(ඩී.ජී.සුගතපාල)
 
රත්ගම ද්විත්ව ඝාතන නඩුවේ සැකකරුවන් 17 දෙනා තවදුරටත් 24 වැනි දා දක්වා  රක්ෂිත බන්ධනාගාරගත කිරීමට ගාල්ල අතිරේක මහේස්ත්‍රාත් පවිත්‍රා සංජිවනි පතිරණ මහත්මිය අද (10) නියෝග කළාය.

මෙම සැකරුවන් 17 දෙනාගෙන්  15 දෙනෙකු දකුණු පළාත් විශේෂ අපරාධ විමර්ශන ඒකකයේ පොලිස් නිලධාරින් වන අතර දෙදෙනකු වන සංරක්ෂණ දෙපාර්තමේන්තුවේ නිලධාරීහු වෙති. 

මෙහිදි අපරාධ පරික්ෂණ දෙපාර්තමේන්තුව කියාසිටියේ කොමර්ෂල් බැංකුවේ ගාල්ල මහා විදියේ සහ කොටුවේ ශාඛා කළමනාකරුවන් දෙදෙනාට  ප්‍රකාශ ලබා ගැනීමට අපරාධ පරීක්ෂණ දෙපාර්තමේන්තුවට පැමිණෙන ලෙස දන්වා සිටියත් ඔවුන් නොපැමිණි බවයි.

එනිසා ඔවුන් කැඳවා ප්‍රකාශ ලබා ගැනීමට බැංකුවේ ප්‍රධාන කාර්යාලයට නියෝගයක් නිකුත් කරන ලෙස කරන ලෙස අපරාධ පරීක්ෂණ දෙපාර්තමේන්තුව ඉල්ලා සිටියේය.

අතිරේක මහේස්ත්‍රාත්වරිය එම ඉල්ලීමට ඉඩ දෙමින් කොමර්ෂල් බැංකුවේ ප්‍රධාන කාර්යාලයට නියෝගයක් නිකුත් කළාය.

මේ අතර අගතියට පත් පාර්ශවය වෙනුවෙන් පෙනී සිටි නිතිඥවරයා කරුණු දක්වමින් මියගිය දෙදෙනා වෙනුවෙන් ස්මාරකයක් ඉදිකිරිමට ඔවුන් මරා පුළුස්සා දමන ලද ස්ථානයේ පස් ටිකක් ගැනීමට ඔවුන්ගේ බිරින්දෑවරුන් ඉල්ලා සිටින බැවින් ඒ සඳහා නියෝගයක් නිකුත් කරන ලෙස ඉල්ලා සිටියේය.

එහිදි අපරාධ පරික්ෂණ දෙපාර්තමේන්තුව කියා සිටියේ  එයට විරෝධයක් නොමැති අතර  එම ස්ථානය වන සංරක්ෂණ දෙපාර්තමේන්තුව සතු එකක් බවයි. 

එහිදි අතිරේක මහේස්ත්‍රාත්වරිය කියාසිටියේ අධිකරණයට ඒ සම්බන්ධව කටයුතු කිරීමට නොහැකි අතර එයට අදාළ පාර්ශව දැනුම්වත් කරන බවයි.