(අජන්ත කුමාර අගලකඩ)
ලබන දෙසැම්බර් මාසයේ පැවැත්වීමට නියමිත ජනාධිපතිවරණයට පෙර යම් හෙයකින් පළාත් සභා මැතිවරණය පැවැත්වුවහොත් ඒ සඳහා තරග කිරීමට ප්‍රධාන දේශපාලන පක්ෂ සියල්ලම පාහේ දැන් සිටම සූදානම් වෙමින් සිටින බව වාර්තාවේ.
ඒ අනුව ජනාධිපතිවරණයට සූදානම් වන අතරතුරම පළාත් සභා මැතිවරණයට ද සූදානම් වන්නැයි එම දේශපාලන පක්ෂවල නායකයින් ආසන සංවිධායකවරුන්ට හා පළාත් සභාවල හිටපු මන්ත්‍රීවරුන්ට දැනුම් දී ඇති බව දේශපාලන ආරංචිමාර්ග සඳහන් කරයි.
දැනට කල්දමා ඇති පළාත් සභා මැතිවරණය පැරැණි මනාප ක්‍රමයට පැවැත්විය හැකි දැයි ජනාධිපති මෛත්‍රීපාල සිරිසේන මහතා ශ්‍රේෂ්ඨාධිකරණයෙන් මත විසීමක් කර ඇත.
ඒ අනුව ශ්‍රේෂ්ඨාධිකරණයේ මතය ලබන 30 වැනිදාට පෙර තමා වෙත දැනුම් දෙන්නැයි ජනාධිපතිවරයා ශ්‍රේෂ්ඨාධිකරණය වෙත දන්වා යවා ඇති අතර එය ලබන සිකුරාදා (23) විභාගයට ගැනීමට ශ්‍රේෂ්ඨාධිකරණය විසින් පංච පුද්ගල විනිසුරු මඩුල්ලක් ද පත් කරනු ලැබ ඇත.
පළාත් සභා මැතිවරණය ජනාධිපතිවරණයට පෙර පැවැත්වෙන්නේ ද නැද්ද යන්න ශ්‍රේෂ්ඨාධිකරණයෙ මතය අනුව තීරණය වනු ඇත.
කෙසේ වෙතත් පළාත් සභා මැතිවරණයකට ද සූදානම් වන්නැයි ශ්‍රී ලංකා නිදහස් පක්ෂය එක්සත් ජාතික පක්ෂය, ශ්‍රී ලංකා පොදු ජන පෙරමුණ, ජනතා විමුක්ති පෙරමුණ, දෙමළ ජාතික සන්ධානය, ශ්‍රී ලංකා මුස්ලිම් කොංග්‍රසය ඇතුළු ප්‍රධාන දේශපාලන පක්ෂ සියල්ලම පාහේ සිය සංවිධායකවරුන්ට නොනිල මට්ටමින් දැනුම් දී ඇත.
ඌව පළාත් සභාව හැර අනෙකුත් පළාත් සභා අටේම නිල කාලය මේ වනවිට අවසන්වී ඇත.
