සොබාවික විපත් පිළිබඳ හා එයින් වන හානිය පිළිබඳ වුවත් මෙරටින් මෙන්ම විදෙස් රටවලින් ද වාර්තා අසන්නටත් දකින්නටත් ලැබේ.
මේ එවැනි පුවතකි.
පසුගියදා මධ්‍යම ඇමරිකාවට අයත් ගෝතමාලාවෙහි බිහිසුණු ගිනිකන්දක් පුපුරා යාමෙන් සිදුවූ පුද්ගල මරණ සංඛ්‍යාව 75 දක්වා ඉහළ ගොස් ඇති බව එරට මාධ්‍ය වාර්තා කරයි.
ගිනිකන්ද පිපිරී යාමෙන් ගලාගිය ලාවා අළු සහ ගල්කැබලි මළ සිරුරු වටා ඝන තට්ටුවක් මෙන් බැඳී ඇති නිසා මළ සිරුරු දිස්වූයේ ගල් පිළිම මෙන් බව විදේශ මාධ්‍ය ප්‍රකාශ කරයි.
සවල් සහ බැකෝ යන්ත්‍ර යොදා සුන්බුන් හා මඩ තට්ටු ඉවත් කරමින් මළ සිරුරු පිරිසුදු කිරීමේ කටයුතුවලට සහන සේවකයෝ වැඩි පරිශ්‍රමයක් යෙදූ බව වාර්තාවේ.
ඒ මොහොත වනවිටත් අවට පරිසරය (පොළෝ තලය) උණුසුම්ව පැවැති අතර ඒ කොතෙක්ද යත් සහන සේවකයන්ගේ සපත්තු අඩි දියවීමට තරම් බව සඳහන් වේ.
විදේශ වාර්තාවලට අනුව අළු, දුම් සහ ගල්කැබලි දුමාරයකින් වසා ගෙන ගිනි කන්ද පිපිරී ඇත.
"National Institute of forensic Sciences ආයතනයහි අධ්‍යක්ෂ වන Fanuel Garcia අනුව සොයාගත් මළ කඳන් 17ක් හඳුනාගෙන ඇති අතර අතුරුදන් වූ පුද්ගල සංඛ්‍යාව 200 ඉක්මවයි.
Fanuel Garcia අනුව හඳුනාගත නොහැකි දේහ හා සිරුරු අංග උණු දියෙන් මැකී ගොස් ඇත.
ඒ නිසා විශේෂඥයෝ 'DNA' සාම්පල් ලබා ගෙන අනන්‍යතාව තහවුරු කිරීමට උත්සාහ ගනිමින් සිටිති.
ගෝතමාලාවේ බලධාරීන්ට අනුව මෙය මධ්‍යම ඇමරිකාවේ පිහිටි වඩාත් සක්‍රියතාවයෙන් යුතු ගිනි කන්දක් බව සඳහන් වේ.
මීට පෙර වසරවල සුළු පිපිරීම් රැසක් ගැනම මේ ගිනිකන්ද ආශ්‍රිතව පුවත් වාර්තාවී ඇත.
නමුත් ඒවායේ සක්‍රියතාව අඩු බවට විද්‍යා පර්යේෂකයන් සඳහන් කර තිබූ අතර අවට ජීවත්වන ජනයා ඉවත් කර නොතිබුණි.
ගෝතමාලාවේ ආපදා ආයතන කළ නිර්දේශ මත ඔවුනට ආරක්ෂාවීම සඳහා ක්‍රම දැනුම්දී ඇත.
- එයින් ප්‍රධාන කරුණු තුනක් මෙසේය.
- ආරක්ෂිත මුහුණු ආවරණ පැළඳීම
- එහි අවට සිටින ගෙවල්වල වහලවල අළු ඉවත් කිරීම
- ආහාර වසා තැබීම
උණු ලාවා, අළු, ගල් ගිනිකන්ද මතින් ගලා ඇවිත් මාර්ග අවට ගෙවල් සුනු විසුණු කර ගිනිගත් බවට වාර්තාවේ.
මේ අනුව බලන කල නිරතුරුවම මෙවැනි විදෙස් මාධ්‍ය වාර්තා හරහා සොබාවික හා සොබාවික නොවන විපත් පිළිබඳ අසන්නට දකින්නට ලැබීම අද සුලබය. එය ඉතාමත් අන්තරාදායක තත්ත්වයකි.
මහේෂණි මීගහපොල
