(ඩයනා උදයංගනී)

ජනාධිපතිවරණයේදී ශ්‍රී ලංකා නිදහස් පක්‍ෂය ගන්නා තීන්දුව එළඹෙන සැප්තැම්බර් 3 වැනිදා පැවැත්වෙන පක්‍ෂයේ 68 වැනි සංවත්සර උළෙලේ දී ප‍්‍රකාශයට පත්කරන බව එක්සත් ජනතා නිදහස් සන්ධානයේ මහලේකම්, පාර්ලිමේන්තු මන්ත‍්‍රී මහින්ද අමරවීර මහතා පැවසීය.

රට සංවර්ධනය කරමින් ඉදිරියට ගෙන යා හැකි වැඩපිළිවෙළක් පක්‍ෂය මගින් සකස් කර ඇතැයි කී මහලේකම්වරයා එයට සහය දෙන අපේක්‍ෂකයකුට සහය ලබාදෙන බවද සඳහන් කළේය.

මේ සම්බන්ධයෙන් දැනට ශ්‍රී ලංකා පොදුජන පෙරමුණ සමඟ සාකච්ඡා කරගෙන යන බව කී මන්ත‍්‍රීවරයා මෙහිදී ශ්‍රී ලංකා නිදහස් පක්‍ෂය තවත් පක්‍ෂයක් තුළ දියවීමට ඉඩ නොතබන බව ද කීවේය.

මහින්ද අමරවීර මහතා මේ බව පැවසුවේ කොළඹ, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද (15) පැවති මාධ්‍ය හමුවක් අමතමිනි.

ශ්‍රී ලංකා නිදහස් පක්‍ෂයේ 68 වැනි සංවත්සර සමුළුව සුගතදාස ගෘහස්ත ක‍්‍රීඩාංගණයේදී සැප්තැම්බර් 3 වැනිදා පැවැත්වෙන අතර පක්‍ෂයේ ඉදිරි වැඩපිළිවෙල සම්බන්ධයෙන් එහිදී ජනාධිපතිවරයා අදහස් දක්වන බව ද මහලේකම්වරයා කීවේය.

ශ්‍රී.ල.නි.පයට වැදගත් වන්නේ අපෙක්‍ෂකයා කවුරුන්ද යන්න නොව වැඩපිළිවෙලට එකඟවන්නේ කවුරුන්ද යන්න යැයි කී අමරවීර මහතා සියල්ල කරන්නේ පක්‍ෂ අනන්‍යතාව ආරක්‍ෂා කරගනිමින් බව ද පැවසීය.

 ‘පක්‍ෂ ව්‍යවස්ථාවට අනුව වෙනත් පක්‍ෂයක නායකත්වය ගත් මහින්ද රාජපක්‍ෂ මහතාගේ පක්‍ෂ සාමාජිකත්වය අහිමි වෙන්නේ නැද්ද? එතුමාට විපක්‍ෂනායකධූරය දැරිය හැකිද?’ යනුවෙන් මෙහිදී මාධ්‍යවේදියකු නැගූ පැනයකට පිළිතුරු දුන් මහින්ද අමරවීර මහතා පැවසුවේ එතුමාගේ පක්‍ෂ සාමාජිකත්වය අහිමිවීම මෙන්ම විපක්‍ෂනායක ධූරය සම්බන්ධයෙන් ද ප‍්‍රශ්නයක් මතුවන නමුත් දෙපාර්ශවය අතර සාකච්ඡාවලට බාධාවන ආකාරයේ තීන්දුවක් තම පක්‍ෂය මේ අවස්ථාවේදී නොගත යුතු බවයි.

එය තමාගේ පෞද්ගලික මතය බව කී අමරවීර මහතා අවසන් තීරණයක් ගතයුත්තේ පක්‍ෂ මධ්‍යම කාරක සභාව බවත් එය ලබන සතියේ රැස්වන බවත් සඳහන් කළේය.

නිදහස් පක්‍ෂය මගින් ජනාධිපතිධූරය ඇතුළු බොහෝ දේ ලබා ගත් මහින්ද රාජපක්‍ෂ මහතා වෙනත් පක්‍ෂයක සාමාජිකයකුවීම ගැන ගණගාටුවක් තිබෙන බව ද මහලේකම්වරයා කීවේය.

ගෝඨාභය රාජපක්‍ෂ මහතාට සහය දීමේ තීන්දුවක් ශ්‍රී ලංකා නිදහස් පක්‍ෂ මධ්‍යම කාරක සභාව මෙතෙක් ගෙන නැතැයි කී මන්ත‍්‍රීවරයා මධ්‍යම කාරක සභාව දැනට තීරණය කර ඇත්තේ පක්‍ෂයෙන් ජනාධිපති අපේක්‍ෂකයෙක් ඉදිරිපත් කළ යුතු බව යැයි ද ප‍්‍රකාශ කළේය.