ධවල මන්දිරයේ සිටින ඉරාන විරෝධී නිලධාරීන්ට ඇමෙරිකාව පැන වූ සම්බාධක අසමත් වන බව පෙන්වීමට පියවර ගන්නා බව ඉරාන ජනාධිපති හසන් රොව්හානි අද (28) පැවැසීය.  

ඉරාන පාර්ලිමේන්තුවේදී විශේෂ ප්‍රකාශයක් කරමින් ජනාධිපති හසන් රොව්හානී ඒ බව පැවැසීය. ඇමෙරිකා එක්සත් ජනපදය පැනවූ නව ආර්ථික සම්බාධකවලට මුහුණ දෙන්නේ කෙසේ දැයි යන ප්‍රශ්නවලට පිළිතුරු දීම සඳහා පාර්ලිමේන්තුවට පැමිණි අවස්ථාවේදී ඉරාන ජනාධිපතිවරයා එම කරුණු සඳහන් කළේය. 

ඉරාන ජනාධිපතිවරයා පාර්ලිමේන්තුවේදී කරන ලද කතාව සජීවීව විකාශය කරන ලද අතර ඔහු එහිදි ඇමෙරිකා එක්සත් ජනපදය දැඩිව විවේචනය කළේය. 

“ආර්ථික අර්බුද බරපතලයි. බොහෝ පිරිසක් ඉරානයේ අනාගතය කෙරෙහි තබා ඇති විශ්වාසය අහිමි කරගෙන. ඔවුන්ට ඉරානයේ බලය පිළිබඳ දෙගිඩියාවක් ඇවිත්. එය සියල්ලටම වැදගත්” යැයි ද ඉරාන ජනාධිපතිවරයා එහිදි කීය.  

“අපි ඇමෙරිකාවට හෝ ආර්ථික අර්බුදවලට බය නැහැ. අපි මේ සෑම ප්‍රශ්නයක්ම විසඳගන්නවා” හෙතෙම කීය. 

රොයිටර්ස්