( ජයරත්න වික්‍රමාරච්චි)
 
සාලියවැව පළුගස්සේගම ප්‍රදේශයේ නිවසක කාමරයක් තුළ පොළොව කැනීමක් සිදු කළ බවට සැකපිට කාන්තාවක් ඇතුළු පුද්ගලයන් පස්දෙනෙකු  අද (9) අලුයම අත් අඩංගුවට ගත් බව සාලියවැව පොලීසිය කියයි.
 
නිධන් හැරීමට ගන්නා  උපකරණ තොගයක් ද  ඔවුන් සමඟ අත්අඩංගුවට ගෙන තිබේ.
 
අත් අඩංගුවට ගත් උපකරණ තොගය අතර, පොළොව කැණීම් කරන අත් මැසින් (ඩ්‍රිල්) 2ක්, වතුර මෝටරයක්, යකඩ ඉන්නක්, උදැල්ලක්, ගල් විදින කටු කිහිපයක්, පූජා භාණ්ඩ ඇතුළ උපකරණ 26ක්  තිබු බවද පොලීසය සඳහන් කරයි.
 
කිසියම් පිරිසක් අදාළ ස්ථානයේ කැණීමක් සිදු කරන බවට  ලද තොරතුරකට සාලියවැව පොලීසියේ නිලධාරීන් කණ්ඩායමක් ගොස් මෙම වැටළීම සිදුකර තිබේ.
 
එම අවස්ථාව වනවිට නිවසේ කාමරයක දෝනාවක් මෙන් විශාල වළක් හාරා තිබූ බවත්, ඒ අනුව එම නිවසේ හිමිකාරිය ඇතුළුව සැකකරුවන් පිරිස හා අදාළ උපකරණ තොගය මෙසේ අත් අඩංගුවට ගත් බවත් පොලීසිය කියයි.
 
අත් අඩංගුවට ගත් සැකකරුවන් අනුරාධපුරය, දඹුල්ල සහ සාලියවැව ප්‍රදේශවල පදිංචිකරුවන් බවත්, මෙම සිදුවීමට සම්බන්ධ තවක් සැකකරුවන් පිරිසක් අත් අඩංගුවට ගැනීම සදහා විමර්ශන සිදු කරන බවත් පොලීසිය පවසයි.