(බිමල් ශ්‍යාමන් ජයසිංහ)
 

ඒකාබද්ධ කාල සටහනකට පටහැනිව ලංගම බස් රථ රියැදුරන් මගීන් ප්‍රවාහනය කිරීමට විරෝධය දක්වමින් රයිගම්පුර බස් සමගමට අයත් පෞද්ගලික බස් රථ රියැදුරෝ අද(25) ධාවනයෙන් වැළකී පානදුර ප්‍රධාන බස් නැවතුම්පළෙහිදී විරෝධතාවක් පැවැත්වූහ.
 
පානදුර - රත්නපුර, පානදුර - මහබෙල්ලන, පානදුර - හොරණ, පානදුර - අටුලුගම, පානදුර - අගුරුවාතොට ආදී මාර්ග කිහිපයක ධාවනයේ යෙදෙන බස් රථ 100කට අධික ප්‍රමාණයක රියැදුරෝ සහ කොන්දොස්තරවරු ධාවනයෙන් වැළකී ඊට විරෝධය දැක්වූහ.
 
රයිගම්පුර බස් සංගමයේ ලේකම් නිමල් පයාගලගේ මහතා මේ සම්බන්ධයෙන් අදහස් දක්වමින් මෙසේ පැවසීය.
 
“මේ ගැටලුව වසර දෙකක පමණ කාලයක් තිස්සේ තිබෙනවා. අපි බස්නැවතුම්පළෙන් මගීන් අරගෙන යන්න සූදානම්වෙද්දී, පානදුර සහ හොරණ ඩිපෝවලට අයත් ඇතැම් බස් රථ විශේෂයෙන් පානදුර දුම්රිය ස්ථානයේ මගීන් රැගෙන නොයෙකුත් මාර්ගවල ගමන් කරනවා.
 
ඊට අමතරව කාලසටහනට පටහැනිව අමතර මගීන් රැගෙන යනවා.
 
ලංගම බස් රථ රියදුරන් පිරිසක් කාල සටහනට බස් ධාවනය කරද්දී තවත් පිරිසක් මගීන්ව නොයෙක් ස්ථානවලින් ඔවුන්ට කැමති ආකාරයට රැගෙන යනවා. ඊට අපි මෙසේ විරෝධය දක්වනවා” යැයි පැවසීය.