(දිලීප් ජයසේකර)

කතරගම ගලහිටිය ප්‍රදේශයේදි අතින් පයින් හා පොල්ලකින් පහරදී 31 හැවිරිදි විවාහක පුද්ගලයෙකු ඝාතනය කිරීමේ චෝදනාවට වරද කරු වු  තිදරු පියෙකුට වසර 10ක බර වැඩ සහිත සිර දඩුවමක් හා අගතියටපත් පාර්ශවයට රුපියල් ලක්ෂ 03ක වන්දි මුදලක්ද ගෙවන ලෙස හම්බන්තොට මහාධිකරන විනිසුරු තාමර තෙන්නකෝන් මහතා අද (06) නියෝග කළේය.

මෙලෙස දඩුවම් නියම වුයේ දියවර ගම්මානය,ගලහිටිය,කතරගම පදිංචි ලියනාරච්චිගේ විල්සන් නැමති පනස් හය හැවිරිදි තිදෙරු පියෙකුටය.

සැකකරු 2003.02.20 වන දින කතරගම ගලහිටියදී අක්කර 20,පරණ කරවිලේ පාර,සෙල්ලකතරගම ලිපිනයේ පදිංචිව සිටි 31 හැවිරිදි විවාහකයෙකු වු මනිසෙට්ටි රාමසාමිගේ බාලක්‍රිෂ්ණන් නොහොත් රාජා නැමැත්තාට අතින් පයින් හා පොල්ලකින් පහරදී ඝාතනය කර තිබේ.

සැකකරු සිදුකල පහරදිම හේතුවෙන් බරපතළ තුවාල ලබා සිටි බාලක්‍රිෂ්නන් ප්‍රථිකාර සදහා කතරගම රෝහලට ඇතුලත් කිරිමෙන් පසු වැඩිදුර ප්‍රථිකාර සදහා මාතර මහ රෝහල වෙතඉ මාරු කර යවා තිබුණි.එහිදී ප්‍රථිකාර ලබමින් සිටියදී බාලක්‍රිෂ්ණන් 2003.02.22 වන දින මරණයට පත්ව තිබේ.

මෙම මනුෂ්‍ය ඝාතනය සම්බන්ධයෙන් කතරගම පොලිසිය විසින් සැකකරු අත්අඩංගුවටගෙන තිස්සමහාරාම මහේස්ත්‍රාත් අධිකරණයට ඉදිරිපත් කිරීමෙන් පසු රක්ෂිත බන්ධානාගර ගත කෙරුණි.

ඉන් පසු සැකකරුට එරෙහිව නිතිපති වරයා විසින් හම්බන්තොට මහාධිකරණයේ නඩු පැවරූ අතර වසර 16 කට පසුව සැකකරුට එරෙහිව නගා තිබු චෝදනාවට සැකකරු වැරදිකරු බවට පත්විය.ඒ අනුව ඉදිරිපත් වු සාක්ෂි සියල්ල සළකා බැළු හම්බන්තොට මහාධිකරණ විනිසුරු තාමර තෙන්නකෝන් මහතා සැකකරුට වසර 10ක බර වැඩ සහිත සිර දඩුවමක් නියම කල අතර  රුපියල් 25000ක දඩ මුදලක්ද නියම කෙරුණි.

 එය නොගෙවන්නේ නම් තවත් වසර දෙකක් සිර දඩුවමක්ද නියම කෙරුණි.ඊට අමතරව මියගිය බාලක්‍රිෂ්නන්ගේ මවට හා බිරිදට රුපියල් ලක්ෂ 03ක වන්දි මුදලක්ද ගෙවන ලෙස නියෝග කල මහාධිකරණ විනිසුරු වරයා එය නොගෙවන්නේ නම් සැකකරුට තවත් වසර 05ක සිර දඩුවමක් නියම කෙරුණි. පැමිණිල්ල වෙනුවෙන් රජයේ අධිනීතීඥ ගයාන් පෙරේරා මහතා පෙනිසිටියේය.