(රෝවන් පෙරේරා)
 
පුත්තලම සිංහ විල්ලුව හමුදා කඳවුර ඉදිරිපිට පිහිටා ඇති මහවිල්ව වැවේ පාවෙමින් තිබූ සෙබළෙකුගේ මළසිරුරක් අද(24) සොයාගත් බව පුත්තලම පොලිසිය කියයි.

මියගිය සෙබළා ඇඳ සිටි නිලඇඳුමේ යුද හමුදා සෙබළකුට ලබා දෙන අංකය සඳහන් වී ඇති බවද, ඒ අනුව ඔහුගේ අනන්‍යතාව සොයා පරීක්ෂණ පවත්වන බවද පොලිසිය කියයි.
 
පුත්තලම යුද හමුදා කඳවුරේ මේ දිනවල ආධුනික සෙබළුන් විශාල පිරිසක් පුහුණුව ලබමින් සිටින බවත් ඉන් සෙබළුන් කිහිපදෙනෙකු කඳවුරෙන් පැන ගොස් ඇති බවට පොලීසියට තොරතුරු ලැබී ඇති බවත් පොලිසිය පවසයි.  

  පුත්තලම වැඩ බලන මහේස්ත්‍රාත් මොහොමඩ් ඉක්බාල්  මහතා දේහය පුත්තලම මූලික රෝහලට රැගෙන ගොස් අධිකරණ වෛද්‍ය පරීක්ෂණයකට ලක්කරන ලෙස උපදෙස් දුන්නේය.
 
සෙබළාගේ මරණය දියේ ගිලීමකින් වූවක්ද  නැතිනම් ඝාතනයක්දැයි  පුත්තලම පොලීසිය වැඩිදුර පරීක්ෂණ පවත්වයි.