(අජන්ත කුමාර අගලකඩ)
අය වැය සහ මහජන නියෝජිතයන්ගේ පාර්ලිමේන්තු වගකීම් පිළිබඳව ඒකාබද්ධ විපක්ෂයේ මන්ත්‍රීවරුන් දැනුවත් කිරීමේ අරමුණින් විපක්ෂනායක මහින්ද රාජපක්ෂ මහතාගේ ප්‍රධානත්වයෙන් බත්තරමුල්ල වෝටර්ස් එජ්හිදී අද (10) දවස පුරා පැවැත්වීමට නියමිත වැඩමුළුවට ශ්‍රීලනිප මන්ත්‍රීවරුන් සහභාගි නොවීමට ඉඩ ඇතැයි වාර්තා වේ.
මෙයට පෙර වාර්තා වූයේ මෙම වැඩමුළුවට ශ්‍රීලනිප - පොහොට්ටු දෙපිරිසම සහභාගි වනු ඇති බවය. එහිදී මෙවර අය වැය සම්බන්ධයෙන් හිටපු මහ බැංකු අධිපති අජිත් නිවාඩ් කබ්රාල්, ආචාර්ය නාලක ගොඩහේවා සහ මහාචාර්ය රංජිත් බණ්ඩාර යන මහත්වරුන් විසින් දේශන පැවැත්වීමට නියමිත අතර හිටපු කතානායක විජමු ලොකුබණ්ඩාර මහතා මහජන නියෝජිතයින්ගේ වගකීම් පිළිබඳ විශේෂ දේශනයක් පැවැත්වීමට නියමිතව ඇත. මෙම වැඩමුළුව මුලදී මහනුවරදී පැවැත්වීමට නියමිතව තිබුණ ද පසුව එය වෝටර්ස් එජ්හිදී පැවැත්වීමට තීරණය කර ඇත.
