(සනත් ගමගේ)

හම්බන්තොට බදගිරිය තම්මැන්නාව අනුක්කන් වැව ආසන්නයට දිය බීමට පැමිණි තිත් මුවෙක් හා ඉත්තෑවෙක් දඩයම් කළ පුද්ගලයෙකු හා මස් විකිණිමේ නිරත වූ පුද්ගලයෙකු අද (10) අත්අඩංගුවට ගත් බව හම්බන්තොට වනජීවී කාර්යාලයේ අඩවි ආරක්ෂක නිලධාරී කේ.ජී සමන් පාලිත මහතා කීය.

මේ දිනවල අවුරුදු වෙනුවෙන් දඩමස් සඳහා හොඳ ඉල්ලුමක් පැවැතීම හා පවතින වියළි කාලගුණික තත්ත්වය හමුවේ වන සතුන් ජලය සොයා වැව් ආසන්නයට පැමිණෙන හෙයින් දඩයම් කරුවන් නිරන්තරයෙන් කැළයේ සැරිසරන නිසා වැටලීම් දිනපතා සිදු කරන ලෙසට දකුණු කලාපය භාර සහකාර අධ්‍යක්ෂ ප්‍රසන්ත විමලදාස මහතාගේ උපදෙස් ලබා දී ඇති බවද ඒ මහතා පැවැසීය.

වැටලීමේදී ගිණි අවියක් සමඟ මරණ ලද ඉත්තෑවකුගේ  සිරුරක්  සහ  මස් කපා ඉවත් කරගෙන තිබූ තිත් මුවකුගේ හමක් සමඟ හිසක් අනුක්කන් වැව ප්‍රදේශයේදී සොයා ගෙන තිබේ.

අත්අඩංගුවට ගත් සැකකරු‍ගෙන් ලද තොරතුරු මත මුව මස් විකිණිම සිදු කළ අනික් පුද්ගලයාද අත්අඩංගුවට ගෙන තිබේ. සැකකරුවන් දෙදෙනාම බදගිරිය ප්‍රදේශයේ පදිංචි කරුවන්  බව වනජීවී නිලධාරීහු කියති.