(එච්. චන්දන)
 
දැනට මාස පහක පමණ කාලයක සිට භූගතව වන බවට සැකකරන ජල ගැලීමක් හේතුවෙන් තමන් දැඩිසේ පීඩාවට පත්වී සිටින බව පුත්තලම නගර සභා බල ප්‍රදේශයට අයත් සේනකුඩිරිප්පුව ජුසේවාස් මාවත හා කෝවිල පාර ප්‍රදේශයේ නිවාස 40 පමණ පදිංචිකරුවෝ පවසා සිටිති.
 
පුත්තලම නගර සභා බල ප්‍රදේශයේ පහත් බිම් ප්‍රදේශයක් ලෙස සැලකෙන මෙම ප්‍රදේශයේ වැසි ජලය බැස යාම සඳහා නිසි කාණු පද්ධතියක් නොමැති බවත් එවැන්නක් ඇති කළ ද  පුත්තලම කලපුව භූමියට ඉහළින් පිහිටීම නිසා ජලය බැස යාම සිදුවන්නේ මන්දගාමීව බවත් ඔවුහු කියති.
 
ඒ අනුව පසුගිය නොවැම්බර් හා දෙසැම්බර් මාසවල ඇති වූ වර්ෂාවට මෙම ප්‍රදේශය ජලගැලීම්වලට ලක්වී ඇති අතර එසේ ගැලූ ජලය බැස යාමට ඇති ඉහත කී බාධාවන් හේතු කරගෙන තවදුරටත් එම ජලය මෙසේ තම ගෙවතු තුළ එක්රැස්වී ඇති බවට තමන් මෙතෙක් සිතා සිටියද එය එසේ නොවන බවට මේ වන විට පෙනීයන්නේ යැයිද ඔවූහු පෙන්වා දෙති.
 
මෙම තත්වය හමුවේ අදාළ ප්‍රදේශයේ ළිං කිහිපයක් ද පොළොව මට්ටමට ඉහළින් පවා පිරී පවතින අතර මෙම ජල ගැලීමේ බලපෑම අදාළ ගෙවතු, නිවාස හා වැසිකිලිවලට දැඩි ලෙස එල්ල වී තිබේ. ඊට අමතරව ජනතාවට සෞඛ්‍ය ගැටලුද ඇතිවීමේ අවදානමක් ද පවතින බවත් ඇති වී තිබෙන මෙම තත්වය සැළකිල්ලට ගෙන ඇතැම් පිරිස් සිය නිවාස අතහැර ගොස් ඇති බවද අනාවරණය විය.  
 
මේ පිළිබඳව අදහස් දැක්වූ  එම ගම්වැසියෙකු වන කේ .ඒ. ඩි. කැමිලස් මහතා මෙස් පැවසීය.
 
‘‘අපි දැන් මාස කිහිපයක සිටම මේ අපා දුක විදිනවා. මේ පිළිබදව වගකිවයුතු ආයතන කිහිපයකට දැනුම් දීල තියෙනවා. ජල සම්පත් මණ්ඩලයෙන් පුත්තලමට ජලය දෙන්න මීට කලකට ඉස්සර මේ ප්‍රදේශයෙ නළ ළිං  වගයක් ගැහුවා. දැන් ඒ ළිං වලින් වතුර ගන්නේ නැහැ.  ඒ නළ  ළිංවලින් භූගතව මේ ජලය පිටතට එනවද කියලත් අපි හිතනවා‘ යැයිද කීය.
 
අප මේ පිළිබඳව පුත්තලම නගර සභාවේ නගරාධිපති කේ. ඒ. බායිස් මහතාගෙන් විමසීමක් කළ අතර එහිදී ඒ මහතා කියා සිටියේ මේ පිළිබදව අදාළ අංශ සමග එක්ව සොයා බලා පියවරක් ගන්නා බවය.