ඉස්ලාමාබාද්හිදීය (එන්.ඩී.ටීවී)

මහ මැතිවරණයෙන් පාකිස්තානයේ නව අග්‍රාමාත්‍යවරයා ලෙස තේරීපත්වූ ඉම්රාන් ඛාන් ධූරයේ දිවුරුම් දීම මෙම මස 11 වැනිදා සිදුවන බවත් ඊට කිසිදු විදෙස් නායකයකුට ආරාධනා කර නැති බවත් පී.ටි.අයි පක්ෂය සඳහන් කරයි. 

වසර 1992 දී ලෝක කුසලානය දිනූ පාකිස්තාන ක්‍රිකට් කණ්ඩායමේ නායකයා වන ඉම්රාන් ඛාන් 1996 වසරේදී දේශපාලනයට එක්විය. පාකිස්තාන මහ මැතිවරණය ජූලි 25 වැනිදා පැවැති අතර එහිදි පාර්ලිමේන්තු ආසන 116ක් දිනාගනිමින් පාර්ලිමේන්තුවේ විශාලතම පක්ෂය බවට පත්වීම ඉම්රාන් ඛාන්ගේ නායකත්වයෙන් යුතු පී.ටි.අයි පක්ෂය සමත්විය.

කෙසේ නමුත් ආණ්ඩුවක් පිහිටුවීමට අවශ්‍ය ආසන 137 දිනාගැනීමට නොහැකි වූ පී.ටි.අයි පක්ෂයට සන්ධානගත ගතවීමට සිදුවිය. 

තම දිවුරුම් දීමේ උත්සවයට ඉම්රාන් ඛාන් ඉන්දීය අග්‍රාමාත්‍ය නරේන්ද්‍ර මෝදි සහ ‘සාර්ක්’ සංවිධානයේ සාමාජික රටවල නායකයන්ට ආරාධනා කරනු ඇතැයි වාර්තා විය. ඊට අමතරව ඉම්රාන් ඛාන් තම දිවුරුම් දීමේ උත්සවයට බොලිවුඞ් නළු ඉම්රාන් ඛාන්, හිටපු ක්‍රිකට් ක්‍රීඩකයන් වන සුනිල් ගවස්කාර්, කපිල් දේව් සහ නව්ජොට් සිං සිධු ආරාධනා කර ඇති අතර සිධු ආරධානව බාරගෙන ඇත. 

“විදෙස් නායකයන් දිවුරුම් දීමේ උත්සවයට සහභාගී වන බවට මාධ්‍ය වාර්තා පළ වී තිබුණා. එහෙත් ඒවා වැරැදියි” යැයි පී.ටි.අයි පක්ෂයේ ප්‍රකාශකයකු වන ෆවාඞ් චෞද්රි පැවැසීය. 

දිවුරුම් දීමේ උත්සවය පාකිස්තාන අයිවන් ඊ සද්ර් (පාකිස්තාන ජනාධිපති මන්දිරය) හිදි පැවැත්වෙන බව ද හෙතෙම කීවේය. 

දිවුරුම් දීමේ උත්සවය ඉතා චාම් සහ අඩු වියදමින් කරන්නැයි ද ඉම්රාන් ඛාන් ඉල්ලා ඇති බව ද ෆවාඞ් කීය. 

“විදේශිකයන් කිසිවකුටත් ආරාධනා කරන්නේ නැහැ. එසේ වුණත් ඉම්රාන් ඛාන්ගේ සමීපතම විදෙස් මිතුරන් කිහිපදෙනකුට ආරාධනා කරනවා. මෙය සම්පූර්ණයෙන්ම ජාතික උත්සවයක්” ෆවාඞ් කීවේය. 

055