මලයාසියාවේ ක්වාලාලම්පූර් නුවර ඉස්ලාම් ආගමික පාසලක ඇතිවූ ගින්නකින් සිසුන් 23දෙනකු සහ ගුරුවරුන් දෙදෙනකු මියගොස් ඇත.

ශ්වසන ආබාධ වලින් පෙලුණු තවත් දරුවන් පිරිසක් රෝහල් ගත කළ බවත් මියගොස් ඇත්ත‍ේ අවුරුදු 13ත් 17ත් අතර වයසේ පිරිමි දරුවන් බවත් පොලිසිය පවසයි.

මහල් දෙකකින් යුත් ගොඩනැගිල්ලේ දෙවන මහලේ ගින්න ආරම්භ වී ඇති බවත් එම අවස්ථාවේ දරුවන් නින්දේ පසුවන්නට ඇති බවත් පැවසේ.

කුරානය ඉගෙන ගැනීම සඳහා දරුවන් මෙම පාසලට ඇතුලත් වන අතර ඔවුන් මෙහි පාසලේ නේවාසිකව අධ්‍යයනය කටයුතු වල නිරත වන බව වාර්තා වී ඇත.

ගිනිනිවීම් හා හදිසි මෙහෙයුම් ඒකකයේ ප්‍රධානියා පවසන්නේ ගින්න වාර්තා වූ සැනින් අදාල ස්ථානයට ලඟා වූ බවයි. කෙසේ වුවුද ගින්න මැඩ පැවැත්වීම සඳහා පැයක පමණ කාලයක් ගතවී ඇත. 

මලයාසියාවේ පසුගිය වසර 20ක කාලය තුළ ගින්නකින් සිදුවූ දරුණුම අනතුර මෙය බව බලධාරීහු පවසති.

(ද ගාඩියන් ඇසුරිණි - 085)