( දිල්රුක්ෂි ග්‍රේරු )
 
ශ්‍රී ලංකාවේ සෙසු පළාත් වලට වඩා මධ්‍යම පළාතේ  පාසල් දරුවන්ගේ අධ්‍යාපන මට්ටම ඉතා පහළ  අගයක් ගන්නා බව ලංකා ගුරු සංගමයේ  සභාපති ප්‍රියන්ත ප්‍රනාන්දු මහතා පැවසීය.
 
අපොස  සාමාන්‍ය පෙළ  සමත්වී උසස් අධ්‍යාපනය  සඳහා යොමුවන්නේ සීමිත සිසුන් පිරිසක් වන අතර ඔවුන්ද කලා විෂය ධාරාව පමණක් තෝරාගන්නා බවත් වාණිජ, විද්‍යා විෂයන් හැදැරීම ඉතා අඩු මට්ටමකට පවතින බවද ඔහු සඳහන් කළේය.
 
 මීට ප්‍රධාන හේතුව වී  ඇත්තේ  දුෂ්කර පාසල්හි පවතින දැඩි ගුරු පුරප්පාඩුව යැයිද ඔහු පැවසීය.
 
නමුත්  මේ වන විට මධ්‍යම පළාතේ  ගුරු  හිගයක්  නොමැති බවද ,ගුරු අතිරික්තය තුලනය කිරීමට අවශ්‍ය පියවර නොගැනීමෙන් මෙවැනි තත්ත්වයක්  ඇති වී ඇතැයි  ප්‍රියන්ත ප්‍රනාන්දු මහතා සඳහන් කළේය.

මධ්‍ය පළාත තුළ  සමස්ථ ගුරුවරුන්ගේ අවශ්‍යතාව 29,800  ක් වේ.  මේ වන විට ගුරුවරුන් 30,000 ක් 31,000 ක් පමණ සිටින බවත්  ඔහු කීවේය.අතිරික්ත ගුරු සංඛ්‍යාවක් සිටියද මේ වන විට  දුෂ්කර පාසල් හි  පවතින මෙම  ගුරු හිගය   ඇති වීමට  ප්‍රධාන හේතුවක් ලෙස හඳුනාගෙන ඇත්තේ  බොහෝ ගුරුවරු නගර ආශ්‍රිත පසල් පමණක් තෝරා ගැනීම  බවද  පැවසීය.

නව ගුරු පත්වීම් ලබා  සේවයට එක්වන  ඇතැම් ගුරුවරු දුෂ්කර සේවයට නොයා ,දේශපාලන හා උසස් නිලධාරීන්ගේ අනු දැනුම මත  නගර ආශ්‍රිත පාසල් කරා පමණක්  ඇදී යාමත්, එමෙන්ම දුෂ්කර පාසල් හි පවතින අවම පහසුකම් නිසා ගුරුවරුන් එහි රැදී නොසිටීමත් හේතුවෙන්  මෙවැනි තත්වයක් මතුව ඇතැයිද ප්‍රියන්ත ප්‍රනාන්දු මහතා පෙන්වා දුන්නේය.

මේ හේතුවෙන් දුෂ්කර පාසල් හි දූ දරුවන්ට  නිසි අධ්‍යාපනයක් නොලැබෙන බවත් ඇතැම් දරුවන් උසස් අධ්‍යාපනය යොමු නොවීමෙන්  නිසි වයසේ පාසල් අධ්‍යාපනය අහිමි වී ඇතැයිද   ඔහු කීවේය. මෙම ගැටළු වලට  විසඳුම් ලබා දීම පළාත් සභාවට පැවරී තිබුණත් ඔවුන්  නිසි ක්‍රියා මාර්ගයක් නොගන්නේ නම්   ඒ පිළිබඳව සොයා බලා කඩිනම් පියවර ගැනීමට රජය මැදිහත් විය යුතු යැයිද, ඇතිව තිබෙන මෙම ගැටළු සඳහා රජය ද වගකිව යුතු යැයි  හෙතෙම සඳහන් කළේය.

මේවාට කඩිනම් විසඳුම් නොලැබුණහොත්  ඉදිරියේදී  සමස්ථ අධ්‍යාපන ක්ෂේත්‍රයේම ගැටළු ඇතිවීමට ඉඩ ඇතැයිද ඔහු පැවසීය.