(සම්පත් ප්‍රියනන්දන)

බලන්ගොඩ ⁣බොල්තුඹේ සමන් දේවාල භුමියේ  නිධන්  ගැනීමට  උත්සාහ  කළ  බවට සැකකෙරෙන  චීවරධාරියෙකු  ඇතුළු  පුද්ගලයන්  6දෙනෙකු  අද (22) දා අත්අඩංගුවට ගත් බව පොලීසිය පවසයි.

ඉකුත්  08 වැනිදා  බොල්තුඹේ දේවාලයේ දොර ජනෙල් කඩා  එයට ඇතුල් වී  දේවාලයේ  පෞරාණික භාණ්ඩ රැසක් සොරකම් කරගෙන ගොස්  තිබුණි. ඒ අනුව පොලිස්පතිවරයාගේ  උපදෙස් පරිදි බලන්ගොඩ සහකාර ⁣පොලිස් අධිකාරි දුමිදු සේනානායක මහතා  ඇතුළු පොලිස් කණ්ඩායම් 4ක්  යටතේ  පරික්ෂණ ආරම්භ කර තිබේ.

එම පරික්ෂණ කළ නිලධාරීන්  විසින්  මෙම සැකකරුවන් මැණික්  ගල් කිහිපයක්  සමග  අත්අඩංගුවට ගෙන ඇත. දේවාලයේ නිධන් ගැනීමට උත්සාහ කළ  අය  දේවාලයේ පෞරාණික භාණ්ඩ සොරකම් කිරීමට  සම්බන්ධයක්  ඇතැයි පොලිසිය සැක පළකරයි.

අත්අඩංගුවට  ගත් සැකකරුවන් බලන්ගොඩ සහ මොනරාගල නැතිමලේ ප්‍රදේශවල පදිංචිකරුවන් බව පොලිසිය කියයි. සැකකරුවන් අද (22) බලන්ගොඩ මහෙස්ත්‍රාත් අධිකරණයට ඉදිරිපත් කිරිමට නියමිතව තිබුණි.