(කුෂාන් ජයවර්ධන)

     රුපියල් 5000 ව්‍යාජ නොට්ටු 07ක් සමඟ සැකකරුවකු කැකිරාව නගරයේදී අද (21) අත්අඩංගුවට ගත් බව කැකිරාව පොලිසිය පැවැසීය.

ව්‍යාජ මුදල් නොට්ටු සමඟ මෙලෙස පොලිස් අත්අඩංගුවට පත්ව ඇත්තේ කැලණිය පට්ටිය ප‍්‍රදේශයේ පදිංචි 26 හැවිරිදි පුද්ගලයෙකි.

ව්‍යාජ රුපියල් 5000 මුදල් නොට්ටු 07ක් ලබාදී කැකිරාව නගරයේ පිහිටි රන් අභරණ වෙළඳසැලකින් රන් අභරණ මිලදී ගැනීමට සූදානම් වූ අවස්ථාවේ එම සැකකරු ව්‍යාජ මුදල් නෝට්ටු ද සමඟ එම අත්අඩංගුවට ගත් බව පොලිසිය කියයි.

වෙළදසැලේ හිමිකරු පොලිසියට කළ දැනුම්දීමක් අනුව පොලිසිය ක්ෂණිකව ක‍්‍රියාත්මකවී ඇති අතර කැකිරාව පොලිස් ස්ථානාධීපතිවරයා ඇතුළු නිලධාරීහු පිරිසක් එම සැකකරු අත්අඩංගුවට ගෙන තිබේ.

සැකකරු සන්තකයේ තිබූ රුපියල් 5000 ව්‍යාජ මුදල් නොට්ටු 07ක් ද පොලිස් භාරයට ගෙන ඇති අතර අංක කාණ්ඩ දෙකක් යටතේ එම මුදල් නොට්ටු මුද්‍රණය කර ඇති බව පොලිසිය කියයි.

සැකකරුගෙන් සිදුකළ ප‍්‍රශ්න කිරීම්වලදී මෙම ව්‍යාජ මුදල් නොට්ටු ජාවාරම සම්බන්ධව තවත් තොරතුරු රැසක් පොලිසිය අනාවරණය කර ගෙන ඇති අතර කැකිරාව පොලිස් ස්ථානයේ නිලධාරීන් මේ සම්බන්ධයෙන් වැඩිදුර විමර්ශන සිදුකරයි.

අත්අඩංගුවට ගත් සැකකරු කැකිරාව දිසා මහේස්‍ත්‍රාත් අධීකණය වෙත ඉදිරිපත් කිරීමට නියමිතව තිබේ.