ඊජිප්තුවේ ඇලෙක්සැන්ඩ්‍රියා සහ කයිරෝ නගරය අතර ධාවනය වෙමින් තිබූ දුම්රිය දෙකක් එකිනෙක ගැටීමෙන් 36 දෙනකු මියගොස් 123 දෙනකු තුවාල ලබා ඇතැයි  වාර්තාවේ.

එම දුම්රිය ඇලෙක්සැන්ඩ්‍රියාවට නැගෙනහිරින් පිහිටි කොයිෂිඩ් හි කුඩා දුම්රිය ස්ථානයක නවතා තිබූ දුම්රියක් හා ගැටීමෙන් මෙම අනතුර සිදුව ඇතැයි ඊජිප්තු දුම්රිය අධිකාරිය පවසයි.

මෙම අනතුර පසුගිය දශකයක පමණ කාලය තුළ එරට සිදුවූ විශාලතම දුම්රිය අනතුර බව පැවසේ.

ඊජිප්තුවේ දුම්රිය සම්බන්ධයෙන් ආරක්ෂක වාර්තා පවත්වාගෙන යාම ඉතාමත් දුර්වල තත්ත්වයක පවත්නා බවත් ආරක්ෂිත පද්ධතීන්හි දුර්වලතා හා දුර්වල කළමනාකරණය මේ අනතුරට හේතුවී ඇති බවත් එරට මාධ්‍ය ප්‍රකාශ කර තිබේ.

2006 වර්ෂයේ දී මගී දුම්රිය දෙකක් කයිරෝ නගරය ආසන්නයේ දී ගැටීමෙන් 51 දෙනකු මියගිය අතර ඉන් පෙර 2002 වර්ෂයේ දී දුම්රියක හටගත් ගින්නක් හේතුවෙන් 370ට අධික පිරිසක් මියගියහ.

(ටයිම්ස් ඔෆ් ඉන්දියා ඇසුරෙනි - 085)