ජපානයේ කියතෝ හි පිහිටි සජීවීකරණ නිෂ්පාදන සමාගමකට අයත් ගොඩනැගිල්ලක අද (18) ඇති වූ ගින්නකින් 33 දෙනෙකු මියගොස් තවත් පිරිසක් තුවාල ලැබූහ.

කිසිවකු විසින් වුවමනාවෙන් කරන ලද ගිනි තැබීමකින් ගින්න ඇති ව ඇති නමුත් අද පස්වරුව වනතුරුත් කිසිදු තොරතුරක් නොලැබුණු බව කියතෝ පොලිසිය සඳහන් කළේය.  

මියගිය සංඛ්‍යාව තවදුරටත් වැඩිවිය හැකි යැයි ද සෝදිසි මෙහෙයුම් අතරතුරදී ද මළසිරුරු හමු වූ බව ද කියතෝ ගිනි නිවීම් දෙපාර්තමේන්තුවේ නිලධාරීහු කීහ.

අද සවස්වරුව වනවිට ලැබී තිබූ තොරතුරුවලට අනුව ගින්නෙන් පිළිස්සුම් තුවාල ලැබූ 35 දෙනකු රෝහල් ගත කර තිබූ බවත් ඔවුන්ගෙන් 10 දෙනකුගේ තත්ත්වය බරපතළ බවත් බලධාරීහු ප්‍රකාශ කළහ.

ගින්න ඇති වූ අවස්ථාවේදී ගොඩනැගිල්ලේ 70කට ආසන්න පිරිසක් සිටි බව ද වාර්තා විය.

ජපාන අගමැති ෂින්සෝ අබේ ද මෙම සිදුවීම සම්බන්ධයෙන් ට්විටර් සමාජ ජාලය ඔස්සේ සිය කනගාටුව පළ කළේය.

“පුද්ගලයකු යම් දියරක් විසි කරලා ඊට ගිනි තැබුවා” යැයි කියතෝ පොලිසියේ ප්‍රකාශකයෙක් ප්‍රංශ පුවත් සේවයට පැවැසීය.

මෙම සිදුවීම සම්බන්ධයෙන් පුද්ගලයකු පොලිස් අත්අඩංගුවට පත්ව ඇති බවත් ප්‍රතිකාර සඳහා ඔහු රෝහල් ගත කළ බවත් තවත් වාර්තාවක් දැක්විණි.

ඒ.එෆ්.පී. ඇසුරිනි 

055