එදා මෙදා දේශීය සිනමාව බිහිකළ ජනප්‍රියතම සුපිරි තරු දෙක (The Most Famous Sri lankan Mega Stars) ගාමිණී ​ෙෆාන්සේකා හා විජය කුමාරතුංගය. සිනමා ක්ෂේත්‍රයේ එදත් අදත් තරු රැසක් වරින් වර පහළ වූ අතර, ඇතැම් තරු කාල​යාගේ ඇවෑමෙන් නිවී ගිය අයුරු අපි දැක ඇත්තෙමු. ඒ කලක් සිනමාව එකලු කළ තරු මිස සුපිරි තරු නොවේ.   

මෙරට පහළ වූ සුපිරි නළුවන් දෙදෙනා නම් 1936 වසරේ මාර්තු 21 වැනිදා උපත ලබා 2004 වසරේ සැප්තැම්බර් 30 වැනිදා මියගිය සෙම්බුගේ ගාමිණී ෂෙල්ටන් ෆොන්සේකා හා 1945 ඔක්තෝබර් 09 වැනිදා උපත ලබා 1988 වසරේ පෙබරවාරි 16 වැනිදා මියගිය කෝවිලගේ විජය ඇන්ටන් කුමාරතුංගය.  
 
සන්දේශය, දෛවයෝගය, පිරිමියෙක් නිසා, දස්කොන් චිත්‍රපටවල රඟ පෑ ගාමිණී ෆොන්සේකා සුපිරි තරුවක් ලෙස මුදුන් පෙත්තට පැමිණියේ 1962 තිරගත වූ ‘‘රන්මුතු දූව’’ චිත්‍රපටයෙනි. ගැටවරයෝ, චණ්ඩියා, ධීවරයෝ, සූර චෞරයා, සූරයන්ගෙත් සූරයා, හතර දෙනාම සූරයෝ, එදත් සූරයා අදත් සූරයා, කස්තුරි සුවඳ, සඳහටම ඔබ මගේ, ගාමිණී රඟ පෑ චිත්‍රපට නිසා ඔහු ජනප්‍රියත්වය තහවුරු කළේ පිට පිටම ජනප්‍රිය සරසවි සම්මාන ​අටක් දිනාගෙනය.   

ගාමිණී නිසා විජය කුමාරතුංගයන් නළුවෙකු වීමට සිහින මැවූ බව අපට කියා තිබුණි.   

‘‘මම චිත්‍රපට නළුවකු වීමට සිතුවේ ගාමිණී ෆොන​්සේකාට එදා තිබූ ආකර්ෂණය නිසාය. කොටහේනේ ශාන්ත බෙනඩික්ට් විද්‍යාලයේ ඉගෙන ගත්ත කාලයේ එතකොට මට වයස අවුරුදු 17 ක් විතර ඇති. කටානේ මහා පරිමාණයේ සංගීත සංදර්ශනයක් පැවැත්තුවා. නත්තල කිට්ටුව. ලංකාවේ හිටිය ජනප්‍රිය ගායක ගායිකාවෝ ජෝති, මිල්ටන්, එම්.එස්., රුක්මණී, ඇන්ජලින් සින්දු කියන්න ආවා. මේ ප්‍රසංගයේ ප්‍රධාන අමුත්තා ලංකාවේ අසහාය නළුවා ගාමිණී ෆොන්සේකා. එදා කටාන ජනතාව ඔහුට දැක්වූ සැලකිලි, ගෞරවාදර දැක්කම මමත් කවදා හෝ නළුවෙක් වී ජනතාව අතර ජනාදරය ලබා ගන්නවා යයි පුංචි සිතුවිල්ලක් හිතට ආවා. රඟපෑ​ෙම් ආරම්භයේ බීජය මා සිතට ආවේ එදා.’’   

හන්තානේ කතාව චිත්‍රපටයෙන් සිනමාවට පිවිසි විජය ජනප්‍රිය නළුවකු ලෙස ප්‍රකට වූයේ ‘‘හතර දෙනාම සූරයෝ’’ හා ‘‘තුෂාර’’ චිත්‍රපට හරයාය.   

ගාමිණී හා විජය මුල්වරට එකට රඟපෑවේ ‘‘හතර දෙනාම සූරයෝ’’ (1971) චිත්‍රපටයේය. මේ චිත්‍රපටයේ ගාමිනීගේ පෙම්වතිය ශ්‍රියානි අමරසේන වූ අතර, විජයගේ පෙම්වතිය වූයේ මාලනී ෆෝන්සේකාය. එහෙත් ගාමිනී හා මාලිනී ඊට පසු නිධානය, සහනය, එදත් සූරයා, අදත් සූරයා, ආදරේ හිතෙනව දැක්කම, සඳහටම ඔබ මගේ, හොඳම වෙලාව, හොඳයි නරකයි, කස්තුරි සුවඳ, සැණ​ෙකළිය චිත්‍රපටවල රඟපෑ අතර විජය හා මාලිනී හතර දෙනාම සූරයෝ, සමනළ කුමරියෝ. මේ දෑස් කුමට ද, ආදරේ හිතෙනව දැක්කම, තුෂාරා, හත්දිනක් තරු, හොඳම වෙලාව, දාහකින් එකෙක්, සුසී, සැණකෙළිය යන චිත්‍රපටවල රඟපෑහ.   

මේ කාලය වනවිට ගාමිණී හා විජය සමීප හිතවතුන් වූ අතර ගාමිණී විජයට ගුරු උපදේශ දීමට තරම් ලෙන්ගතු විය. ගාමිණීගේ වචන වලින්ම එය සටහන්ව ඇත්තේ මෙසේය.   

‘‘හන්තානේ කතාවෙන් පසු විජය කරා බොහෝ චිත්‍රපට නිෂ්පාදකවරුන්ගේ අධ්‍යක්ෂවරුන්ගේ අවධානය යොමු විණ. ඉඳහිට විජය මා හමුවීමට පැමිනීම සිරිතක් කොට තිබිණි. මෙකල ඔහු සතුව හොන්ඩා මෝටර් සයිකලයක් විය. ඔහු මෙහි නැගී අධිවේගයෙන් මහ පාර තරණය කරනු මා කිහිපවිටක්ම දැක ඇත. ඊළඟට මා කළේ අංගවිකල වුණු නළුවන් චිත්‍රපට ප්‍රධාන චරිත රඟපෑමට තේරෙන්නේ නැති බව මතක් කර දී ඔහුගේ මෝටර් සයිකලය විකුණා දමා කාරයක් ගැනීමට ඔහු පෙළඹවීමයි. දින කිහිපයකට පසු ඔහු දුරකතනයෙන් මා වෙත පැවසුවේ, මෝටර් සයිකලය ඉවත් කළ බවත්, ෆොක්ස්වැගන් රථයක් ගත් බවත්ය.   

ගාමිණී, විජයට දුන් තවත් උපදෙසක් මම දනිමි. එනම් නළුකමේ ආයුෂ ඉතා කෙටි බවත්, ඉතාම කලාතුරකින් තමන්ගේ දක්ෂතාවයත්, කැපවීමත් මත එය දික්විය හැකි බවය. වෘත්තියේ ගරුත්වය ද එහි නියැලෙන්නන්ගේ හැසිරීම් තුළින් රැකෙන බවය. විශේෂයෙන් එකල සමහර නළු නිළියන්ගේ ගති පැවතුම් නිසා මුළු මහත් නළු නිළි වෘත්තියටම කැළැල් ඇති වේගෙන යනු දුටු නිසා එවැනි දේවලින් වැළකී සිටිය යුතු බව ඔහුට සිහිපත් කර දුන්නේය.   

‘‘වැඩිකල් යන්නට පෙර ක්‍රිකට් පිටියකදී ඔහු තලන්නට, පෙළන්නට සූදානම් වූ පිරිසම ඔහු වටා රොක් වී එකට කනු බොනු මම දුටුවෙමි. තවත් කෙටි කලකදී විජය කුමාරතුංගයන්ගේ ජනප්‍රියත්වය වැඩිවීමත් සමග ඔහුගේම චිත්‍රපටවල එම පිරිස් අවශේෂ සහ සහාය රැඟුම් දක්වනවා දුටුවෙමි. තවත් කලෙකදී එම පිරිස්ම ගණනින් වැඩි වූ අතර. ඔවුන් විසින් විජය කුමාරතුංගයන් නොමග යවනවා ද දුටුවෙමි’’ ගාමිණී කියා තිබුණේය.   

‘‘පූජිත ජීවිත’’ (පස්වැනි වෙළුම 1994)   

එක්තරා දිනක ගාමිණී තමාගේ ප්‍රථම රංගනය ගැන විජයට කියනු අප අසා සිටියේ කුහුලකිනි.   

විජයගේ පහරකින් ගාමිණීගේ තොල පිපිරිලා ලේ ආවා   
විරසකව සිටි ගාමිණී හා විජය එක්කළේ කෙහෙළිය රඹුක්වැල්ල   
විජය හා ගාමිණී මුලින්ම එකට රඟපෑවේ හතර දෙනාම සූරයෝ චිත්‍රපටයේ   
දෙදෙනා විරසක වෙන්නේ කේලාම් හා වැරදි අවබෝධ නිසා   
සැණකෙළියේදී මාලනී ගාමිණීට උපහාස, අපහාස කරයි   
විජය සිර අඩස්සියේ සිටිය දී විඳින දුක ගාමිණී ජනපතිට කියයි.   

එක්තරා ප්‍රසිද්ධ නිළියන් දෙදෙනෙක් මා ප්‍රධාන චරිතය රඟපෑ පළමුවැනි චිත්‍රපටයේ මගේ රඟපෑමට උසුළු විසුළු කළ බව විජය මතක තියාගන්න. එවැනි අවස්ථා ඔයාට නොලැබීම ගැන සතුටු වෙන්න. ඒ චිත්‍රපටයේදීම ප්‍රධාන නිළියට පෙම් බැඳි එම චිත්‍රපටයේ කොටස්කරුවකු එක්තරා සටන් ජවනිකාවකදී මැරවර චරිතය රඟපෑ තවත් නළුවකු ලවා මට ඇත්තටම පහර දුන්නා. එසේ කළේ චිත්‍රපටවල නළුවන් චිත්‍රපටයේ සටන් කලාව ඔවුනට ඇත්තවශයෙන්ම සාමාන්‍ය දිවියේ දී එම දේ කළ නොහැකි බව අර නිළියට පෙන්වීම සඳහායි. මා කළේ පටිගත කරමින් තිබූ චිත්‍රපට ජවනිකාව පසෙක තිබියදී ජවනිකාවෙන් පිට යමක් එම දර්ශනයට එකතු කිරීමයි. එනම් මා තරම් එකහමාරක් විශාල මැරයා චිත්‍රාගාරයෙන් පිටතට ඔසවා ගෙන ගොස් වතුර පොවා ප්‍රකෘති සිහිය ලබා දෙන්නට සැලැස්වීමයි. මම මේ කතාව විජයට කිව්වේ තාම ලාබාල වියේ සිටින ඔයාට හැම දේකටම එඩිතරව මුහුණ දෙන්නට පාඩමක් හැටියට’’   

එහෙත් 1973 පමණ වන විට ගාමිණී හා විජය විරසක වීමට හේතු සාධක මතුවීමට පටන් ගත්හ. කේලම්, වැරදි අවබෝධ, මේවාට බලපෑහ. ඒ විරසකය ‘‘සැණකෙළිය’’ චිත්‍රපටයේ රඟපෑ දර්ශනයකින් පුපුරා ගියේය. එහි විශේෂ අවස්ථාවක් වූයේය. එය සටන් දර්ශනයක් වීමය. චිත්‍රටයේ අධ්‍යක්ෂ විමලදාස පෙරේරා කියන්නේ එය සිනමාවේ ඇත්තටම ගහ ගත්ත සටන් දර්ශනයක් හා සමානව කෙරුණු එකක් බවය.   

සැණකෙළිය චිත්‍රපටයට පසුබිම් වෙන්නේ කානිවල් එකක වන ආදර කතාවකි. එය ලංකාවේ ප්‍රථම චිත්‍ර කතා පත්‍රය වූ සතුට පත්‍රයේ පළවූ හර්බට් රංජිත් පීරිස් කතාව ලියා චිත්‍රපටයට නැගූ සැණකෙළිය චිත්‍රකතාව ඇසුරින් නිපද වූ චිත්‍රපටයකි. එම චිත්‍රපටයේ අධ්‍යක්ෂ වූයේ විමලදාස පෙරේරාය. කතාව, තිර නාටකය දෙබස් හා සම අධ්‍යක්ෂණය හර්බට් රංජිත් පීරිස් ගෙනි.   

සැණකෙළි බිමක සේවය කළ කාර්මිකයන් දෙදෙනකු වූ ප්‍රියන්ත (ගාමිණී ෆොන්සේකා) හා සම්පත් (නවනන්දන විජේසිංහ) මිතුරන් දෙදනෙකි. සැණකෙළිය සංවිධානය කරන ධනවතකුගේ දියණිය තරංගනී (මාලිනී ​ෙෆානේසේකා) හා ඇගේ හෙයෙළිය (ශ්‍රියානි පෙරේරා) ගැන මිතුරන් දෙදෙනාගේ සිත යොමු වෙයි. දිනක් තරංගනීගේ වටිනා පෑනක් නොදැනුවත්වම බිම වැටෙයි. ප්‍රියන්ත එය අහුලා ගනී. මෙය තරංගනීගේ මෝටර් රථය පදවන රියැදුරා දකී. ඔහු මේ බව පොලිස් කොස්තාපල්වරයකුට දන්වයි. ඔහු පැමිණ ප්‍රියන්තගෙන් මේ පිළිබඳ ප්‍රශ්න කරයි. ඔහු කියන්නේ පෑන තමාගේ බවය. තරංගනී කැඳවා විමසන විට ඇය කියන්නේ පෑන තමාගේ නොවන බවය. ප්‍රියන්ත සැණකෙළියේ අවන්හලක සිටින ඉරෝමි (ෆරිනාලායි) හා සබඳතාවක් ඇති කර ගනී. ඒත් ප්‍රියන්තගේ හිත තරංගනී වෙත දිව යයි. සමාජ තලයෙන් ඉහළ ඇය ඔහු වරෙක ප්‍රතික්ෂේප කරයි. අපහාස, උපහාස කරයි. සැණකෙළි බිමට එන රෝහිත (විජය කුමාරතුංග) ධනවත් තරුණයකු වන අතර, තරංගනීගේ ද හිතවතෙකි. මිතුරෙකි. ඔහු ඇය ගැන බලාපොරොත්තුවෙන් සිටී. රෝහිත හා ඔහුගේ මිත්‍ර පිරිස විනෝදකාමීන්ය. මත්ලෝලීන්ය. රෝහිතගේ පිරිස නොයෙක් අවස්ථාවල ප්‍රියන්ත හා සම්පත් සමග සැණකෙළි භූමියේ ගැටුණේය. ඒ ගැටුම උත්සන්න වෙන්නේ තරංගනීගේ සිත ක්‍රමයෙන් ප්‍රියන්ත වෙත ​යොමුවීම නිසාය. එතෙක් තරංගනීගේ අපහාස, උපහාස හා සමච්චල්වලට ලක්වී මානසික වධයකට ලක්වූ ප්‍රියන්තට ඇගේ ආදරය හිමි වීම රෝහිතට වැදුණු මරු පහරක් වෙයි. රෝහිත හා පිරිස ප්‍රියන්තට දරුණු ලෙස පහර දෙයි. වරෙක ප්‍රියන්ත හා රෝහිත මුහුණට මුහුණ ගහ ගනිති. අවසානයේ තරංගනීගේ හදවත දිනාගන්නේ ප්‍රියන්තය.   

සැණකෙළිය සම්පූර්ණයෙන්ම රූප ගත වී ඇත්තේ හැඳල විජය චිත්‍රාගාර​ෙය්දී අලුතින් ඉදිවූ සැණකෙළි බිමකය. ගාමිණී හා විජය මුහුණට මුහුණ සටන් කරන දර්ශනය රූගත වෙන අවස්ථාව වෙනවිට මේ දෙදෙනාගේ විරසකය උච්ච අවස්ථාවක තිබිණි. මේ දර්ශනය හැඳල විජය චිත්‍රාගාරය පිටුපස ක්‍රීඩාංගණයේදී රූ ගැන්වී ඇත. මේ දර්ශනය රූගත කළ කැමරා ශිල්පියා වූයේ ඇම්.වී. හේමපාල (තලේ) ය.   

මට මේ දර්ශනය කිසිදා අමතක වන්නේ නැහැ. හැඳල විජය චිත්‍රාගාරයේ කාර්පාක් එක තියෙන එළිමහනේදී මේ දර්ශනය ගත්තේ. ඒක රාත්‍රි දර්ශනයක්. සාමාන්‍යයෙන් සටන් දර්ශනයකදී එයට සහභාගි වෙන නළුවන් හැකි තරම් පරෙස්සමෙන් ඒ අවස්ථා රඟපාන්නේ. එ් අතරතුර ඇත්තටම පහරක් දෙකක් වදින අවස්ථා තියෙනවා. විජය හා ගාමිණී අතර සටන් දර්ශනනයක් චිත්‍රපටයක එන්නේම නැහැ. මොකද මේ දෙන්නම වීර චරිත රඟපෑවේ. මේ දර්ශනය ඉන් විශේෂිත එකක්. සාමාන්‍යයෙන් විජයගේ අත්දිගයි. ගාමිණීට වඩා. මේ සටන් දර්ශනය කරන කොට මේ දෙදෙනා අමනාපයකින් සිටි බව අපි දැන සිටියා. විජයගේ එක පාරකින් ගාමිණීගේ තොල පිපිරිලා, තොල දතක් වැදී හිල් වුණා. එයින් ලේ ගලන්න පටන් ගත්තා. අපි ෂූටිං නවත්ල අයිස් කැට ගෙනත් තොලට තිබ්බා. විජය ගාමිණී ගාවට ඇවිත් මෙහෙම කිව්වා. ‘‘I"am Sorry Gamini" කිව්වා. එ්ක හෘදයාංගමව විජය කිව්ව එකක්.   

"Thar'is all Right" ගාමිණී කිව්වා.   

පැයකට පමණ පසු ගාමිණී ‘තලේ අර සීන් එක කන්ටිනිව් කරමු කිව්වා.   

‘‘ගාමිණී මහත්තයා තව ටිකක් ඉමුද? මම ඇහැව්වා. අධ්‍යක්ෂ විමලදාස පෙරේරාත්, නිෂ්පාදක සෑම් පෙරේරාත්, ගාමිණීට ප්‍රතිකාර කරන්න රෝහලකට ගෙනියන්න උත්සාහ කළත් ගාමිණී එයට කැමැති වුණේ නෑ.   
‘‘තලේ, මගේ මුහුණේ ඉදිමුණු පැත්ත කවර් කරලා සූට් කරන්න’’ ගාමිණී මට කිව්වා.   

ගාමිණියි, විජයගෙයි සටන් දර්ශනය මම කැමරා ගත කළේ තුවාල වී ඉදිමී තිබූ පැත්ත කවර් කරලා. මේ සටන් දර්ශනයේ මා දැක්ක විශේෂය නම් ගාමිණී විජයට තුවාල නොවන ලෙස පහර දීම. ඒක ගාමිණීගෙන් මා දුටු විශේෂ ලක්ෂණයක්. ඇත්තටම හිතලා මතලා ගහන පහරවල් ගැන අත්දැකීම් රැසක් ගාමිණීට තිබුණා. ඒක උසස් මානුෂික ගතියක්’’ තලේ කීවේය.   

තලේ එහෙම කියනකොට මට මතක් වුණේ චිත්‍රපට අධ්‍යක්ෂ තිස්ස ලියනසූරිය. ‘‘රන්මුතුදූව’’ චිත්‍රපටයේ ගාමිණී හා හෙක්ටර් ඒකනායක අතර මුහුණට මුහුණ දී කළ සටන් දර්ශනයක් ගැනය. හෙක්ටර් කොල්ලුපිටියේ ශාන්ත මයිකල් විද්‍යාලයේ බොක්සිං ශූරයාය. ගාමිණී ගල්කිස්සේ ශාන්ත තෝමස් විද්‍යාලයේ බොක්සිං ශූරයාය. රන්මුතුදූවේ සටන් දර්ශනය ස්වභාවිකව ඇත්තටම ගහ ගැනීමට ඉඩ දී චිත්‍රපටයේ අධ්‍යක්ෂක මෙන්ම කැමරා ශිල්පියා වූ මයික් විල්සන් ඔවුන් වටා කැමරාව ගෙන යමින් ඒ සටන් දර්ශනය රූ ගත කළ බවය. එහෙත් ගාමිණී හා හෙක්ටර්ගේ මිත්‍රත්වයට එය බාධාවක් නොවීය.

‘‘සැණකෙළිය’’ චිත්‍රටයෙන් පසු ගාමිණී හා විජය කලක් එක චිත්‍රපටයේ රඟ නොපෑහ. චිත්‍රපට ප්‍රේක්ෂකයෝ මේ දෙදෙනා එකට රඟපානු නැරඹීමට පුල පුලා බලා සිටියෝය.   

ගාමිණී හා විජය ‘‘සැණකෙළිය’’ චිත්‍රපටයෙන් පසු නැවත ප්‍රධාන චරිතවලට යොදා ගෙන චිත්‍රපටයක් නිපදවීමට මහනුවර තරුණ ව්‍යාපාරිකයකුට 1981 වසරේදී අවශ්‍ය විය. ඔහු නමින් කෙහෙළිය රඹුක්වැල්ල විය. පසුකලෙක ජනමාධ්‍ය ඇමැතිවරයා ද විය. අද මහනුවර දිස්ත්‍රික්කයේ පාර්ලිමේන්තු මන්ත්‍රීවරයෙකි.   

‘‘මම මේ කාලයේ ලංකාවේ සිටිය ලාබාලම චිත්‍රපට නිෂ්පාදකවරයාය. ගාමිණී හා විජය මගේ මිත්‍රයෝය. මම දවසක් ගාමිණීට කිව්වා ‘‘මම චිත්‍රපටයක් කරන්න කැමතියි. ඒක අධ්‍යක්ෂණය කරන්නත් ප්‍රධාන චරිතයක් කරන්නත් ඔබට පවරනවා. මම කැමතියි දයා රාජපක්ෂගේ ‘‘සක්විති සුවය’’ කියන චිත්‍රකතාව තෝරාගන්න’’ කියලා.   

ඉතින් අපි කරමු. ගාමිණී කිව්වා. 

 
මේ චිත්‍රපටයේ තිස්ස මඩුගල්ල කියන චරිතයට අපි විජයව තෝරා ගමුද? එයා තමයි මේකට ගැලපෙන්නේ’’   

‘‘හොඳා. ඒක තමුන්ගේ කැමැත්තක්.’’   

ගාමිණී සරළ පිළිතුරක් දුන්නා. මම ඊළඟට විජයට ටෙලිෆෝනයෙන් කතා කළා.   

‘‘විජය මම’’ සක්විති සුවය කරනවා. ගාමිණී අධ්‍යක්ෂණය කරන්නේ බකට් හැරීගේ චරිතය. විජයට මේ චිත්‍රපටයේ රඟපාන්න චරිතයක් තියෙනවා. තිස්ස මඩුගල්ලගේ චරිතය.   

‘‘ප්‍රශ්නයක් නෑ කෙහෙළිය රඟපාමු’’ විජය කිව්වා.   

කෙහෙළිය රඹුක්වැල්ල නම් තරුණ නිෂ්පාදකයා ගාමිණී හා විජය නැවත සිනමා රාමුවකට එක් කරන්නේ ‘‘සක්විති සුවයෙනි’’. විජය එතෙක් චිත්‍රපටයකට අය කරන මුදලට වඩා දෙගුණයක් මේ සක්විති සුවයට ලබා ගත් බව විජය අපට කියා තිබුණි. ගාමිණී හා විජය එකට රඟපෑම විශේෂයෙන් ගාමිණී අධ්‍යක්ෂණය කරන චිත්‍රපටයක ගාමිණී සමගම රඟපෑම ඔවුන් දෙදෙනා විරසක කිරීමට උඩ ගෙඩි දුන් බොහෝ දෙනෙකුට වැදුණු බලවත් පහරක් විය.   

එපමණක් නොව විජය 1983 වසරේ ජනප්‍රිය නළුවා ලෙස සරසවි සම්මාන ලබා එය 1988 වසර දක්වා අඛණ්ඩව ලබා ගත්තේය. 1984 අගෝස්තු 18 වැනිදා මරදානේ ටවර් රඟහලේ ගාමිණී ෆොන්සේකා ගේ චිත්‍රපට උළෙලක් පැවැති අවස්ථාවේ එහි විශේෂ ආරාධිතයකු ලෙස පැමිණි විජයට ගාමිණී තම ගෙලෙහි තිබූ මල් මාලව පළඳවා ‘‘මේ මගේ මල් මාලාව ලැබිය යුත්තේ මට නොවෙයි විජයට’’ කීවේය.   

මා විසින් 1986 වසරේ ගාමිණී ෆොන්සේකාගේ පනස් වැනි ජන්ම දිනය වෙනුවෙන් සංස්කරණය කළ ‘‘හෙළ සිනමාවේ සක්විති’’ කෘතිය දොරට වැඩීමේ උත්සවයේ කතා කළ විජය විසින් ප්‍රේමදාස අගමැතිවරයා ඉදිරියේ කළ කතාව මොහු ගාමිණීට දුන් ඉහළම කමදාරුව විය. ‘‘මා ඇත්තටම නළුවෙක් වුණේ ගාමිණී නිසයි. ගාමිණී ලියූ ගීතත් මම ගයා තියෙනවා’’ කී​ෙව්ය.   

විජය සිර අඩස්සියේ තබාගෙන සිටියදී ගාමිණී ඔහු වෙනුවෙන් ජයවර්ධන ජනාධිපතිවරයා හමුවූ පුවත අපට ගාමිණී කීවේ මෙලෙසය.   

‘රජය විසින් විජය අත්අඩංගුවට ගනු ලැබීම මට සැල කර සිටියේ ටෝනි රණසිංහයි. විජය වකුගඩු අසනීපයෙන් පෙළෙන බවත්, සිර කූඩුව තුළ විඳින්නට සිදුවූ දුක් ගැහැට නිසා ඔහුගේ තත්ත්වය තවත් අසාධ්‍ය විය හැකි බවත්, කෙසේ හෝ රාජ්‍ය නායකයාට ආයාචනය කර මුදාගත යුතු බවත් ටෝනි කියා සිටියා. මේ පිළිබඳව හිටපු රාජ්‍ය නායකයන් හමුවේ මා සාකච්ඡා කළ අතර, දින දෙක තුනක් ඇතුළතදී රාජ්‍ය නායකයා චන්ද්‍රිකා මැතිනිය කැඳවා කරුණු විමසා තේ පැන් සංග්‍රහයක් කර විජය වහාම යුද හමුදා රෝහලට පිටත් කර යවනු ලැබුවා.   

සිර අඩස්සියෙන් නිදහස් වී විජය දිනක් මා හමුවන්නට පැමිණ ස්තුති කළා. ඔහු එදා කතා කළේ තමා පසුගිය වකවානුව තුළ උගත් පාඩම් ගැනය. පුහු මිනිසුන් ගැනය. විශ්වාසය තැබිය නොහැකි මිතුරන් ගැනය. හයි හත්තිය තිබෙද්දී කිට්ටු වෙන වැටුණ කළ පස්ස හරවන දෙපයින් ඇවිදින සමහර තිරිසනුන් ගැනය. එහෙත් පොදු දුප්පත් ජනතාවත්, ඔවුන් තුළ තිබෙන ගුණවත්කමත්, පෙරට වඩා අද අගයන බවත් ඒ තුළින් දිවියේ තවත් ශක්තියක් තමන් දුටු බවත් ඔහු පුන පුනා කීවා.   

විජය කුමාරතුංගයන් 1988 පෙබරවාරි 16 වැනි දින ඝාතනය වීමෙන් පසු ඔහුගේ දේහය බැලීමට මම කීප වරක්ම නිවසට ගියෙමි. මා දෙවැනි වර යන විට ඔසී අබේගුණසේකර, ප්‍රේමසිරි පෙරේරා, සරත් කෝන්ගහගේ හා බන්දුල පද්මකුමාර කතා කරමින් සිටියහ.   

ඔසී මා පැමිණි බව දැක බන්දුල මා වෙත එව්වේ අප තිදෙනා මෙන්ම කෝන්ගහගේ ද ආනන්දයේ ඉගෙනුම ලබන කාලයේ සිට මිතුරන් වීම නිසාය. ප්‍රේමසිරි ද මා උපන් කොස්ගස්හන්දියේම මිතුරෙකු නිසාය.   

‘‘ඔයා ආපු එක ​ෙහාඳයි. අපි අවමංගල්‍ය කටයුතු ගැන කතා කරමින් සිටියේ’’ බන්දුල මා සමග කතා කරමින් අනික් අය ලඟට ගෙන ගියේය.   

‘‘අපි තීරණය කළා. විජය ගැන කලාකරුවන් වෙනුවෙන් කරන කතාව ගාමිණීට දෙන්න. ගාමිණී ඔයාගේ යාළුවා නිසා මේ වැඩේ ඔයා බාර ගන්න’’ ඔසී හා බන්දු මට කීහ.   

‘‘ඒක හොඳම යෝජනාවක්. ඒ වුණාට ඒ සඳහා ගාමිණීට ආරාධනය කළ යුත​්තේ චන්ද්‍රිකා නෝනා. ඉතුරු ටික මට සම්බන්ධිකරණය කළ හැකියි’’ මම කීවෙමි.   

ඒක ඇත්ත. අපි රංජිත් එක්ක චන්ද්‍රිකා ළඟට යමු’’ ප්‍රේමසිරි පෙරේරා කීවේය.   

චන්ද්‍රිකා මහත්මිය විජයගේ දෙණ අසල පුටුවක වාඩි වී සොවින් බරව සිටියාය.   

බන්දුල ඇයට කාරණය පැහැදිලි කළේය.   

‘‘ඔව් රංජිත් කියන එක හරි. ඔයාම මට ගාමිණීව ටෙලිෆෝන් එකෙන් සම්බන්ධ කර දෙන්න’’ චන්ද්‍රිකා මහත්මිය මට කීවාය.   

ගාමිණී අයියා, චන්ද්‍රිකා නෝනට කතා කරන්න ඕනෑලු.’’ මම කීවෙමි. 

 
‘‘හොඳයි එයාට දෙන්න.’’   

චන්ද්‍රිකා මහත්මිය අවමංගල්‍යය උ​ෙළලේදී කලාකරුවන් වෙනුවෙන් කතාවක් කරන ලෙස ගමිණීට ආරාධනය කළාය.   

ගාමිණී එය ආදරයෙන් හා විජයට සෙනෙහින් එම කතාව භාර ගත් බව මම හොඳාකාරවම දනිමි.   

විජය මියගොස් වසර 20ක් පිරීමට තෙමසකට පෙර දිනක් එවකට අමාත්‍යවරයකුව සිටි ජීවන් කුමාරතුංගයන් මට ටෙලිෆෝනයෙන් කතා කොට හිටපු ජනාධිපතිනිය චන්‍්ද්‍රිකා මහත්මියට මා හමුවිය හැකි දැයි ඇසීය. එය විජය කුමාරතුංගයන්ගේ 20 වැනි ගුණ සමරුම වෙනුවෙන් ග්‍රන්ථයක් ලිවීමට බව ද ජීවන් ඇමැතිවරයා මට කීවේය. විජය ගැන මට කළ හැකි උපකාරයක් කිරීමට ලාභ ප්‍රයෝජනයක් නැතිව කිරීමේ පරමාර්ථයෙන් මම හිටපු ජනාධිපතිනිය හමුවීමට ගියෙමි. මේ 2008 වසරය. එදා එහි සිටි පිරිස අතර චිත්‍රපට අධ්‍යක්ෂ පද්මසිරි කොඩිකාර ද විජයගේ ලේකම් ලෙස කටයුතු කළ අභාවප්‍රාප්ත හර්මන් වීරසූරිය ද වූහ.   

‘‘ඔයානේ විජය ගැන මට වඩා දන්නේ? විශේෂයෙන් චිත්‍රපට ලෝකයේ නිළි පෙම්වතියන් ගැන නේද පද්මසිරි’’ හයියෙන් කියා සිනාසුණාය. එතුමියගේ කාරුණික ආගන්තුක සත්කාර ලබමින් අප කිහිපවරක්ම නිදහස් මාවතේ නිවසේදී හමුවී මෙම​ කෘතිය සැලසුම් කළෙමු. ඒ හැම අවස්ථාවකම පද්මසිරි කොඩිකාරත්, හර්මන් වීරසූරියත් මට සහාය දුන්හ.   

අපි ලහි ලහියේ චන්ද්‍රිකා මහත්මිය ළඟ තිබූ වටිනා දුර්ලභ පින්තූර ද, මා සතුව තිබූ විජය රඟපෑ චිත්‍රපට පින්තූර ද එක් රැස් කළෙමු. මම ලහි ලහියේ විජයගේ කුඩා කළ සිට චිත්‍රපට ජීවිතය ගැන තොරතුරු අළලා දිවා රාත්‍රී නොතකා අපදාන කෘතිය රචනා කළ අතර, ලියූ හැම කඩදාසියක්ම තිලකා පොඩිමැණිකේ විසින් පරිගණක අකුරුකරණය කළාය. කෘතිය ලිවීමෙන් පසු චන්ද්‍රිකා මහත්මියගේ අදහස වූයේ විජයගේ ළමා කාලය හා පාසල් කාලය ගැන මා ලියූ පරිච්ඡේද කිහිපයත් ආගමික නායකයන්, දේශපාලනඥයන්ගේ විශේෂ පණිවුඩ සිංහල, දෙමළ, ඉංග්‍රිසි බසින් පළ කොට අපදාන කෘතිය ඊළඟ වසරේ නිකුත් කරන බවය. එය ලියා තවත් වසර දහයක් ගත වුවද එය පළ කිරීමට නොහැකි විය. ඉතා ඉක්මනින් එය විජයගේ ආදරණීය රසික රසිකාවියන්ට තිළිණ කිරීමට හැකිවේවායි සිතමි.

ඒ.ඩී. රන්ජිත් කුමාර   
ඡායාරූප පිටපත් කිරීම -ලාල් සෙනරත්