(දෙනියාය විශේෂ එස් .ඩි.කොඩිකාර )

රුපියල් ලක්ෂ තුනකට අධික රන් භාණ්ඩ හා මුදල් සොරකම් කළ සැකකරුවෙකු ඔහුට අයත් යතුරු පැදියකින් පලා යන අවස්ථාවේ පොලීසියට ලද තොරතුරක් මත මොරවක දංගල ප්‍රදේශයේදී අද (05) අත්අඩංගුවට  ගත්බව මොරවක පොලීසිය කියයි.

සැකකරු මොරවක දංගල ප්‍රදේශයේ පදිංචි (28) හැවිරිදි අවිවාහක පුද්ගලයෙකු වන අතර මොහු ඉකුත් සිංහල අවුරුද්ද දින (14) දංගල ප්‍රදේශයේ පාලු නිවසක වහලේ උළු ඉවත්කර නිවසට ඇතුළු වී එහි තිබූ රුපියල් ලක්ෂ තුනකට අධික වටිනාකමින් යුත් රන් තැල්ලක්, වළලු හතරක්, රන් මුදුවක්, කරාබු ජෝඩු දෙකක්, කැටයක තිබූ  මුදල් රුපියල් එකොළොස් දහසක් සොරාගෙන ගොස් තිබූ බවත් සැකකරු පොලිසියට පාපෝච්චාරණය කර ඇත. පසුව එම භාණ්ඩ හා මුදල් සොයාගත් බව පොලීසිය සඳහන් කරයි.

මීට අමතරව මොරවක ප්‍රදේශයේ නිවෙස් සහ වෙළඳසල් කීපයකට ඇතුළු වී  ඒවායේ තිබූ මුදල් හා භාණ්ඩ සොරකම් කරගෙන ගොස්  තිබූ බවට පොලිසියට පැමිණිලි ලැබී ඇති බවත්  ඒවා සම්බන්ධයෙන් ඉදිරි විමර්ශන කටයුතු සිදුකරන බවත් මොරවක පොලීසිය සඳහන් කරයි.

සිය යතුරු පැදියෙන් රාත්‍රී කාලයේ  විදුලි පහන්  ක්‍රියාවිරහිත කරගෙන ගොස් තනියම මෙම සොරකම් සිදුකර ගෙන ගොස් ඇති බවට අදාළ සැකකරු විසින් පොලිසියට පාපෝච්චාරණය කර ඇත.

මෙසේ සොරාගන්නා ලද භාණ්ඩ විවිධ ස්ථානවලට අලෙවි කර ඉන් ලබාගන්නා  මුදලින් ගංජා ඇතුළු මත්ද්‍රව්‍ය මෙම සැකකරු විසින් පානය කළ බවට පොලිස් මූලික පරීක්ෂණවලින් හෙළිවිය.

මොහු සම්බන්ධයෙන් පොලීසියට මේ වනවිටත් පැමිණිලි ලැබෙමින් පවතින බවත්, මේ වනවිට සොරකම් රැසක තොරතුරු අනාවරණය කරගෙන යන බවත් මොරවක පොලිස් ස්ථානාධිපති පොලිස් පරීක්ෂක ප්‍රභාත් දේශබන්ධු මහතා පැවසීය.

පොලිස් පරීක්ෂක ප්‍රභාත් දේශබන්දු මහතාගේ උපදෙස් පරිදි  මෙම සැකකරු මොරවක මහේස්ත්‍රාත් අධිකරණයට ඉදිරිපත් කිරීමට නියමිතව තිබේ.