(බී.ජී. අමරසිංහ සහ ඞී.ජේ. විජේසිංහ)

ඌරගස්මංහන්දිය හල්ගහවේල්ල ප‍්‍රදේශයේදී අද (22) යුද හමුදා මේජර් වරයෙකු ලෙස පෙනී සිටි පුද්ගලයෙකු යුද හමුදා නිලධාරීන් විසින් සැකපිට අත්අඩංගුවට ගෙන ඌරගස්මංහන්දිය පොලිසියට බාර දුන් බව පොලිසිය කියයි.

අත්අඩංගුවට ගත් පුද්ගලයා ශී‍්‍ර ලංකා ගැමුණු හේවා බල ඇණියේ සාමාන්‍ය සෙබළෙකු බවත් මේ වන විට ඔහු යුද හමුදා සේවය අතහැර ගොස් සිටින අයෙකු බවත් පොලිසිය කියයි.

මෙම පුද්ගලයා යුද හමුදා මේජර් නිල ඇඳුමින් සැරසී ප‍්‍රදේශයේ විහාරස්ථානයක පිංකමකටද සහභාගී වී ඇති අතර මේජර් නිල ඇඳුමින් ගමේ තැනින් තැන ඇවිද යාම පිළිබඳව සැක සිතුනු ප‍්‍රදේශවාසියෙකුගේ දැනුම් දීමකට අනුව යුද හමුදා නිලධාරීන් පැමිණ ඔහුව අත්අඩංගුවට ගෙන ඇත.

අත්අඩංගුවට ගත් පුද්ගලයා මේජර් නිල ලාංඡන කඩයකින් මිලදී ගත් ඒවා බව විමර්ශනවලදී අනාවරණය වී ඇති බව පොලිසිය පැවැසීය.