අජිත්ලාල් ශාන්තඋදය 
 
පැල්මඩුල්ල ගල්පොත්තාවල ශ‍්‍රීපාද රාජමහා විහාරස්ථානයේ තැන්පත් කර ඇති සධාතුක කරඬු සහ සුමන සමන් දේව රූප මාර්ග තුනක් ඔස්සේ රිය පෙරහරින් වැඩම කරවා මේ මස 22 වැනි දා උදාවන උඳුවප් පුන් පොහොය දිනයේ අලූයම ශ‍්‍රී පතුල සුවඳ පැනින් දෝවනය කර ප‍්‍රථම පූජාවන් පවත්වා 2018-19 ශ‍්‍රීපාද වන්දනා වාරය ආරම්භ කිරිම සඳහා සියලූ කටයුතු මේවන විට සූදානම් කර ඇති බව ශ‍්‍රීපාදස්ථානාධිපති ඌව වෙල්ලස්ස විශ්ව විද්‍යාලයේ කුලපති බෙංගමුවේ ධම්මදින්න හිමියෝ පවසති. 

හය මාසයක කාලයක් පුරාවට පැවැත්වෙන සිරිපා වන්දනා වාරයේ දී සිරිපා කරුණා කරන බැතිමතුන්ට වන්දනා කටයුතු කර ගැනීමට සියලූ පහසුකම් සලසා ඇති බව ද උන්වහන්සේ පැවසූහ.

මීට අමතරව සිරිපා මළුවේ විශේෂ පිංකම් ද සංවිධානය කර ඇති බව පැවසු උන්වහන්සේ සංවරව සහ විනීතව සිරිපා මළුවට පැමිණීමට වග බලාගන්නා ලෙස බැතිමතුන්ගෙන් ඉල්ලා සිටිති.
නිවාඩු දිනවල සහ සති අන්ත දිනවල සිරිපා මළුවට එන බැතිමතුන්ගේ සංඛ්‍යාව ඉහළයාමට ඉඩ ඇති නිසාබැතිමතුන්ගේ ආරක්‍ෂාවට සහ ඔවුන් පාලනයට විශේෂ පොලිස් කණ්ඩායම්වල සහාය ඉල්ලා ඇති බව ද කීහ. 

හැටන්, රත්නපුර සහ කුරුවිට මාර්ග වල විශ‍්‍රාම ශාලා, පානීය ජල පහසුකම්, සෞඛ්‍ය සේවා පහසුකම් සහ වැසිකිළි පහසුකම් සලසා ඇති බව ද උන් වහන්සේ කීහ. මෙම මාර්ග තුනේ නල්ලතන්නිය, ශ‍්‍රී පලාබද්ගල සහ එරත්න යන ස්ථානවල සිට සිරිපා මළුව තෙක් විදුලි ආලෝකයෙන් මාර්ග ආලෝකමත් කිරිම ලංකා විදුලිබල මණ්ඩලය විසින් ද 22 වැනි දා දින සිට ආරම්භ කරයි. 

පසුගිය ශ‍්‍රීපාද වාරය අවසන් වීමෙන් පසු සිරිපා මළුවේ තැන්පත් කර තිබූ සධාතුක කරඬු සහ සමන් දේව ප‍්‍රතිමා පැල්මඩුල්ල ගල්පොත්තාවල ශ‍්‍රීපාද රජමහා විහාරස්ථායේ ඉදිකළ සමන් දේවාලය තුල තැන්පත් කරනු ලැබුවේ පසුගිය වෙසක් පුන් පොහොය දිනයට පසුදා ය.

මෙවර ශ‍්‍රීපාද වන්දනා වාරය ආරම්භ කිරීමට පෙර මේ මස 20 දින සවස 06.19ට එළඹෙන සුබ මොහොතින් එම සධාතුක කරඬු සහ සමන්දේව ප‍්‍රතිමා මහජනයාට වැඳපුදා ගැනීමට සහ පුද පූජාවන් පැවැත්වීමට ප‍්‍රදර්ශනයට තබන බවත් එය පසුදා අලූයම 04.30 වනතුරු වැඳපුදා ගැනීමට අවස්ථාව සැලසෙන බවත් ශ‍්‍රීපාදස්ථානාධිපති නාහිමියෝ කීහ.

එදින රාත‍්‍රී (20) ගල්පොත්තාවල ශ‍්‍රීපාද රාජමහා විහාරස්ථානයේ සර්ව රාත‍්‍රීක පරිත‍්‍රාණ ධර්ම දේශනාවක් ද පැවැත්වේ.

මෙවර ද සිරිපා මලූව කරා ගමන් ගන්නා පෙරහර තුනෙන් පළමුවැන්න වූ හැටන් මාර්ගය ඔස්සේ යන පෙරහර අලූයම 05.20ට පැල්මඩුල්ල ගල්පොත්තාවල ශ‍්‍රීපාද රජමහා විහාරස්ථානයෙන් පිටත්වේ. 

එම පෙරහර රත්නපුර නව නතරයේ දී රත්නපුර මහ දිසාපතිනී මාලනි ලොකුපෝතාගම, සහ සබරගමු පළාත් ප‍්‍රධාන ලේකම් ඩී.එම්. මාලනී යන මහත්මින් ප‍්‍රමුඛ රාජ්‍ය නිලධාරින් විසින් පිළිගැනීමට නියමිතය.

ඉන් පසු එම පෙරහර, හිදැල්ලන, කුරුවිට, ඇහැලියගොඩ, අවිස්සාවේල්ල, තල්දූව, දෙහිඕවිට, කරවනැල්ල,  යටියන්තොට, කිතල්ගල, ගිනිගත්හේන, වටවල, හැටන්, මස්කෙළිය හරහා නල්ලතන්නිය ශ‍්‍රීපාද බෞද්ධ මධ්‍යස්ථානය දක්වා රිය පෙරහරින් වැඩම කරවනු ලබයි. නල්ලතන්නිය ශ‍්‍රීපාද බෞද්ධ මධ්‍යස්ථානයේ සිට පෙරහර පාගමනින් උදුවප් පුන් පොහොය දින අලූයම වනවිට මලූව කරා ළඟාවීමට නියමිතය. මෙම පෙරහරට පඬුරු සහ පූජාවට්ටි ආදිය තැබීමට අවස්ථාව ලබාදෙන්නේ රත්නපුර නවනගරය පසුකර හිදැල්ලනින් එහා සිට බව ශ‍්‍රීපාදස්ථානාධිපති හිමියෝ කීහ.

සබරගමු මහ සමන් දේවාලයට වැඩම කරවන රජමාවත ඔස්සේ ගමන් කරන පෙරහරේ වැඩම කරවන සුමන් සමන් දේවරූපය සමන් දේවාලය වෙත වැඩම කරවා විශේෂ පූජාවක් පැවැත්වීමට සියලූ කටයුතු සංවිධානය කර ඇති බව බස්නායක නිළමේ මිගාර ජයසුන්දර මහතා පැවසීය.

තුන්වන රිය පෙරහර 21දින පෙරවරු 07.20ට පැල්මඩුල්ල ගල්පොත්තාවල ශ‍්‍රීපාද රාජමහා විහාරස්ථානයෙන් පිටත්වීමට නියමිතය. එය, හුණුවල,  ඕපනායක, ඇල්ලෙපොල, බළන්ගොඩ හරහා ඇල්ලෙආරව හන්දිය තෙක් ගමන්කර එතැනින් මොරහැල, පින්නවල, පුඩුකාඩුව, මාරතැන්න කොටියාගල, බගවන්තලාව, නොර්වුඞ්, මස්කෙළිය හරහා නල්ලතන්නිය ශ‍්‍රීපාද බෞද්ධ මධ්‍යස්ථානය තෙක් ගමන් කරයි. එතැන් සිට පාගමනින් 22දා අලූයම වනවිට එම පෙරහරේ වැඩම කරවන සධාතුක කර`ඩුව සහ සමනදේව ප‍්‍රතිමාව සිරිපා මලූව වෙත වැඩම කරවීමට නියමිතය.

සිරිපා කරුණා කරන බැතිමතුන්ට අවශ්‍ය පහසුකම් සැපයීමට මධ්‍යම රජයේ විදුලිබල, ජලසම්පාදන, ආරක්‍ෂක, ටෙලිකොම් ඇතුළු දෙපාර්තමේන්තු සහ ආයතන රාශීයක් ද සබරගමු සහ මධ්‍යම යන පළාත් සභා දෙක ද, රත්නපුර සහ නුවරඑළිය දිස්ත‍්‍රික් ලේකම්වරු ඇතුළු කාර්ය මණ්ඩලයන්ගේ ද, පළාත් පාලන ආයතන රැසක ද පූර්ණ සහායන් මෙවරත් ලැබෙන බව ශ‍්‍රී පාදස්ථානාධිපති නාහිමියෝ කීහ.

මෙවරද සිරිපා වන්දනා සමය වෙනුවෙන් මුද්‍රිත මාධ්‍ය අනුග‍්‍රහය සීමාසහිත විජය පුවත්පත් සමාගමට අයත් ‘ලංකාදීප’, ‘අද’, ‘දේශය’ ඇතුළු පුවත්පත් විසින් සිදුකරනු ලබයි.