(හිරාන් ප්‍රියංකර ජයසිංහ) 
 
කොටවෙහෙර ඉගිනිමිටිය මාර්ගය ඉදිකිරීම  පමාවීමට  විරෝධය පා  ගම්මාන කිහිපයක ජනතාව අද (31) කොටවෙහෙර ප්‍රාදේශීය ලේකම් කාර්යාලය ඉදිරිපිටදී විරෝධතාවයක් පැවැත්වූහ. 
 
ඉගිනිමිටිය සිට ගල්ගමුවට ළගාවිය හැකි ආසන්නතම හා ප්‍රධාන මාර්ගය සංවර්ධනය කිරීම සඳහා 2015 වසරේදී මාර්ග ඉදිකිරීම් සමාගමකට භාර දී තිබුණද එම සමාගම මේ වනවිටත් කිසිදු ඉදිකිරීමක් කර නොතිබිණි.
 
විරෝධතාවය අතර තුරදී ජනතාව පුත්තලම කුරුණෑගල මාර්ග හරස් කිරීමට යාමේදී පොලිස් කැරලි මර්ධන ඒකක හා කොටවෙහෙර පොලිසියේ නිලධාරීහු එක්වී එය වැළැක්වූහ.
 
කොටවෙහෙර ප්‍රාදේශීය ලේකම් රුවන් ජයසුන්දර මහතා සහ මාර්ග සංවර්ධන අධිකාරියේ විධායක ඉංජීනේරු තුෂාර විජේරත්න මහතා මෙම කොන්ත්‍රාත් සමාගම 2015 වසරේ සිට මාර්ගය ඉදි කිරීමට ගිවිසුම් ගත කර ඇතත් එය නොකිරීම පිළිබඳව තමා අවස්ථා ගනනාවකදී බලධාරීන් දැනුවත් කළ බවද දැනට අබලන් මට්ටමේ පවතින මාර්ගය තාවකාලිකව අලුත්වැඩියාවක් කරදෙන බවද පැවසීය.