(එස්. ඩි .කොඩිකාර )

දෙනියාය සෙල්ලකන්ද මාර්ගයේ ධාවනය වෙමින් තිබූ මගී බස් රථයක යට ගැටගසා තිබූ ටී-56 ගිනි අවියකට යොදන උණ්ඩ හතක්,ගංජා ග්‍රෑම් 740 ක් සමඟ බස් රථයේ රියදුරු සහ කොන්දොස්තරවරයා බස් රථය සමඟ අද (05) කන්දිල්පාන මංසන්ධියේදී දෙනියාය පොලිස් විශේෂ කාර්ය බලකා කඳවුරේ නිලධාරීන් විසින් අත්අඩංගුවට ගෙන ඇත.

දෙනියාය සෙල්ලකන්ද මාර්ගයේ ධාවනය වන බස් රථයක ගංජා පාර්සලයක් රැගෙන යන බවට විශේෂ කාර්ය බලකා නිලධාරීන් ලද තොරතුරක් මත බස් රථය ලුහුබැඳ සැකකරුවන් සමඟ බස් රථය අත්අඩංගුවට ගෙන තිබුණි.

අත්අඩංගුවට ගත් සැකකරුවන් දෙදෙනා වයස අවුරුදු 27 ත් 54 ත්  අතර වයසේ පසුවන තෙලිජ්ජවිල ප්‍රදේශයේ පදිංචිකරුවන් දෙදෙනෙකි.

අත්අඩංගුවට ගන්නා ලද ගංජා පාර්සලය බස් රථයේ අසුනක් යට තිබී සොයාගෙන ඇති අතර විශේෂ කාර්ය බලකා නිලධාරීන් බස්රථය වැඩිදුර සෝදිසි කිරීමේදී බස් රථයේ යට ගැටගසා තිබූ ටී-56 ගිනි අවියට යොදන ජීව උණ්ඩ 7 සොයාගත් බව වැටලීම සිදුකළ විශේෂ කාර්ය බලකායේ උසස් නිලධාරියෙක් පැවසීය.