(ප්‍රින්ස් රත්නායක)
 
ශ්‍රී ජයවර්ධනපුර විශ්වවිද්‍යාලයේ උපාධිධාරිනියක වන අන්ධ තරුණියකට යුද හමුදාව සහ කොළඹ දිස්ත්‍රික්කයේ 360, සී1 සිංහ සමාජයේ මැදිහත්වීමෙන් අංග සම්පූර්ණ නිවසක් සාදා දී එය ඔවුන්ගේ අයිතියට පත්කිරීමේ අවස්ථාව අද (14) කුලියාපිටියේ දී පැවත්විණි.
 
මෙම තරුණිය හසිනි මධුෂානි නමැත්තියක වන අතර, 14 වන වියේදී ඇගේ මව මියගොස් තිබිණි. 12 හැවිරිදි වියේදී අන්ධභාවයට පත් වූ ඇය මිත්තණිය සහ සොහොයුරා සමඟ පහසුකම් අවම නිවසක ජීවත්ව ඇත.
 
පියතුමකු මැදිහත්වී ඇයට නිවසක් සාදා දී තිබූ අතර එය අංග සම්පූර්ණ නිවසක් බවට පත් කරගැනීමට ඇය සහය ඉල්ලා තිබිණි.
 
ඒ අනුව කොළඹ දිස්ත්‍රික්කයේ 360, සී1 ව්‍යාපෘති සභාපති නීෂා රදැල්ල මහත්මිය සහ ඇගේ සොහොයුරකු වන යුද හමුදා සේවයේ නියුතු කර්නල් නලින්ද මහවිතාන මහතාගේ මැදිහත්වීමෙන්, යුද හමුදාපති මහේෂ් සේනානායක මහතාගේ සහයෝගය සහිතව එය සම්පූර්ණ නිවසක් ලෙස ගොඩනැංවිණි.
 
යුද හමුදාවේ සහය සහිතව මෙම නිවස ඉදිකර ඇති අතර, ශ්‍රම දායකත්වයෙන් තොරව ගත් කළ ලක්ෂ 20ක පමණ පිරිවැයක් මේ වෙනුවෙන් දරා ඇතැයි පැවසේ. නිවසට අවශ්‍ය ගෘහ උපකරණ ලබාදීමට සිංහ සමාජය කටයුතු කර තිබිණි.
 
නිවස තරුණියගේ අයිතියට පත්කරන එම අවස්ථාවට යුද හමුදාපතිවරයා, යුද හමුදාවේ සේවා වනිතා ඒකකයේ සේවයේ නියුතු චන්ද්‍රිකා සේනානායක මහත්මිය ඇතුලු පිරිසක් එක්ව සිටියහ.