(ඩී.ජී.සුගතපාල සහ සුමතිපාල දීයගහගේ)

උණවටුන රූමස්සල වෙරළේ දිය නෑමට ගිය තරුණයින් දෙදෙනෙකු ගලක් මත සිට සෙල්ෆි ඡායාරුපයක් ගනිමින් සිටියදී  අද (16) සවස මුහුදට වැටී අතුරුදන්ව ඇතැයි හබරාදුව පොලිසිය පවසයි.

මෙසේ අතුරුදන්ව ඇත්තේ මෙවර අ.පො.ස.උසස් පෙළ විභාගයට පෙනි සිටින  බද්දේගම ගිණිමැල්ලගහ පදිංචි නිලංග මලිත් (20) රවිඳු ප්‍රසාද් (21) යන දෙදෙනෙකි.

මෙම දෙදෙනා  උපකාරක පංති යන බව නිවෙස්වලට  පවසා තවත් තිදෙනෙකු සමඟ උණවටුන රූමස්සල ජංගල් බීච් වෙරළේ නෑමට පැමිණ ඇත. සේ පැමිණ මෙම දෙදෙනා ගලක් උඩට නැග සෙල්ෆි ඡායාරූපයක් ගෙන ආපස්සට හැරෙනවාත් සමඟ රළ පහරක් වැදී මුහුදට වැටි අතුරුදන්ව තිබේ.

සිද්ධිය සැලවීමත් සමග නාවික හමුදාවේ දක්ෂිණ කඳවුරේ කිමිදුම්කරුවන් අතුරුදන්වූ අය සෙවිම ආරම්භ කළත් සවස්වනතුරු සොයා ගැනීමට නොහැකිවිය.

පොලිසිය පැවසුවේ මෙම ස්ථානයේ පසුගිය මාසයේ පොහොය දිනයේ ද සෙල්ෆි ඡායාරූප ගැනීමට ගිය මහරගම ප්‍රදේශයේ කාන්තාවක සහ උණවටුනේ පදිංචි හමුදා සෙබළකුද මුහුදට වැටී මියගිය බවයි.

සිද්ධිය සම්බන්ධයෙන් හබරාදුව පොලිසිය වැඩිදුර පරීක්ෂණ පවත්වයි‍.