ජෝර්දානයේ වැරදුණු කුරුමානම


ඉතිහාසය වෙනස් කළ රහසිගත මොසාඩ් මෙහෙයුම්

 

 

කළු පැහැ ජීප් රියකින් පිටතට පිනූ පුංචි දැරිවියක ‘‘තාත්තේ.....තාත්තේ’’ යැයි කෑගසමින්, ජොර්දානයේ අම්මාන් නගරයේ පිහිටි උසැති ගොඩනැගිල්ලකට ඇතුළු වෙමින් සිටි පුද්ගලයෙක් පසුපස දිව ගියාය. ඒ දැරිවියගේ කෑගැසීමට මොසාඩ් මෙහෙයුමක් අසාර්ථක කරන්නට හැකිවිය. 


ඉතා සැලකිල්ලෙන් සැලසුම් කර තිබුණු මෙහෙයුම සාර්ථක වෙන්නට වැඩි ඉඩක් තිබිණි. එහි අරමුණ වූයේ හමාස් දේශපාලන කාර්යංශයට අලු‍‍තින් පත් වූ නායකයා කාලිඩ් මෂාල් ඝාතනය කිරීමයි. අවුරුදු 41ක් වයසැති මෂාල් ඉතා කඩවසම් හාදයෙකි. පරිගණක ඉංජිනේරුවෙක් වූ හෙතෙම ඊශ්‍රායලයේ දරුණුම සතුරෙක් වූ හමාස් සංවිධානය තුළ තනතුරුවලින් ඉහළට නැගෙමින් ද සිටියේය. 


ඉස්ලාමික අන්තවාදයෙන් පෝෂණය වූ මෙම ත්‍රස්තවාදී සංවිධානය පලස්තීන විමුක්ති සංවිධානයේ තැන ගනිමින් පැවතියේය. පලස්තීන විමුක්ති සංවිධානය කඩාවැටුණේ යසර් අර්ෆත් සහ යිට්සාක් රාබින් යන දෙදෙනාගේ එකඟත්වයෙන් 1993 සැප්තැම්බරයේදී ඔස්ලෝ සාම ගිවිසුම අත්සන් කිරීම නිසා ය. 


1997 ජූලි 30 වෙනි දා ජෙරුසලමේ සිදුවූ මරාගෙන මැරෙන ත්‍රස්තවාදීන් දෙදෙනෙක් ජනාකීර්ණ මහානි - යෙහුඩා වෙළෙඳපොළේදී බෝම්බ පුපුරවාගැනීම නිසා ඊශ්‍රායල ජාතිකයන් 16 දෙනෙක් මිය ගිය අතර තවත් 169ක් ප්‍රහාරයෙන් තුවාල ලැබූහ. මෙම පිපිරීමෙන් පසු මොසාඩ් සංවිධානයේ ඉහළ නිලධාරීන් ඝාතන ඉලක්කයක් වශයෙන් මෂාල් තෝරාගෙන සිටියෝය.‘ අගමැති බෙන්ජමින් නෙතන්යාහු හදිසි කැබිනට් සාකච්ඡාවක් කැඳවා හමාස් නායකයන්ගෙන් අයෙක් ඝාතනය කිරීම ගැන කතිකා කරගත්හ. මිය යා යුත්තේ කවුදැයි තේරීම 1996දී රැම්සාඩ් තනතුරට පත් වූ ජෙනරාල් ඩැනී යාටොම් හට භාරදෙන ලදී.


උපතින්ම සටන්කරුවෙක් වූ, දීර්ඝ හමුදා සේවයක යෙදී සිටි අයෙක් වූ ‘යාටොම්, සියරෙට් මැට්කැල් හි හිටපු නියෝජ්‍ය අණදෙන නිලධාරියෙක් වූ අතර, ‘ඊශ්‍රායල මධ්‍යම ඒකකයේ මේජර් ජෙනරාල්වරයෙක් ලෙස ද සේවය කළේය. අගමැති යිට්සාක් රාබින්ගේ හමුදා ලේකම්වරයා වූ යාටොම් මුළු හදවතින්ම රාබින් හට සේවය කිරීම සඳහා කැපවී සිටියේය. 
රාබින්ගේ මරණයෙන් පසු ඔහු රැම්සාඩ් ලෙස පත් කරන ලදී. ඔහු ගැන දැන සිටි සියල්ලෝ ඔහුගේ කාර්යශූරත්වය හා හමුදා වාර්තා ගැන අගය කළ ද, ඔහු රැම්සාඩ් ලෙස පත් කර තිබීම ගැන පුදුම වූහ. මන්ද එවැනි ප්‍රබල රහස් සංවිධානයක ප්‍රධානියෙක් වෙන්නට ඇවැසි සියලු‍‍ ගතිගුණ ඔහු වෙත නොවුණු බැවිනි. ඔහු ඒ තනතුරට තෝරා ගැනුණේ මියගිය රාබින් වෙනුවෙන් කෘතගුණ දැක්වීමක් වශයෙන් මිස, වැඩට සුදුසුම තැනැත්තා වශයෙන් නොවේ. 

1997 අගෝස්තු මස මුල් භාගයේදී නෙතන්යාහු සමඟ රැස්වීමක් පැවැත්වීමෙන් පසු ටෙල් අවිව්හි මොසාඩ් මූලස්ථානයේදී ඔහු හදිසි රැස්වීමක් කැඳවීය. මොසාඩ් සංවිධානයේ වැදගත් දෙපාර්තමේන්තු හැමෙකකම පාහේ ප්‍රධානියෝ ඒ සඳහා සහභාගී වූහ. යාටොම්ගේ නියෝජ්‍ය නිලධාරී අලිසා මාගෙන්, සිසරියාහි විශේෂ මෙහෙයුම් දෙපාර්තමේන්තුවේ නායකයා,‘ විදෙස් බුද්ධි සේවා සමඟ ගනුදෙනු කළ ටෙවෙල් දෙපාර්තමේන්තුවේ ප්‍රධානී යිට්සාක් බාර්සිලායි, බුද්ධි තොරතුරු එකතු කිරීමේ දෙපාර්තමේන්තුව වූ සොමෙට්‘ හි නායකයා ඉලාන් මිස්රාහි, සතුරු ඉලක්ක වෙත යාමේ විශේෂ හැකියාවෙන් යුත් කණ්ඩායම වූ නෙවියොට් හි නායක මෙන්ම පර්​ෙ‌ය්ෂණ සහ ත්‍රස්ත දෙපාර්තමේන්තුවේ නායකයෝ ද මෙම සාකච්ඡාවට සම්බන්ධ වූහ. 


එහෙත් අවසන් විසඳුමකින් තොරවම සාකච්ඡා අවසන් විය. එයට හේතුව වූයේ හමාස් සංවිධානයේ නායකයන් සියලු‍‍ දෙනාගේම නම් ඔවුන් නොදැන සිටීමයි. ඔවුනතරින් වැදගත්ම නායකයා වූයේ මූසා මොහොම්මඩ් අබු මර්සූක්ය. එහෙත් ඔහු ඇමරිකානු ගමන් බලපත්‍රයක් හිමි අයෙක් වූ බැවින් ඇමරිකාව සමඟ ප්‍රශ්න ඇති වේ යැයි බිය නිසා ඔහු ඉක්මන් ඉලක්කයක් නොවීය. 


අනෙක් අතට හොඳම ඉලක්කය ලෙස සැලකුණේ කාලිඩ් මෂාල් ය. නමුත් ඔහුගේ කාර්යාලය පිහිටියේ ජෝර්දානයේ අම්මාන් නගරයේය. ජෝර්දානය සමඟ සාම සම්මුතියකට අත්සන් කිරීමෙන් පසු එරටදී කිසිදු මෙහෙයුමක් කිරීම රාබින් විසින් තහනම් කර තිබිණි. යාටොම්, රාබින්ගේ හමුදා ලේකම් ලෙස සේවය කළ කාලයේ රාබින්ගේ නීති රීති ඔහු අකුරට ක්‍රියාත්මක කළ නමුදු, රැම්සාඩ් බවට පත්වීමෙන් පසු එම උපදෙස් නොතකා හරින්නට තීරණය කර, ‘මෂාල් ගැන අගමැති නෙතන්යාහු හට දැනුම් දීමට තීරණය කළේය. ඒ තීරණයට සිසරියා හි ප්‍රධානියා මෙන්ම ඔහුගේ බුද්ධි නිලධාරියා මීෂ්කා බෙන් - ඩේවිඩ්ගේ අනුමැතිය ලැබිණි. 


යාටොම්ගේ තෝරගැනීමට නෙතන්යාහුගේ කැමැත්ත පළවූ නමුත් ජෝර්දානය කෝප ගන්වා නොගැනීමට පරිස්සම් වෙන්නැයි උපදෙස් ලැබිණි. ඒ අනුව නිහඬ මෙහෙයුමකට අනුමැතිය හිමි විය. 


සිසරියා හි උසස්ම ඒකකය වූ කිඩෝන් කණ්ඩායමට මෙහෙයුම භාර විය. මොසාඩ් පර්යේෂණ දෙපාර්තමේන්තුවේ සේවය කළ, ජෛව රසායන විද්‍යාව පිළිබඳ ආචාර්යවරයෙක්, නෙස් සයෝනා හි ජීව විද්‍යා ආයතනයකින් වැඩි දියුණු කළ මාරාන්තික විසක් යොදාගෙන ඝාතනය කරන්නට යෝජනා කළේය. එම විස බිංදු කිහිපයක් මිනිස් සමෙහි ස්පර්ශ වූ විට නිසැක මරණය සිදුවේ. මීට පෙර වාඩි හඩාඩ් හට චොකලට් සමඟ කැවූයේ ද, පලස්තීන විමුක්ති පෙරමුණු නායකයා ඝාතනයට යොදාගත්තේ ද මීට සමාන විසකි. 
1997 ගිම්හානයේදී ටෙල් අවිව් නගරයේ වීදියක සිටි තරුණයෝ දෙදෙනෙක් කොකා කෝලා කෑන් අත තබාගෙන ඒවා සොලවා, පසුව විවර කරන ලදී. හඬක් නගමින් විවර වූ කෝලා දියර හැම තැනම විසිරෙන්නට විය. එය දුටු අය තරුණයන් දෙදෙනා දෙස නොපහන් බැල්මක් හෙළා තමන්ගේ පාඩුවේ යන්නට ගියහ. 

 

 


මොසාඩ් නිලධාරීන් වූ මේ‘ නොසැලකිලිමත් තරුණයන් දෙදෙනා කළේ ත්‍රස්තවාදී මෂාල් ඝාතනයේ පෙර පුහුණුව බව ඒ කිසිවෙක් දැන නොසිටියහ. සැලසුම වූයේ අයෙක් ඔහුගේ අවධානය දිනාගැනීම පිණිස කෝලා කෑන් එකක් විවර කරන අතර අනෙකා පිටුපසින් ගොස් මෂාල්ගේ ගෙල පිටුපස කොටසක මාරාන්තික විස බිංදු හැලීමයි. 
මෙහෙයුමට සති හයකට පෙර පළමු නිලධාරී කණ්ඩායම ජෝර්දානය වෙත ළඟා වූහ. ව්‍යාජ විදෙස් ගමන් බලපත්‍ර සහිතව එහි ගිය ඔවුහු මෂාල්ගේ දිනපතා චර්යාව අධ්‍යයනය කරන්නටත්, ඔහු පසුපස ගොස් රහසේ ඔත්තු බලන්නටත් වූහ. ඔහු උදෑසන නිවසෙන් පිටත් වෙන්නේ කීයටද? ඔහු සමඟ කාරයේ ගමන් ගන්නේ කවුද? ඔහු යන්නේ කුමන මාර්ගයෙන් ද සහ ඔහු යන්නේ කොතැනකටද, ඔහු ගමන් කරන අවස්ථාවේ මාර්ගයේ තදබදය කෙබඳුද? වාහනයෙන් බැසීමෙන් පසු ගොඩනැගිල්ලට ඇතුළු වීමට පෙර කොපමණ වෙලාවක් ගතවන්නේද, ගොඩනැගිල්ලට ඇතුළු වන්නට පෙර ඔහු අනෙක් අය සමඟ කතා බස් කරනවාද ආදී මෙහෙයුමට වැදගත් විය හැකි එකී නොකී හැම දේම ඔවුන්ගේ සූක්ෂ්ම නිරීක්ෂණයට ලක් විය. 


පළමු නිරීක්ෂණ කණ්ඩායමේ වාර්තාව කිඩෝන් මූලස්ථානයට ළඟා විය. එහි කියැවුණු පරිදි, මෂාල් හැම උදයකම කිසිම ආරක්ෂකයෙක් නැතිව තනිවම ගොස්, රියැදුරෙක් රැඳී සිටින කළු පැහැ එස් යූ වී රථයට නගියි. ඉන්පසු අම්මානයේ ෂමියා සෙන්ටර් ගොඩනැගිල්ල ආසන්නයෙන් රථයෙන් බැස ගනී. රියැදුරා වාහනය හරවාගෙන යන අතර ඔහු තනිවම කෙටි දුරක් ඇවිද ගොස් ෂමියා සෙන්ටර් ගොඩනැගිල්ලේ පිහිටා තිබෙන පලස්තීන සහන කාර්යාංශයට ඇතුළු වෙයි. මෙම පලස්තීන සහන කාර්යාංශය යන ව්‍යාජ නමින් පවත්වාගෙන ගියේ අම්මාන් නගරයේ වූ හමාස් මූලස්ථානයයි. 


මෂාල් හට පහර දිය හැකි හොඳම වෙලාව උදෑසන කාරයෙන් බැස ගොඩනැගිල්ලට ඇතුළු වෙන කාලය බව ද ඒ කණ්ඩායම දන්වා තිබිණි. ගිම්හානය මුළුල්ලේම මෙහෙයුම සඳහා අවශ්‍ය දේ සූදානම් කෙරිණි. 


මේ අතරවාරයේ ජෙරුසලමේදී තවත් ත්‍රස්ත ප්‍රහාරයක් සිදුවූ අතර බෙන් යෙහුඩා වීදියේ දී හමාස් ත්‍රස්තයන් තිදෙනෙක් මරාගෙන මැරෙන බෝම්බ පුපුරා ගත්හ. එයින් ඊශ්‍රායල ජාතිකයන් පස් දෙනෙක් මිය ගිය අතර 181 දෙනෙක් තුවාල ලැබූහ. ඊශ්‍රායලයට තවදුරටත් බලා සිටින්නට නොහැකිය. දැන් දැන්ම ක්‍රියාත්මක වී ඔවුන් නැවැත්විය යුතුය.
1997 සැප්තැම්බර් 24 වෙනි දා, එනම් මෙහෙයුමට දවසකට පෙර, ජෝර්දානයේ සුවිසල් හෝටලයක තටාකය අසල විදෙස් ජාතිකයන් කිහිප දෙනෙක් කැරකෙමින් සිටින්නට වූහ. එක් තැනැත්තෙක් සුදු පැහැති නාන කබායක් ඇඟලා සිටින්නේ, හෝටලයේ සේවකයනට ඇඟවූයේ දැඩි සේ රෝගීව සිටින බවය. ඔහු ඇවිද්දේ ද ඉතා සෙමිනි. හෘදයාබාධයකින් සුවය ලබමින් සිටින ඔහු අසලම තරුණ වෛද්‍යවරිය ද සිටියි. පැය කිහිපයකට වරක් ඇය ඔහුගේ නාඩි සහ රුධිර පීඩනය මැන බලන්නීය. 
එම හෘද රෝගියා යනු මොසාඩ් සංවිධානය හා මෙහෙයුම් නිලධාරීන් අතර සන්නිවේදනය භාරව සිටි මීෂ්කා - බෙන් ඩේවිඩ් ය. ඔහු සමඟ සිටින තරුණිය සැබැවින්ම වෛද්‍යවරියකි. මෂාල් ඝාතනයට යොදාගන්නා විස සමනය කළ හැකි ප්‍රතිවිස තිබෙන්නේ ඈ ළඟයි. යම් හෙයකින් මෙහෙයුමට සම්බන්ධ කිඩෝන් නිලධාරීන් හට අහම්බයෙන් හෝ විස ශරීරගත වුවහොත් ඔවුන් බේරා ගත හැකිවන්නේ මේ ප්‍රතිවිසට පමණි. 

වංචාකාර රෝගියා සහ ඔහුගේ වෛද්‍යවරිය තටාකය අසල විවේක සුවයෙන් පසුවෙන අතර අනෙක් නිලධාරීන් ලහි ලහියේ මෙහෙයුම සඳහා සූදානම් වෙමින් සිටියහ. මෙහෙයුමට පෙර එළැඹුණු අවසන් දින කිහිපයේදී තවත් නිලධාරීහු අම්මාන් වෙත පැමිණියෝය. සැබෑම ඝාතකයන් පැමිණියේ ඊටත් පසුවයි. ෂෝන් කෙන්ඩල් හා බැරී බීඩ්ස් නමැති කැනේඩියානු ජාතිකයන් දෙදෙනෙක් ලෙස පෙනී සිටිමින් පැමිණි ඒ දෙදෙනා ඉන්ටර්කොන්ටිනෙන්ටල් හෝටලයේ ලැගුම් ගත්හ. 
කවදාවත් කිසිම අරාබි රටක මෙහෙයුමකට දායක වී නොමැති මේ දෙදෙනා ඝාතකයන් ලෙස තෝරා ගැනීම සහ පැහැදිලිව පෙනෙන ඊශ්‍රායල හුරුවක් ඔවුන්ගේ කතාවේ තිබියදී කැනේඩියානු ජාතිකයන් ලෙස ගමන් බලපත්‍ර හැදීම මෙහෙයුමේ අඩුපාඩු පැහැදිලිව පෙනුණු අවස්ථාවකි. නමුත් මෙහෙයුම අඩුපාඩු සහිත බව සියල්ලන්ට වැටහුණේ එය අසාර්ථක වී සියල්ලෝම අමාරුවේ වැටුණු පසුවයි. 


පහර දීම සිදුවෙන්නට නියමිතව තිබුණේ මෂාල්ගේ කාර්යාලය පිහිටි ගොඩනැගිල්ලට ඇතුළු වෙන්නට ඔහු පාගමනින් යන අවස්ථාවේය. කෝලා කෑන් එක අතේ තබාගෙන එය හදිසි අනතුරකින් විසිරුණු බවක් පෙන්වා මෂාල්ගේ අවධානය දිනා ගැනීම ෂෝන්ගේ රාජකාරිය වූ අතර ඒ අවස්ථාව ප්‍රයෝජනයට ගනිමින් මෂාල්ගේ ගෙල පිටුපස මාරාන්තික විස තැවරීම බැරී හට පැවරුණු රාජකාරියයි. තත්පර ගණනක් ඇතුළත සිදුවිය යුතුව තිබුණු ඉහත අනතුරෙන් පසු මෂාල් මිය යන්නට නියමිත වූයේ හෘදයාබාධයක් හේතුවෙනි. 
රෝගියා සහ වෛද්‍යවරිය ලෙස රඟපෑ සංචාරකයන් දෙදෙනා හෝටලයේ රැඳී සිටියේ යම් හෙයකින් ඔවුනට උපකාරයක් අවශ්‍ය වුවහොත් ඉදිරිපත් වීමටයි. මෂාල් ඉතා වේගයෙන් ඇවිදින්නට වී, ඝාතකයන්ට ඔහුට ළඟා වෙන්නට නොහැකි වුවහොත් විදේශිකයන් දෙදෙනා වහා ඔහු ඉදිරියට පැමිණ ඝාතකයන් එනතුරු ඔහු රඳවාගනිමින් සහය වීමට බලාගෙන සිටියහ. ඔවුන් හට තිබුණු වාසිදායකම තත්ත්වය නම්, ප්‍රහාරය එල්ල කිරීමට සූදානම් වූ ස්ථානයේ ඔවුනට බාධා පැමිණවිය හැකි පොලිස් නිලධාරීන්, පවුලේ සාමාජිකයන්, ආරක්ෂකයන් හෝ වෙනත් කිසිවෙක් රැඳී නොසිටීමයි.


සැලසුම් ක්‍රියාවට නංවන්නට කිසිදු බාධාවක් නොමැති නම් පමණක් මෙහෙයුම ක්‍රියාත්මක කිරීම සඳහා නිලධාරීන් අට දෙනාට උපදෙස් ලැබී තිබිණ. යම් හෙයකින් සැලසුම් කළ ආකාරයෙන් පිට සුළු දෙයක් හෝ සිදුවෙන්නේ නම්, මෙහෙයුම වෙනත් දවසකට කල් දැමිය හැකි බව ඔවුනට පැහැදිලිවම දැනුම් දී තිබිණ. සත්‍ය වශයෙන්ම සිදවූයේද එයමයි. ඝාතකයන් දින කිහිපයක් එතැනට ගියද, පොලිස් නිලධාරින් හදිසියේ මතුවීම, මෂාල්ගේ ආරක්ෂකයන් පැමිණීම හා තවත් දවසක ඔහු කාර්යාලයට නොඑන්නට තීරණය කිරීම යන හේතු මත කිහිප වරක්ම මෙහෙයුම කල් දමන්නට සිදු විය. 


ඒ ඉරණම්කාරී දවස, සැප්තැම්බර් 25 වෙනි දා උදා විය. මෙහෙයුමට අණදෙන නිලධාරියා, මෂාල්ගේ කාර්යාල ගොඩනැගිල්ලට ප්‍රතිවිරුද්ධ දෙස පිහිටි ගොඩනැගිල්ලක් අසලට වී බලා සිටියි. ඉලක්කගත කලාපය තුළ කණ්ඩායම සන්නිවේදනය කරන්නේ හස්ත සංඥා සහ ශරීර භාෂාවෙනි. මෙහෙයුම නවත්වන්නට අවශ්‍ය නම් අණදෙන නිලධාරියා ඔහුගේ කැප් තොප්පිය වනයි. ගොඩනැගිල්ලට පිටුපසින් ඝාතකයන්ට පළායාමට අවශ්‍ය රිය සූදානමිනි. ෂෝන් සහ බැරී මෙන්ම විදෙස් යුවළද සූදානමිනි. හැම දෙයක්ම නිසි පරිදි සිදුවේ. 
නමුත් එක් දෙයක් නියමිත පිළිවෙළින් බැහැර වෙමින් පැවතිණි. හැමදේම සුපුරුදු පිළිවෙළට සිදුවෙන අතර මෂාල්ගේ නිවසේ අන්තිම මොහොතේ දී පැහැදිලි වෙනසක් සිදුවිය. මෂාල්ගේ දරු දෙදෙනා පාසලට ඇරලවන බිරිය, එදා ඒ වගකීම ඔහුට පැවරුවාය. දරු දෙදෙනා ද පියා සමඟ රියට නැගුණු නමුත් ඔත්තුකරුවන් ඒ බවක් නොදුටුවෝය. කළු පැහැ ගන්වා ඇති වීදුරුවලින් පිටුපස අසුනේ හිඳ සිටින ඔවුන් පිටතට නොපෙනේ. මේ අතර මෂාල් නිවසෙන් පිටත් වූ බවට කිඩෝන් කණ්ඩායමට පණිවිඩය ලැබිණි. 
මෂාල් ෂමියා සෙන්ටර් වෙත පැමිණ, රියෙන් බැස, ගොඩනැගිල්ලේ පිවිසුම වෙත යාම සඳහා පඩිපෙළක් නගිමින් සිටි අවස්ථාවේ ඝාතකයන් දෙදෙනා වේගයෙන් ඔහු වෙත ළඟාවෙමින් උන්හ. ඔහුට ආසන්න වීමට තවත් මීටර් තුනක් ඉතිරිව තිබියදී හදිසියේම රියේ සිටි එක් දියණියක් “තාත්තා.... තාත්තා” යැයි කෑගසමින් මෂාල් පසුපස දිවයන්නට වූවාය. එවිට රියැදුරු වහා රියෙන් බැස ඈ ලු‍‍හුබඳින්නට විය. 


පාරෙන් අනෙක් පස සිටි අණ දෙන නිලධාරියා කුඩා දරුවා සහ ඈ පසුපසින් යන රියැදුරු දැක, මෙහෙයුම නවතන්නැයි තොප්පිය වනා සංඥා කරන්නට විය. එහෙත් ඒ ඉරණම්කාරී මොහොතේ, ඒ තත්පර ගණන ඇතුළත ඝාතකයන් දෙදෙනාට සිය අණ දෙන නිලධාරියා නොපෙනී යන්නේ ගොඩනැගිලි පිවිසුමේ තිබෙන දැවැන්ත සිමෙන්ති කණුවක් නිසාය. ඒ මොහොතේ පිටුපසින් දිව එන කුඩා දරුවා හෝ රියැදුරු ඔවුන් දැක තිබුණේ ද නැත. 


ඔවුහු සැලැස්ම අනුව කටයුතු කරමින් සිටිති. දෙදෙනා මෂාල් හට ළං වෙමින් කෝලා කෑනය විවර කරන්නට උත්සාහ කළද,‘ එය විවර වී බීම විසිරෙන්නේ ද නැත. එහෙත් අවස්ථාව මග නොහරින්නට සිතන බැරී විස බිංදු කිහිපයක් මෂාල්ගේ කන මතට හලයි. මේ අවස්ථාවේ ඔවුනට පිටුපසින් සිටින රියැදුරු ආගන්තුකයා සිය ස්වාමියාගේ ගෙල දෙසට අත දිගු කරනු දකින්නේ, ඔහුට පිහියකින් ඇනීමට හදන්නේ යැයි සිතා කෑගසාගෙන බැරී වෙත පනියි. 


මෂාල් පිටුපස හැරී බලන්නේ ඒ කෑගැසීමට ය. ඒ අවස්ථාව මග නොහරින්නට සිතන බැරී විස බිංදු කිහිපයක් මෂාල්ගේ කණ මතට හලයි. 


කටු අනින්නාක් මෙන් තියුණු සංවේදනයක් මෂාල් අත්විඳින නමුත් යම් කිසිවක් වැරදී ඇති බව වටහාගෙන හැකි තරම් වේගයෙන් පණ බේරාගෙන දුවයි. ඝාතකයන් දෙදෙනාද වහ වහා පළා යන රිය වෙත දුවති. මුහම්මද් අබු සෛෆ් නමැති හමාස් හමුදා භටයෙක් මෙතැනට එන්නේ ඒ වෙලාවේය. ඔහු පැමිණ සිටියේ මෂාල් හට ලිපිගොනුවක් භාර දෙන්නටය. තම නායකයා හා ආගන්තුකයන් දෙදෙනා දකින ඔහු වහා පැන පළා යන්නන් අල්ලා ගන්නට සැරසුණද, කෝලා කෑනයෙන් ඔහුට දමා ගසන ඝාතකයෝ පළා යති. මෙහෙයුම තුළ සිදුවූ දරුණුම වැරැද්ද සිදුවෙන්නේ මේ අවස්ථාවේදීය. 


අබු සෛෆ් වාහනයේ අංකය ලියාගත් බව පළා යන අතර වාහනයේ රියැදුරු ඔවුනට දැනුම් දුන් පසු, කොතැනකදී හෝ පොලිස් අත්අඩංගුවට පත් වෙතැයි බියෙන් ඔවුන් දෙදෙනා වාහනයෙන් බැස මහ මග දිගේ පයින් යන්නට ගන්නා අතර ඔවුන් අල්ලා ගැනීමේ අදිටනින් අබු සෛෆ් ඔවුන් පසුපස එයි. ඔහු ලු‍‍හුබැඳි බව ඔවුන් දැන ගන්නේ අබු සෛෆ් බැරීගේ ඇඟට පැන, ඔහු මෂාල් හට අනතුරක් කරන්නට උත්සාහ ගත් බව කෑගසා කියන්නට වූ විටය. මේ අතර මාර්ගයේ අනෙක් පස සිටින ෂෝන්, විපතට පත් මිතුරා බේරාගැනීමට දුවගෙන එන්නේ අබු සෛෆ්ට පහර දෙමිනි. ඉන්පසු දෙදෙනා එකතු වී අබු සෛෆ් හට ගුටි බැට දෙන අතර සෙනඟ වටවී බලා සිටිති. පොලිසිය පැමිණ තිදෙනාම කුදලාගෙන යති. 
පොලිසිය සිතන්නේ අබු සෛෆ් විදේශිකයන් දෙදෙනාට පහර දුන් බවය. නමුත් වැඩි වේලා යන්නට පෙර පහර දී ඇත්තේ කවුද යන්න ඔවුහු වටහා ගනිති. මෂාල් හට අනතුරක් කරන්නට ඔවුන් සැරසුණු බව ඔහු පොලිසියට කියයි. පොලිස් විමර්ශන අංශය වහා මේ පුද්ගලයන් ගැන කැනේඩියානු කොන්සල් කාර්යාලයට දැනුම් දුණි. එහි සිට ඔවුන් හට කතා කරන රාජ්‍ය නිලධාරියෙක් ඔවුන් කැනේඩියානුවන් නොවන බව තහවුරු කරයි. එහෙත් ජොර්දානුවන්ට තවමත් ඔවුන්ගේ අතට ලැබුණු වස්තුව ගැන අවබෝධයක් නැත. ඔවුහු දෙදෙනා සැක පිට රඳවා ගනිති. එක් දුරකතන ඇමතුමක් පමණක් ගන්නට ඔවුනට අවස්ථාව ලැබේ. 


ඔවුන් කතා කරන්නේ යුරෝපයේ මොසාඩ් මෙහෙයුම් මූලස්ථානයට ය. මේ අතර ෂමියා සෙන්ටර්හි සිදුවූ දෙය දුටු එක් මොසාඩ් නිලධාරිනියක් හදවත් රෝගියා හෙවත් ජෝර්දානයේ සිටින ජ්‍යෙෂ්ඨ මොසාඩ් නිලධාරියාට මෙය දැනුම් දෙන්නට පැමිණේ. ඇය හෝටලයට එනු දකින ඔහු දරුණු වරදක් සිදුවී ඇති බව වටහා ගන්නේ, එකිනෙකා ඉදිරියට පැමිණීමට අවසර තිබෙන්නේ එවැනි දෙයක් සිදුවුවහොත් පමණක් නිසාය.


එම සංඥාව වටහාගත් ඔහු ලෙඩ කබාය ගලවා වහා සූදානම් වී පෙර කතිකා කරගෙන තිබුණු රහස් තිප්පොළක් වෙත යන්නේ හදිසි සාකච්ඡාවකටයි. මඳ වේලාවකින් අණදෙන නිලධාරියා ද පැමිණේ. සිදුවී ඇති දෙය ඔවුහු දනිති. එහෙත් වෙන්නට යන දේ ගැන නම් දැන සිටියේ නැත. 


මීෂ්කා විසින් මොසාඩ් මූලස්ථානයට යවන ලද හදිසි වාර්තාව කියැවූ රැම්සාඩ් ඩැනී යාටොම්, ඔහුගේ දෙපාර්තමේන්තු ප්‍රධානීන් සමඟ සාකච්ඡා කොට, ආරක්ෂාව පතා ජෝර්දානයේ තිබෙන ඊශ්‍රායල තානාපති කාර්යාලයට යන්නැයි සියලු‍‍ දෙනාට උපදෙස් දෙයි. වෛද්‍යවරිය පමණක් රෝහලේ නැවතෙන අතර අනෙක් සියලු‍‍ දෙනා තානාපති කාර්යාලය බලා යති.

 

ඉතිරිය ලබන සතියට........

 

මූලාශ්‍රය: මයිකල් බාර් - සොහාර් හා නිසිම් මිශාල් විසින් රචිත, මොසාඩ් - ද ග්‍රේටස්ට් මිෂන්ස් ඔෆ් ද ඊශ්‍රායෙලි සීක්‍රට් සර්විස් කෘතිය
පරිවර්තන සටහන - නිසංසලා දිසානායක