(ජේ.කේ.එල් චාමින්ද)
 
ඇඳිරි නීතිය පැවතියද  ගාල්ල නගර වැසියන්ගේ  සෞඛ්‍ය ආරක්ෂාව වෙනුවෙන් කැළිකසල එකතුකිරීම අඛණ්ඩව සිදුකරන බව ගාල්ල මහනගරාධිපති ප්‍රියන්ත සහබන්දු මහතා පවසයි.
 
අද දින  (21) ගාල්ල මහනගර සභා බලප්‍රදේශයේ කැළිකසල බල ප්‍රදේශ 17 තුළම කැළිකසල එකතු කිරීමට කටයුතු කළ බවද ගාල්ල මහ නගරාධිපතිවරයා සදහන් කළේය.
 
එමෙන්ම හෙට දිනය තුළ (22) කෙරෝනා වයිරසය පැතිරයාම පාලනය සඳහා   ගාල්ල දුම්රිය ස්ථානය, ගාල්ල බස්නැවතුම්පොළ, කරාපිටිය නගරය හා මහමෝදර රෝහල අසල විෂබීජහරණයට කටයුතු යොදා ඇති බවද  නගරාධිපතිවරයා සදහන් කළේය.
 
 මේ වනවිට විදේශීය රටවල සිට මෙරටට පැමිණි පුද්ගලයින් 122 දෙනෙකු  සිය නිවෙස්වලට වී ස්වයං නිරෝධායනයට ලක්ව සිටින බව පවසන නගරාධිපතිවරයා ඒ අය අතර විදේශිකයින් 7 දෙනෙකු සිටින බවද පවසයි.
මහජන සෞඛ්‍ය පරීක්ෂකවරුන්ගේ  හා පොලිස් නිලධාරින්ගේ උපදෙස් මත   මොවුන් ස්වයං නිරෝධායනයට ලක්වෙමින් සිටින බවද ගාල්ල මහ නගරාධිපතිවරයා සදහන් කළේය.
 
මේ අතර ගලි බවුසර්   හා අදාහනාගාර සේවය අඛන්ඩව ක්‍රියාත්මක කරන බවද නගරාධිපතිවරයා සඳහන් කළේය.