්ථාව මගින් එම ප්‍රදේශයට ලබාදී තිබූ විශේෂ ස්වයං පාලන බලතල අවලංගු කිරීමත් සමඟ මෙම තත්ත්වය උදාවිය.

(බීබිසි ඇසුරිණි - 085)