ඇමෙරිකාවෙන් වෙනිසියුලාව වෙත යවන ලද මානුෂීය ආධාර රැගත් ප්‍රථම ලොරි රථ පෙළ කොළොම්බියා දේශසීමාවේ කුකුටා නගරය වෙත ළඟා වී ඇතැයි වාර්තා වේ. 

වෙනිසියුලාවේ යුරේනා නගරයට ඇතුළු වන ස්ථානයේ ඇති ටියෙන්ඩිටාස් පාලම අසල ලොරි රථ නවතා තිබෙන අතර ජනපති මදුරෝට සහාය දක්වන වෙනිසියුලා හමුදාව මාර්ගය අවහිර කර ඇති බව මාධ්‍ය වාර්තා කර ඇත.

ආධාර රැගත් රථ වෙනිසියුලාවට ඇතුළුවීම ජනපති නිකොලොස් මදුරෝ විසින් ප්‍රතික්ෂේප කර ඇති බැවින් මෙලෙස රැඳී සිටීමට සිදුවී ඇතැයි පැවසේ. මෙම ආධාර ලබාගැනීම මගින් තමා බලයෙන් පහකිරීමට ඇමරිකානු හමුදාවට මගපෑදෙනු ඇතැයි ජනපති මදුරෝ මහතා පවසා ඇත.

"කිසිම කෙනෙකුට ඇතුල් වෙන්න දෙන්නේ නැහැ, එකම භටයකුටවත් ආක්‍රමණය කරන්න ඉඩ දෙන්නේ නැහැ" යැයි මදුරෝ මහතා පැවසීය.

වෙනිසියුලාවේ තාවකාලික ජනාධිපතිවරයා තමා බව පසුගියදා ප්‍රකාශයට පත් කල විපක්ෂ නායක ජුවාන් ග්වායිඩෝ අනතුරු අඟවමින් සඳහන් කර ඇත්තේ ජාත්‍යන්තර ආධාර අහිමිවුවහොත් තම රටේ ජනතාව ඉතාමත් අවදානම් තත්ත්වයකට පත්වනු ඇති බවයි.

විපක්ෂ නායකයාට ඇමරිකාව, යුරෝපය හා ලතින් ඇමෙරිකානු රටවල් බොහොමයක් සහාය දක්වන අතර ජනපති මදුරෝට සහාය දක්වන්නේ චීනය හා රුසියාව පමණකි.

වෙනිසියුලාවේ වසර ගනනාවක සිට පවතින ආර්ථික අර්බුදය හේතුවෙන් මිලියන ගනනක ජනතාව ආහාර හා ඖෂධ නොමැතිව පීඩා විඳිති.

 

(බීබීසී ඇසුරිණි - 085)