(ප්‍රසාද් මුතුකුඩ)   

මීගමුව  මහ  නගර සභා  සීමාවේ ඇති සියලු අනවසර දැන්වීම් පුවරු , කටවුට්, බැනර් වහා ඉවත් කරන ලෙසට  නිලධාරින්ට උපදෙස් දී ඇතැයි  දයාන් ලංසා මහතා අද (15) පැවසීය.

පුරපති  දයාන් ලංසා මහතා මේ බව  සඳහන් කර සිටියේ මීගමුව මහ නගර සභාවේ  ශ්‍රවනාගාර පරිශ්‍රයේ  විශේෂ  නිලධාරි හමුව  වැඩසටහනින් පසුවය. 

එහිදි  අදහස් දැක්වු  දයාන් ලංසා මහතා මෙලෙස කීය.

“ පුංචි රෝමය  ලෙස  ලෝකයේම විරුදාවලියට ලක්ව තිබෙන්නේ  අපේ මීගමුව නගරයයි  සුන්දර මේ නගරය වාණිජමය අතින් ඉතා වටිනා නගරයක් ජාත්‍යන්තර ගුවන්තොටුපළට ඉතා සමීපතම නගරය මෙයයි. විදේශ සංචාරකයින් සිය සංචාරය ආරම්භ කර අවසන් කරන්නේ මීගමු නගරයේනුයි.

ක්‍රියාත්මක මිනිසුන් සිටින  නගරයක  ක්‍රියාත්මක නගර සභාවක් අවශ්‍යයි. නිලධාරින්  තනතුරු වලට  පත් කරලා තියෙන්නේ වගකීම් යටතේනුයි එය අපි හරියාකාරව  ඉටුකරන්න වගබලා ගත යුතුයි බදුගෙවන , නොගෙවන සියළු ජනතාව මෙය දිහා බලා සිටිනවා.  මීගමුව නගරයේ අනවසර ඉදිකිරීම් වැඩිවී ඇති බව පෙනිගොස් තිබෙනවා.

ඒ අනුව  පුර්ව දැනුම් දීමක් අපි  සභාව විසින් කරලා දැනට දින කීපයක සිට  අනවසර දැන්වීම් පුවරු  ,කටවුට්, බැනර් ඉවත් කිරීම් සිදු කෙරෙනවා.  ස්ථාන කීපයක  සවි කර ඇති  විශාල  ඩිජිටල්  දැන්වීම්  පුවරු  වලට කිසිදු ගෙවීම් කර නැති බවට වාර්තා වෙනවා  නගර වැසියන්ට පොදු පණිවුඩ ලබාදීමට ඒවා ඉදිරියේ දී ලබා ගන්නට සිදු වෙනවා තවද  විදේශ සංචාරකයින් හට ආකර්ශනීය  සුන්දරත්වයක් විද ගැනීමට සියල්ල සුදානම් ලෙස මීගමුව නගරය ගොඩනැගිය යුතුව තිබෙනවා එදා මේ නගරයේ  බොහෝ තැන් ජලයෙන් යටවුණා ,මාර්ගවල මාළු අල්ලන්න පුළුවන් තරමට වලවල් තිබුණා.

හිටපු  නගරාධිපති ,වත්මන් පාර්ලිමේන්තු මන්ත්‍රි නිමල් ලන්සා  මහතාගේ කැපවීම තුළ නගරය අලංකරණය කළා. ඉන් පසු කාලයේ දැනෙන  සංවර්ධනයක්  මීගමුවේ දකින්න නැති බව පෙනී ගොස් තිබෙනවා.  බදු ගෙවන ජනතාවට වගකීම්  ඉටු කළ යුතුයි.  

අද යම් කටයුත්තකට  මීගමුව මහ නගර සභාවට  පැමිණෙන කෙනෙකුට  ඒ කාර්ය කර ගැනීමට  අඩුම ගානේ රුපියල් පන්සීයක් වත් සංතොෂම්  දෙන්න වෙලා මේ ආයතනය ජාරාජීර්ණ  ආයතනයක් බවට නිළධාරින් පත් කරලා ඒ තත්ත්වය  අපි අවසන් කළ යුතුව තිබෙනවා.  

එවැනි දේවල් යළි සිදු නොවන්නට තමයි ජනතාව මේ තනතුරු අප සැම දෙනා ලබා දීලා තියෙන්නේ ප්‍රධාන කාර්යාලය පිටුපස කෙනෙක් ඇවිත් බැළුවොත් මිහිපිට අපායක් දකින්න පුළුවන් පාට පක්ෂ සියළු තරහා මරහා ඉවතලා සුන්දර මීගමුව ගොඩ නගන්න එකතු වන්න  කියා සැමට ආරාධනා කරනවා’