(පුෂ්පකුමාර මල්ලවආරච්චි සහ ඩබ්ලියු.යූ එස්.කේ.ජයවර්ධන)

කොළඹ සිට පොලොන්නරුව බලා ගමන් කරමින් තිබූ ජනාධිපති ආරක්ෂක අංශයට අයත් ට‍්‍රක් රථයක් අද (22) කොළඹ මහනුවර මාර්ගයේ කලල්පිටිය ප‍්‍රදේශයේදී යතුරු පැදියක ගැටී සිදුවූ අනතුරකින් බරපතල තුවාල ලැබූ යතුරු පැදිකරු මියගොස් ඇතැයි නිට්ටඹුව පොලිසිය කියයි.

මෙසේ මියගොස් ඇත්තේ පස්යාල අත්තනගල්ල ප්‍රදේශයේ පදිංචි නන්දකුමාර පණ්ඩිතරත්න නැමැති 58 හැවිරිදි පුද්ගලයෙකු බව පොලිසිය කියයි.

ට‍්‍රක් රථය භාණ්ඩ තොගයක් පටවාගෙන ගමන් කරමින් තිබී ඇති අතර කලල්පිටිය ප‍්‍රදේශයේදී යතුරු පැදියකට ඉස්සර කරන අවස්ථාවේ එම යතුරු පැදිය ට‍්‍රක් රියේ පිටුපස කොටසේ ගැටී ඇති බව මූලික පරීක්ෂණවලදී අනාවරණය වී ඇත.

අනතුරත් සමඟ යතුරු පැදිය පෙරලී ඇති බවද පැදිකරු ඒ අවස්ථාවේදී ට‍්‍රක් රියට යටවී ඇතැයිද පොලිසිය කියයි.

බරපතල තුවාල ලත් පැදිකරු වතුපිටිවල මූලික රෝහලට ඇතුළත් කිරීමේදී මියගොස් ඇතැයිද ට‍්‍රක් රථය පැදවූ පොලිස් සැරයන් රියදුරා සැකපිට අත්අඩංගුවට ගත් බවද පොලිසිය සඳහන් කරයි.

මියගිය පුද්ගලයාගේ මරණ පරීක්ෂණය හෙට (23) වතුපිටිවල මූලික රෝහලේදී පැවැත්වීමට නියමිතය.