(ක්‍රිෂාන් ජීවක ජයරුක්)

 

මාතර පඹුරණ අබේගුණරත්න මාවතේ අනාරක්ෂිත දුම්රිය හරස් මාර්ගයට ආරක්ෂිත ගේට්ටුවක් ලබා දෙන්නැයි ඉල්ලා ප්‍රදේශවාසීහූ පිරිසක් අද (19) මාතර - කොළඹ මුහුදුබඩ දුම්රිය මාර්ගය අවහිර කරමින් උද්ඝෝෂණ ව්‍යාපාරයක නිරත වුහ.

විශේෂයෙන්ම මේ නිසා මහනුවර සිට මාතර බලා යාමට පැමිණි අංක 40 දරණ සීඝ්‍රගාමී දුම්රිය එම ස්ථානය ආසන්නයේ දී නතර කිරීමට සිදු විය.

පැයක පමණ කාලයක් ගත වන තෙක් දුම්රිය ධාවනය කිරීමට නොහැකිවීම නිසා එම දුම්රිය ආපසු කඹුරුගමුව දුම්රිය ස්ථානය වෙත රැගෙන යාමට දුම්රිය බලධාරීන් ක්‍රියා කළේය.

මීට සතියකට පමණ ඉහතදී ද මෙම ස්ථානයේ දී මෝටර් රථයක් රුහුණු කුමාරි දුම්රියේ හැපීමෙන් තිදරු පියෙකු ජීවිතක්ෂයට පත්ව ඔහුගේ දියණිය හා මස්සිනා බරපතල තුවාල ලැබීය.

අදාළ දුම්රිය හරස් මාර්ගය දෙපස අනතුරු ඇඟවීමේ ලා හා ආලෝක සංඥා පද්ධතියක් ද සවිකර තිබෙන අතර ඇතැම් විට දුම්රිය නොපැමිණෙන අවස්ථා වලදී පවා එය ක්‍රියාත්මක වන බවට ප්‍රදේශවාසීහු චෝදනා කරති.

එම නිසා වහා දුම්රිය ආරක්ෂිත ගේට්ටු සවි කර තම ජීවිත සුරක්ෂිත කර දෙන ලෙසට ඔවුන් අදාළ බලධාරීන්ගෙන් ඉල්ලා සිටියේය.

පැය දෙකක පමණ කාලයකින් පසු විරෝධතාකරුවන් දුම්රිය මාර්ගයෙන් ඉවත් වී විසිර ගියහ.