(රවීන්ද්‍ර විරාජ්  අබයසිරි)

මාතලේ දිස්ත්‍රික් මහ රෝහලේ ශ්වසන රෝගී ඒකකය අසල රෝහලේ කසළ දහනය කිරීමෙන් එහි ප්‍රතිකාර ලබන රෝගීන්  හා රෝහල්  කාර්යමණ්ඩලය දැඩි ලෙස පිඩාවට පත්ව ඇතැයි රෝගීහු මෙන්ම කාර්ය මණ්ඩලය ද චෝදනා කරති..

ශ්වසන රෝග ඒකකයට මීටර් 50ක් පමණ දුරින් රෝහල් කසළ කළමනාකරණ ඒකකය පිහිටා ඇති අතර එහි කසළ දහනය කිරීම දින තුනකට වරක් සිදු කරනු ලබයි.

ඉවතලන ප්ලාස්ටික් බෝතල් හා ඉටි කොළ දහනයේදී ප්‍රදේශය පුරා විශාල දුර්ගන්දයක් හා දුමක් පැතිර යයි.

දහනය වන කුඩා කොටස් දුමත් සමග ශ්වසන රෝගී ඒකකය තුළට පැමිණීමෙන්  ශ්වසන රෝගීන් සුව වනවා වෙනුවට ඔවුන්ගේ රෝගී තත්ත්වය තවත් වැඩි වන බවට ඔවූහූ චෝදනා කරති.

“ශ්වසන රෝගී ඒකකයක් ආසන්නයේ කසළ දහනය කිරීම අනුමත කරන්නේ නෑ.නමුත් මෙය වසර ගණනාවකට පෙර ඉදිකරලා තියෙන්නේ.මේ ගැටළුව පිළිබදව පළාත් සෞඛ්‍ය අමාත්‍යංශය දැනුවත් කරලා තියෙනවා.මේ ගැටළුවට විසදුමක් ලෙස වෙනත් ස්ථානයක නවීන තාක්ෂණයෙන් යුතු කසල ධාවකයක් පිහිටුවීමට රුපියල් මිලියන 6.5ක මුදලක් වෙන් කරලා තියෙනවා.එය ඉදිකළ විට මෙම ගැටළුවට විසදුම් ලැබෙයි. “ යැයි මාතලේ දිස්ත්‍රික් රෝහල් අධ්‍යක්ෂක අනුර වික්‍රම මහතාගෙන් කළ විමසීමකදී පැවසීය.