ලෝකෙන් ටිකක්
වර්ෂ 1631 ඔක්තෝබර් මස මෙක්සිකෝවේ වෙරකෘස් වරායෙන් පිටත් වූ ජන්කාල් නමැති ස්පාඤ්ඤ නැව, ටොන් 120 - 150 තරම් බරකින් යුත් රන්, රිදී සහ වටිනා ගල් වර්ග ස්පාඤ්ඤයට රැගෙන යාම සඳහා පිටත් වූ නමුදු කැරිබියානු මුහුදේ කුණාටුවකට හසුවීමෙන් දියේ ගිලී ගියේ, එහි රැගෙන ගිය සම්පත මුහුදු පතුලේ සඟවා ගනිමිනි.
මීට වසර 400කට පමණ පෙර ගිලී ගිය ජන්කාල් නැව ස්පාඤ්ඤයට හෝ මෙක්සිකෝවට අමතක නොවෙන්නේ එහි තිබෙන පවුම් බිලියන ගණනක් වටිනා වස්තු ප්‍රමාණය නිසාමය. ස්පාඤ්ඤ රන් කාසි, රිදී පොලු සහ වටිනා ගල් වර්ග හැරුණු විට එකල දුර්ලභ සම්පතක් ලෙස සැලකුණු චොකලට් (කොකෝවා), නොයෙක් ඩයි වර්ග, මිලාධික ඇඳුම් වර්ග සහ දැව වර්ග ආදියෙන් නැව පිරී තිබිණ.
මෙතරම් කාලයකට පසුව වුවත් වස්තුව රැගත් ගිලුණු නැව් සොයා ගැනීමට ස්පාඤ්ඤය හා මෙක්සිකෝව හවුල් සහයෝගීතාවක් අත්සන් කර තිබේ. මෙක්සිකෝවේ සිට වස්තුව රැගත් නැව් 300කට අධික ප්‍රමාණයක් මුහ්‍රදේ ගිලී ගොස් තිබෙන බැවින්ද, අද වෙන විට ඒවායේ වටිනාකම ඉතා ඉහළ බැවින් ද නැතිවූ වස්තුව සොයන්නට එම දෙරට කටයුතු කරමින් සිටිති. ඒවා අද කොතෙක් වටින්නේද යැයි කිවහොත් වස්තුව සොයා කිමිදෙන සමාගම්වල කිමිදුම්කරුවන් යොදාගැනීම වෙනුවට මෙම ව්‍යාපෘතිය සඳහාම කිමිදුම්කරුවන් පුහුණු කිරීමට ද මේ දෙරට කැමැත්තෙන් සිටිති.
ටොන් 669ක් බර වූ නැවට ලෝකඩ සහ වානේ කාලතුවක්කු කිහිපයක්ද පටවා තිබුණේ ස්පාඤ්ඤය ඕලන්දය සමඟ පැවති යුද්ධය නිසා නැව් හිඟවීම හේතුවෙනි. වටිනා වස්තුව ප්‍රවාහනය කරන්නට තරම් සවිමත් හා ආරක්ෂිත නැවක් නොවුනද, වෙනත් විකල්පයක් නොතිබූ බැවින් ජන්කාල් නැව මහා වස්තු සම්භාරයක් රැගෙන මෙක්සිකෝවෙන් පිටත් විය.
එය පිටත් වීමට දෙදිනකට පෙර නැවේ කපිතාන් මියගිය අතර ඉන්පසු නැව භාරගත්තේ ඔහුගේ දෙවැනි නිලධාරියා විසිනි. වෙනත් නැවක් සොයාගැනීමේ අපහසුව නිසා, කුණාටු බහුල කැරිබියන් සාගරයේ යාත්‍රා කිරීම හැර ජන්කාල් නැවට වෙනත් විකල්පයක් නොතිබිණි.
ජන්කාල් නැවෙන් රැගෙන ගිය රන් රිදී ආදිය වෙන් කර තිබුණේ ස්පාඤ්ඤය හා ඕලන්දය අතර යුද වැදුණු භටයන්ට පඩි ගෙවීම පිණිස ය. එබැවින් නැවේ රැගෙන ගිය හැම කාසියක්ම පාහේ වාර්තා කර තිබිණි. නැව කුණාටුවට හසුවීම, ගිලීම ආදිය සිදුවූ ආකාරය අනතුරෙන් දිවි බේරාගත් අයගේ ප්‍රකාශ ඇසුරින් වාර්තා වී තිබෙන අතර, නැවෙන් ගෙන ගිය වස්තු සම්භාරයේ වටිනාකම නිසා එම තොරතුරු නිසි ලෙස ආරක්ෂා කර තිබිණි.
ස්පාඤ්ඤය හා මෙක්සිකෝව යන දෙරට මෙම සෙවුම් යාන්ත්‍රණය දියත් කරන්නට යන්නේ නැවේ සේවය කළවුන් හා අනතුරෙන් දිවි ගලවාගත් අයගේ ප්‍රකාශ පදනම් කරගෙන බැවින් නැව හරියටම තිබෙන්නේ කොහේ දැයි ඔවුහු දනිති.
එම වස්තු සම්භාරය සොයා ගැනීමට හැකි වුවහොත්, මුහුදු කොල්ලකරුවන් හා කුණාටු නිසා ජන්කාල් නැව ගිලුණු කාලයට ආසන්න කාලයේ ගිලී ගිය තවත් නැව් හා වස්තු සොයා කිමිදුම්කරුවන් කැරිබියානු සාගරය පීරනු ඇත.
අන්තර්ජාලය ඇසුරිනි.
නිසංසලා දිසානායක
