(දයාරත්න ඇඹෝගම)
 
"පාර්ලිමේන්තුවේ ඉන්න සියලු හොරු ටික අකුළලා දාන්න ඕනෑ. වැරදි කරපු අය ජම්පර් අන්දලා හිරේට දාන්න ඕනෑ. 225 න් කීප දෙනෙකු හරි ඉතුරු වෙලා හොඳ අය පාර්ලිමේන්තුවේ ඉතුරුවෙයි. පාර්ලිමේන්තුව දැන් මොන්ටිසෝරියකටත් අන්ත වෙලා" යැයි අනුරාධපුර දිස්ත්‍රික් පාර්ලිමේන්තු මන්ත්‍රී ඉෂාක් රහුමන් මහතා පැවසීය. 

අනුරාධපුරයේ අද (4) පැවති උත්සවයකින් පසුව මාධ්‍යවේදීන් නැගූ ප්‍රශ්න කීපයකට පිළිතුරු ලබා දෙමින් ඒ මහතා මේ බව පැවසීය.

එහිදී වැඩිදුරටත් අදහස් දැක්වූ ඉෂාක් රහුමාන් මන්ත්‍රිවරයා මෙසේද පැවසීය.

අපි ඉදිරි මැතිවරණය සඳහා   හොඳ අශ්වයෙක් ලෑස්ති කරලා තියෙනවා. කවුරු මොනවා කිව්වත් ඒ අශ්වයා දැම්මොත් වැඩි බහුතරයකින් මේ සැරේ නැවත වතාවක් අපි බලය ගන්නවා. ඒ අශ්වයා කවුද කියලා අපි වෙලාවට කියන්නම්, දැම්ම කියන්න ඕන නෑ අශ්වයාගේ නම කියන විට ජනතාව තුළ මහා විශාල පිබිදීමක් ඇති වෙනවා.

අපිට දැනට 124 දෙනෙකුගේ පාර්ලිමේන්තුවේ බහුතරය තියෙනවා.උසාවි තීන්දුවත් සමඟ එය 130 ක් දක්වා වර්ධනය වෙයි කියලා මම හිතනවා. අපි මේ අරගල කරන්නේ අපේ වාසිය තකා නෙමෙයි. මේ රටට ව්‍යවස්ථාවක් තියෙනවා. ඒ ව්‍යවස්ථාව අනුවයි අපි වැඩකටයුතු කරන්නේ.

සමහරු කියනවා අපි මැතිවරණ වලට සූදානම් එන්න මැතිවරණයකට කියලා, අපි මැතිවරණ වලට බය නෑ. අපි දැන් හොඳ අශ්වයෙක් ලෑස්ති කරලා තියෙනවා. කවුරු මොනවා කිව්වත් ඒ අශ්වයා දැම්මොත් වැඩි බහුතරයකින් මේ සැරේ නැවත වතාවක් අපි බලය ගන්නවා. ඒ අශ්වයා කවුද කියලා අපි වෙලාවට කියන්නම්, දැම්ම කියන්න ඕන නෑ.රේස් එක දැනටමත් අපි දිනලා ඉවරයි.

අශ්වයාගේ නම කියන කොට ජනතාව තුළ මහා විශාල පිබිදීමක් ඇති වෙලා තියෙනවා. සමහරු ඒ අශ්වයාගේ නම අහලා දැනටමත් ඔට්ටු අල්ලන්නත් ලෑස්ති වෙලා ඉන්නවා.

රනිල් වික්‍රමසිංහ මැතිතුමත් කැමතියි මේක හොඳ අශ්වයෙක් දාලා දිනවන්න.එතුමා තමයි වර්ථමාන නායකයා, මැතිවරණය එද්දී එතුමා වගේම පක්ෂයේ සියලු දෙනා තීරණය කරයි ඒ වෙලාවට සුදුසුම කෙනා අපි දානවා.